1 Useuta wa Yehobohamu nounda utoga na kunda na ludole, yehe hamwenga na want'hu wakwe wose walekaga kutimila miko ya Zumbe Mnungu. 2 Kwaviya wandaga hiyo wahuhilwa kwa Zumbe Mnungu, Shishaki seuta ywa Misili aitowaga Yelusalemu mwo mwaka wa shano wa kwikaila kwa seuta Lehobohamu. 3 Akanda na magali alufu imwenga na magana maidi ya falasi na wakugendeza falasi alufu milongo mtandatu na watowani wengi hewekuwazika wakulawa Misili, Libia na Sukii na Waisiopia. 4 Aitahaga mizi ya Yuda ina magomela, abulaga mpaka Yelusalemu. 5 Niho mlotezi Shemaya aita kwa seuta Lehoboamu na wakulu wa Yuda awo wandaga wakeduganya uko Yelusalemu kwajili ya kumnyilika Shishaki, naye niyo amgamba, "Ivi ivo akulonga Zumbe Mnugu, ‘Nyuwe mnileka miye, kwaivo miye name himlekela Shishaki awatoweni.’"

6 Niho wakulu wa Izilaeli na seuta wakeseleza mwe mioyo yawe niyo wagamba, "Icho akitendile Zumbe Mnungu ni chedi."

7 "Zumbe Mnungu eze aone kugamba wakeseleza mwe mioyo yawe, alongaga naho na mlotezi Shemaya, akagamba, kwaviya wazumila masa yawe, heniwabanange, mna nenisunguze kuwayokolea. Kwa maya yangu henimlekele Shishaki aibanange Yelusalemu. 8 Mna nawamdamanyile ndima vileke wamanye uwedi wa kunidamanyila miye ndima na uwihi wa kuwadamanyila maseuta wa mwe isi ndima." 9 Ivo seuta Shishaki wa Misili aitowaga Yelusalemu, aguhaga kindolo chose che Nyumba ya Zumbe Mnungu na nyumba ye kiseuta hamwenga ne nk'hindo za zahabu izo azidamanye seuta Selemani. 10 Ivo seuta Lehobohamu adamanyaga nk'hindo za shaba kuleka ziya za zahabu nakuziika kwa wamizi wakwamila zink'hili ze dizumba dye kiseuta. 11 Kila lupisi seuta umwo aitaga mwe nyumba ya Zumbe Mnungu, wamizi waitaga hamwenga naye wakanda wazinula zink'hindo izo, akajika naho wazivuzaga kwe chumba cho wamizi. 12 Kwaviya Lehobohamu akeselezaga kwa Zumbe, Zumbe Mnungu naye hamuonelaga maya, ivo hambanange pele. Naho kwandaga na utondowazi mwe isi ya Yuda.

13 Ivo seuta Lehoboamu akeikaga lumwe mwe isi ya Yelusalemu, ailongozaga Yuda. Andaga na miyaka milongo mine na imwenga umwo akakonga kwikaila Yuda. Naye alongozaga kwa lupisi lwa miyaka mlongo na mfungate uko Yelusalemu mzi uwo Zumbe Mnungu ausagulaga mwe makabila yose ya Izilaeli avikwe umo. Nine dya Lehoboamu etangagwa Naama kulawa kwo mzi wa Amoni. 14 Lehoboamu adamanyaga wiihi, kwaviya moyo wakwe walekaga kumdaayila ndima Zumbe Mnungu.

15 Udamanyi wose wa seuta Lehoboamu wa nk'hongo mpaka kwo uheelo, yawandikwa mwe kitabu cha kukumbukila cha mlotezi Shemaya na kitabu cha kukumbukila cha Ido mlotezi. Mwo lupisi ulo lwose kwandaga na nk'hondo kila lupisi mwa Lehoboamu na Yeloboamu. 16 Ivo Lehoboamu abanikaga na kumoselwa msanga mwo mzi wa Daudi. Naye Abiya mwanawe andaga mkipe wo useuta wakwe.