1 Muye ywa Mnungu wamwizilaga Uzia mwana Obedi, 2 naye afosaga akamhokele seuta Asa, akamgamba, "Nitegeleze weye seuta Asa na want'hu wose wa Yuda na Benjamini! Zumbe Mnungu ehamwenga nanywe, uneva nomnde hamwenga naye. Uneva mnamzungula nommuone, mna uneva mnamleke naye naawalekeni. 3 Kwa lupisi lutali Waizilaeli wandaga hawana Mnungu ywe kindedi naho wandaga hawana mlavant'hambiko ywa kuwahiniza naho wandaga hawana sigilizi. 4 Mna weze wapate makunt'ho wamuuiyaga Zumbe Mnungu, Mnungu ywa Izilaeli, wamzungulaga niyo wamwona. 5 Mwa mazua ayo hakwandaga na mnt'hu yoyose akudaha kwingila hegu kufosa kwa utondowazi kwaviya hakwandaga na utondowazi, ivo kwalailaga nk'humbizi kwa want'hu wose wa mwe isi zi mgihi. 6 Kwandaga na makunt'ho mengi isi imwenga yatowanaga na si nt'huhu, naho mzi umwenga watowanaga na mzi mtuhu, kwaviya Mnungu awagelaga mwe makunt'ho na nk'huswank'huswa zi hengi. 7 Mna nyuwe keink'heni moyo naho mtoge kwaviya nomgelekwen kwe ndima mkudamanya."

8 Asa naye eze eve ulosi uno wo ulotezi wa Uzia mwana Obedi agelagwa ludole. Ahausaga mahili yose yandaga yakaihiza mwe isi yose ya Yuda na Benjamini na kulawa mwe mizi yose iyo ahitahaga mwe isi ye vigulu va Efulaimu. Naho adamanyaga uhya kilingo cha Zumbe Mnungu iyo yandaga mwe ukumbi we nyumba ya Zumbe Mnungu.

9 Want'hu wengi wezaga kwa Asa kulawa Ifulaimu na Manase na Simioni naho wekalaga mwo useuta wakwe kwaviya waonaga kugamba Zumbe Mnungu andaga hamwenga naye. Asa awetangaga want'hu wose wa Yuda na Benjamini. 10 Wose wakeduganyaga uko Yelusalemu mwo mwezi wa katatu mwo mwaka wa mlongo na shano wo useuta wakwe Asa. 11 Mwe dizuwa idyo wamlavilaga Zumbe Mnungu nt'hambiko za ng'ombe magana mfungate na ngoto alufu mfungate kulawa mwe ziya watahaga. 12 Niyo waika ndagano kugamba nawamtimile Zumbe Mnungu, Mnungu ywa wakale wawe, kwa moyo wawe wose na kwa muye wawe wose. 13 Ivo wadya wose awekumtimila Zumbe Mnungu, Mnungu ywa Izilaeli, ande mbwanga hegu mdala, mgosi hegu mvele vaungwa wakomwe. 14 Wakelisaga kwa Zumbe Mnungu kwa izwi kulu, naho watowaga gunda na mazeze. 15 Want'hu wose wa Yuda wandilisagaga na kinyemi kwaviya wandaga wakelisa kwa moyo wose. Wamzungulaga Mnungu kwa kukombeka niyo aoneka kwawe. Zumbe Mnungu naye awenk'haga utondowazi nt'hendelo zose. 16 Seuta Asa amuusilaga weyakwe Maaka ukulu wakwe wokunda nine ywa malikia, kwaviya andaga kadamanya hili dya kuihiza dya Ashela mnungu mvele. Asa autulaga udya mkola na kuukinya na kuwoka kwa moto mwe dikolongo dya Kidiloni. 17 Mna hata ivo Asa habanange hant'hu ha kulanga ho kuvikila milungu mituhu mwe Izilaeli mna yehe agendeelaga kunda kuhuilwa kwa Mnungu mwo wikazi wakwe wose. 18 Avuzaga mwe nyumba ya Mnungu masawa na zahabu na vyombo ivo yehe na ise wandaga waviika ukuka. 19 Hakwandaga na nk'hondo naho mpaka mwo mwaka wa milongo mitatu na shano mwo useuta wakwe Asa.