1 Umwo yeze yajike ayo yose ayatendile Hezekia kwa uhuilwa, Senakelibu seuta ywa Asilia ezaga kuitowa Yuda. Ezaga na kutowa nk'hambi mwe mizi ina magomela akakawiila kugamba naaihume inde ugoli wakwe. 2 Seuta Hezekia eze aone kugamba seuta Senakelibu keza kwaajili ya kuitowa Yelusalemu, 3 alamulaga yehe hamwenga na wandima wakwe wa watowani kuyakindila mazi ye nch'hoko yendile kuse yo mzi nawo niyo wamwambiza. 4 Wawaduganyaga want'hu wengi hamwenga na kuzikindila nch'oko zose zikulawa mazi hamwenga ne vizuto vikuseleza mazi mwe isi yose, wakagamba, "Kwaajili yani maseuta wa Asilia weze na kuyabwiila mazi mengi?" 5 Hezekia adamanyaga ndima kwa kukombeka azengaga nk'handula zibogozoke naho azengaga vigela mnanga mwakwe. Nt'hendelo yo kuse azengaga nk'handula nt'huhu ya kaidi, atogezaga vibo mwo mzi wa Daudi. Naho adamanyaga vitowanilo na nk'hindo nyingi. 6 Awaikaga want'hu wose mwo mzi wa wakulu wa watowani niyo awalagiza wakeduganye mwe kiwasa kwe nk'hili yo Mzi. Aho awagelaga moyo niyo agamba, 7 "Mtoge naho mnde wadahi. Msekogoha naho msekwingila chevu hameso ha seuta Asilia hegu kwa watowani wakwe kwaviya uyo kinanaye suwe ni mkulu kujink'ha uyo ananaye yehe. 8 Yehe ana ludole lwa kimnt'hu du, mna suwe kina ludole lwa Zumbe Mnungu, Mnungu ywetu, ywa kuchambiza na kukitowanila nk'hondo yetu." Want'hu wagelagwa moyo kwa mbuli iyo awagambile Hezekia seuta ywa Yuda.

9 Akajika Senakelibu seuta ywa Asilia na mafyo yakwe ya watowani, uyo andaga kaukindila mzi wa Lakishi, awatumaga wandima wakwe Yelusalemu kwa Hezekia seuta ywa Yuda na kwa want'hu wose wa Yuda awo wendile Yelusalemu, niyo agamba, 10 "Ivi nivo akulonga Senakelibu seuta ywa Asilia, Togola mwahuwilai hata mwekala mwo mzi ukindilwe wa Yelusalemu? 11 Togola hiyo kugamba Hezekia awadant'hilizani vileke awaleke mbanike kwa sala hegu nk'hilu umwo akawagamba, ‘Zumbe Mnungu, Mnungu ywenu naawayokole mwe mikono ya seuta ywa Asilia?’ 12 Togola hiyo uyu Hezekia ahabanange hant'hu hakwe ho kuvika milungu ne vilingo vakwe na kuwalagiza want'hu wose wa Yuda na Yelusalemu akagamba, ‘Nommvike halongole he kilingo kimwenga na mnanga mwakwe nomyoke malavo yenyu?’ 13 Togola hammanyize yadya yose miye na watati zangu kiwadamanyila want'hu wose we si nt'huhu? Togola milungu ye si izo yadahaga kuwayokola want'hu we isi zawe kulawa kwangu? 14 Ni yuhi mwa iyo milungu yose ya mwe si iyo watati zangu waibanangaga, ikudaha kuwakombola want'hu wakwe kulawa mwe mikono yangu? Kwa vihi Mnungu ywenyu ivo akudaha kuwayokola kulawa mwe mkono wangu? 15 Haluse elo msekuzumila Hezekia awadant'hilize kwa ayo. Msekumhuwila mnt'hu uyu, kwaviya hakunati kulaile mnungu ywa si hegu seuta yeyose akudaha kuwayokola want'hu wakwe kulawa mwe mkono wangu hegu mkono wa watati zangu. Hegu uyo Mnungu ywenu naawayokole ivihi kulawa mwo mkono wangu!"

