1 Ivo Abiya abanikaga na kumoselwa msanga mwo mzi wa Daudi. Mwanawe Asa andaga mkipe hant'hu ha ise, umwo Asa andaga akalongoza kwandaga na utondowazi kwa lupisi lwa miyaka mlongo. 2 Asa adamanyaga ayedi yakumwelela Zumbe Mnungu, Mnungu ywakwe. 3 Ahausaga kilingo cha watakwiza na hant'hu ha kulanga ha kuvikila milungu, ayatulaga mikola ya maiwe ya kuvikwa na kuitula mnungu akwitangwa Ashela. 4 Awalagizaga want'hu wa Yuda wamvike Zumbe Mnungu, Mnungu ywa wakale wawe na kutimila miko ne sigilizi zakwe. 5 Kwaviya ahausaga hant'hu hose ha kuvikila milungu mituhu na meza za kufunk'hizila ubani kulawa mwe mizi yose ya Yuda. Kwandaga na utondowazi mwo useuta wakwe. 6 Azengaga mizi ina magomela mwe isi Yuda umwo isi yandaga na utondowazi, kwa lupisi lwa miyaka iyo hakwandaga na nk'hondo kwaviya Zumbe Mnungu amwinkh'aga utondowazi. 7 Naye awagambaga want'hu wa Yuda, "Nekiizenge mizi kwa kuizungulusila nk'handula na minala na nk'hili na madanga ya kuvugaila. Isi ikei mwe mikono yetu, kwaviya kimzungula Zumbe Mnungu ywetu naye kakink'ha wamizi nt'hendelo zose." Ivo wazengaga niyo wabinda. 8 Seuta Asa andaga na watowani laki nt'hatu kulawa Yuda, wakanda na nk'hindo na mijungo na watowani watuhu laki mbili na alufu mnane kulawa Benjamini wakanda na nk'hindo na nyuta. Wose wandaga watowani wadahi wa nk'hondo.

9 Zela Mwisiopia aitowaga isi ya Yuda akanda na watowani milioni imwenga na magali ya nk'hondo magana matatu waitaga mpaka hant'hu hakwitangwa Malesha. 10 Asa agendaga kutowana naye. Nt'hendelo zose mbili zakepangaga mwe dikolongo dya Sefata hagihi na Malesha. 11 Asa naye alombezaga kwa Zumbe Mnungu, Mnungu ywakwe akagamba, "Weye Zumbe Mnungu hahali mtuhu enga weye, mta udahi wa kuwambiza heweina ludole naho wageke mwa wata ludole. Chambize weye Zumbe Mnungu ywetu kwaviya suwe chakuhuwila weye, na kwa zina dyako kiza kutowana na watowani wakulu. Weye Zumbe Mnungu, niwe Mnungu ywetu usekumlekela mnt'hu yeyose ahigane nawe." 12 Ivo Zumbe Mnungu awahumaga watowani wa Waisiopia hameso ha Asa na Yuda. Niyo watowani wa Waesiopia wanyilika. 13 Asa na watowani wakwe wawagulusaga mpaka Gelali niyo wawakoma Waesiopia wengi vitendese, hasigale hata yumwenga kwaviya Zumbe Mnungu hamwenga na watowani wa Yuda wawahumaga Waisiopia. Watowani wa Yuda niyo wataha vint'hu vingi. 14 Waitowaga mizi yose iyo yandaga mnk'handa ya Gelali kwaviya want'hu wendile mwe mizi iyo wengilagwa na wogofi wa Zumbe Mnungu. Watowani waguhaga ugoli mwingi kulawa mwe mizi iyo kwaviya kwandilisaga na ugoli mwingi. 15 Naho wazitowaga nk'hambi za wadimi niyo wataha ngoto nyingi na ngamia. Niyo wakeuiya Yelusalemu.