1 Yoashi andaga na miyaka mfungate umwo akakonga kunda seuta. Alongozaga kwa miyaka milongo mine kulawa Yelusalemu. Nine etangwagwa Sibia kulawa Beel Sheba. 2 Umwo mlavant'hambiko Yehoyada andaga akei mgima Yoashi adamanyaga ayedi hameso ha Zumbe Mnungu. 3 Yehoyada amlozaga seuta Yoashi wavele waidi, nawo wamwelekelaga wana kilume na wana kike.

4 Akajika Yoashi aonaga vedi kuidamanya uhya Nyumba ya Zumbe Mnungu. 5 Ivo awetangaga walavant'hambiko na Walawi nakuwagamba, "Iteni mwe mizi ya Yuda mkaduganye matundu ya kila mwaka kulawa kwa Waizilaeli vileke muidamanye uhya Nyumba ya Zumbe Mnungu wenyu, sunguzeni kuita" Mna Walawi hawasunguze. 6 Ivo seuta amwitangaga Yehoyada kilongozi ywawe na kumuuza, "Nii huwagambile Walawi waduganye matundu kulawa kwa want'hu wa Yuda na Yelusalemu, kodi iyo Musa mndima ywa Zumbe Mnungu alagizaga want'hu walihe kwaajili ye Dihema Dikukile dya Zumbe Mnungu?"

7 Want'hu wa yudya mvele mwavu Atalia wandaga waibananga Nyumba ya Zumbe Mnungu, naho waviguhaga vyombo vikukile kwaajili ya kumdamanyila mviko milungu ya Baali.

8 Ivo seuta awalagizaga Walawi wadamanye sanduku dya malavo na kudiika kuse ye nk'hili ye Nyumba ya Zumbe Mnungu. 9 Wabwelekezaga ulosi mwe Yuda na Yelusalemu yose, kugamba want'hu wose wamwigaile Zumbe Mnungu kodi iyo Musa mndima ywa Mnungu awalagizaga Waizilaeli umwo wandaga kwedijangwa. 10 Wakulu wose na want'hu wose waletaga kodi zawe kwa kinyemi nakuyaika mwe disanduku dya malavo mpaka dimema. 11 Walawi weze wedigale disanduku idyo kwa wakulu wa seuta nawo weze waone kugamba kuna matundu mengi, mwandishi ywe nyumba ya kiseuta na mwambizi wa mlavant'hambiko mkulu, wayalavaga mwe disanduku akajika wadivuzaga hant'hu hakwe watendaga ivo kila zuwa, ivo waduganyaga matundu mengi. 12 Seuta na Yehoyada walavaga matundu na kuwenk'ha wadya wasagulwe kukimaila zindima mwe Nyumba ya Mnungu. Matundu ayo yawalihaga wandima mwe Nyumba ya Mnungu awo wasongoli na wazesi na wasani kwajili ya kuidamanya uhya nyumba ya Mnungu. 13 Wazesi awo wadamanyaga ndima kwa kukombeka. Waidamanyaga uhya Nyumba ya Zumbe Mnungu niyo yanda enga ivo yandaga nk'hongo. 14 Umwo weze wabinde kuika vedi Nyumba ya Zumbe Mnungu wamwigailaga seuta na Yehoyada zahabu na masawa ayo isigale, akajika wadamanyaga vyombo kwaajili ya Nyumba ya Zumbe Mnungu, na kwaajili ya malavo yo kokwa na nyiga zo kufunk'hizila ubani naho vyombo va zahabu na va masawa. Want'hu wagendeelaga kulava malavo yo kokwa mwe Nyumba ya Zumbe Mnungu mwo lupisi lwose lwa Yehoyada umwo andaga mgima.

15 Yehoyada andaga kadalahala, umwo eze abule miyaka gana dimwenga na milongo mitatu abanikaga. 16 Wammoselaga msanga mwo mzi wa Daudi mwe vikuta va maseuta kwa kulagisa nt'hunyo yedi atendile mwe Izilaeli na kwa ajili ye nyumba ya. 17 Yehoyada eze abanike, wakulu wa Yuda wamwiizilaga seuta Yoashi na kumluvya vileke awategeleze naye niyo awategeleza ulangilizi wawe. 18 Ivo want'hu walekaga kuvika mwe Nyumba ya Zumbe Mnungu, Mnungu ywa wakale wawe, wavikaga mahili na milungu ya Ashela mnungu mvele. Mnungu awaihiyaga want'hu wa Yuda na yelusalemu kwajili yo wavu wawe. 19 Hata ivo Mnungu awatumaga walotezi kuwakanya vileke wamuuiye mna woho hawawategeleze. 20 Niho Muye ywa Mnungu yamwizila Zekalia mwana mlavant'hambiko Yehoyada, naye niyo akimala kulongole kwawe niyo awagamba, "Zumbe Mnungu awauzani nii hamdamaye ivo awasigiileni? Homnde wapati. Kwaviya mumlemela Zumbe Mnungu yehe naye kawalemelani nyuwe!" 21 Niyo vilongozi waika mzungu wa kumkoma Zakalia, seuta Yoashi naye niyo alagiza kugamba wamtowe maiwe abanike aaho ho lwazo lwe Nyumba ya Zumbe Mnungu, niyo wamkoma. 22 Seuta Yoashi ajalaga uwedi atendelwagwa ni Yehoyada ise dya Zakalia, mna amkomaga mwanawe. Umwo Zekalia andaga hagihi na kubanika agambaga, "Zumbe Mnungu naaone iki ukudamanya naho akusengele."

23 Mwo uhelo wo mwaka udya, watowani wa Wasilia dyamwiziilaga Yoashi niyo dyaitoa Yuda na Yelusalemu na kuwakoma vilongozi wose. Wavigalaga vitahigwa vose kwa seuta ywawe uko Damesiki. 24 Hamwenga na kugamba watowani wa Wasilia dyandaga dodo mna Zumbe Mnungu awenk'haga udahi wa kuwahuma watowani wa Yuda. Want'hu wa Yuda wasagukaga kwa Zumbe Mnungu, Mnungu ywa wakale wawe. Ivo nivo seuta Yoashi atowagwa ni Washamu. 25 Wank'hondo we Kialaam wahalawaga wakamwasa akanda kalumizwa vihile. Wandima wakwe wakulu watendaga mzungu wa nyambi niyo kumkomela mwo lusazi lwakwe wakalihiza kwaviya amkomaga mwana Yehoyada mlavant'hambiko. Yoashi amoselagwa msanga mwo mzi wa Daudi, mna hiyo kwe vikuta va maseuta. 26 Waikaga mzungu uwo wo kumkoma wandaga ni Zabadi mwana ywa mvele dya Mwamoni etangwagwa Shimeati, na Yehozabadi mwana ywa Mvele Mmoabu etangwagwa Shimliti. 27 Kwa mbuli za wanawe Yoashi kwa kuidamanya uhya Nyumba ya Zumbe Mnungu na ulotezi wose, zawandikwagwa mwe kitabu cha nk'humbukila cha maseuta. Amazia mwanawe andaga seuta hant'hu ha ise.