16 Wandima wa seuta wa Asilia walongaga mbuli nyingi ziihile mwa Zumbe Mnungu naho mwa Hezekia mndima ywakwe. 17 Seuta mwenye awandikaga baluwa ya kumhomola Zumbe Mnungu, Mnungu ywa Izilaeli, akagamba, "Enga viya ili milungu ye si nt'huhu haikudaha kuwayokola want'hu wawe kulawa mwe mkono wangu, iviya iviya Mnungu ywa Hezekia haadahe kuwayokola want'hu wakwe kulawa mwo mikono yangu." 18 Niyo wawetanga kwa Kiebulania want'hu wa Yelusalemu awo wendile he lukandula vileke wawatise na kugoha vileke wadahe kuutaha mzi. 19 Walongaga mwa Mnungu ywa Yelusalemu enga viya walongaga mwa milungu ya si nt'huhu ya mwe isi iyo yadamanyagwa kwa mikono ya want'hu. 20 Seuta Hezekia na mlotezi Isaya mwana Amozi wamlombezaga Mnungu kwa kuila vileke awambize kwaajili ya mbuli izi. 21 Naye Zumbe Mnungu amtumaga mtumigwa ywa kwe mbingu naye niyo aita na kuwakoma wadya watowani na vilongozi na watowani wakulu mwe nk'hambi ya seuta ywa Asilia. Ivo seuta ywa Asilia auyaga mwe isi yakwe mwenye uku akanda na soni. Naye umwo eze aite mwe nyumba ya mnungu ywakwe, awo wanawe mwenye wamkomaga aaho ne dibamba. 22 Ivo Zumbe Mnungu amyokolaga seuta Hezekia na want'hu wa Yelusalemu kulawa mwo mkono wa Senakelibu seuta ywa Asilia na kulawa mwo mkono wa wank'hondo wakwe wose. Awenk'haga wikazi wa utondowazi na wambuyaze wose. 23 Want'hu wengi wamwigailaga Zumbe Mnungu malavo uko Yelusalemu naho wamwigailaga Hezekia seuta ywa Yuda mageleko ya yombe. Kukongela aho Hezekia atunyagwa vitendese na si zose.

24 Umwo Hezekia alumisagwa hagihi na kubanika. Amlombezaga Zumbe Mnungu naye amwihitulaga na kumwink'ha kilagiso kugamba naahone. 25 Mna Hezekia hamlaviile nt'hogola Zumbe Mnungu kwa yadya yose amtendele kwaviya akefenyaga mwo moyo wakwe, ino yegalaga makunt'ho mwa Yuda na Yelusalemu. 26 Niho Hezekia akeselezaga kwaajili yo umoyo wakwe, enga ivo watendile want'hu wa Yelusalemu, ivo maya ya Zumbe Mnungu hayezile mwa awo umwo Hezekia andaga akei mgima.

27 Hezekia andaga na ugoli mwingi vitendese na nt'hunyo, naye akedamanyilaga kindolo kwaajili ya masawa yakwe na zahabu na kwaajili ya vint'hu vakwe va yombe na vint'hu va kwambikila na nk'hindo zi hengi za vyombo va yombe. 28 Azengaga magulu ya kuikila nk'hande na divai na mavuta ye zeituni naho adamanyaga madewa kwaajili ya ng'ombe na madewa matuhu kwaajili ya mbuzi na ngoto. 29 Iviya iviya akezengelaga mizi kwaajili yakwe mwenye, naho nakanda na mafyo mengi ya ng'ombe na ngoto kwaviya Zumbe Mnungu amwink'haga ugoli mwingi. 30 Seuta Hezekia niye ayakindilaga mazi ye n'choko ya Gihoni, niyo ayasimbila mkologombe na kuyombosa kwa hasi kuita mwe nt'hendelo ya usweelo wa zuwa wo mzi wa Daudi. Kila kint'hu icho adamanye niyo chanda chedi. 31 Mna umwo wegala ulosi wasigilagwa na vilongozi wa Babeli wamuuze mwa kilagiso icho kilaile mwe isi, Zumbe Mnungu amlekaga mwenye vileke amhime na kumanya kila kint'hu icho ki mwo moyo wakwe.

32 Udamanyi mtuhu wa seuta Hezekia na yadya ayedi adamanye yawandikwa mwe maona ya mlotezi Isaya mwana Amozi mwe kitabu cha Maseuta ywa Yuda na Izilaeli. 33 Hezekia abanikaga na kumoselwa msanga mwe vikuta va maseuta. Want'hu wose wa Yuda na wakaya wa Yelusalemu walavaga ndamsa zo uheelo umwo mwe file yakwe, naye Manase mwanawe andaga seuta hant'hu ha ise.