1 Uneva mwe mbuli ino, Wamoabu na Waamoni hamwenga na Wameuni wezaga vileke watowane nk'hondo na Yehoshafati seuta ywa Yuda. 2 Want'hu wezaga kumgambila Yehoshafati, "Fyo kulu dya watowani kulawa Edomu, ng'ambu ye Bahali yo Munyu. Wakeika lumwe kuutaha Hasasoni Tamali." Iyo ikwitangwa Engedi. 3 Yehoshafati ogohaga, amlombezaga Zumbe Mnungu amlongoze. Abwelekezaga want'hu wose mwe isi ya Yuda wafunge. 4 Want'hu wezaga Yelusalemu kulawa mizi yose ya Yuda, Wakeduganyaga vileke wamlombeze Zumbe Mnungu awambize. 5 Yehoshafati akimalaga mwo mdugano wa want'hu wa Yuda na Yelusalemu halongole ho uwa mhya wa nyumba ya Zumbe Mnungu. 6 Alombezaga kwa izwi niyo agamba, "Weye Zumbe Mnungu, Mnungu ywa wakale wetu, Kulawa kwe mbingu walongoza seuta zose za mwe isi. Una udahi na ludole naho hahana akudaha kuhigana na weye. 7 Weye niwe Mnungu ywetu, wawagulusaga wakaya we isi ino umwo want'hu wako Izilaeli wengilaga mwe isi ino wawenk'haga welekwa wa Ibulahimu mbuyayo inde yawe ulo na ulo. 8 Nawo wekalaga umo nakukuzengela hant'hu hakukile kwaajili ya kukuvika wakamanya kugamba, 9 uneva makunt'ho yanawezila hegu nk'hondo hegu manyonge yaihile hegu gumbo, naweze niyo wakimala he nyumba ino ahako, wakwiile mwo lupisi lwa makunt'ho yawe, nawe nouwategeleze na kuwayokola.

10 "Mna haluse want'hu awa kulawa Amoni na Moabu na mnima Seili, awo huwalekele wakale wetu waitowe mizi yawe umwo wakalawa Misili, ivo wakale wetu wombokaga kunk'handa vileke wase kuwakoma. 11 Kaula ivo wakukiliha! Woho weza kukilava mwe isi yako iyo ukink'hile inde ukipe wetu. 12 Weye niwe Mnungu ywetu, togola houwasengele? Kwaviya suwe hakina udahi wowose wa kutowana nk'hondo na fyo kulu enga idi dikukizila. Suwe hakimanya dyo kudamanya mna chakawiila wambizi kulawa kwako."

13 Wagosi wose wa Yuda hamwenga na wavele wawe na wana wawe wandaga wakimala aho ha Zumbe Mnungu. 14 Niho Muye ywa Zumbe Mnungu amwizilaga yumwenga wa Walawi andile aho, zina dyakwe Yehazieli mwana Zekalia, mwana Benaya, mwana Yeieli, mwana Matania, ywa lukolo lwa Asafu 15 Yahazieli niyo agamba, "Tegelezeni nyuwe want'hu wa Yuda na nyuwe mkwikala Yelusalemu nawe seuta Yehoshafati, Zumbe Mnungu awagamba ivi. Msekogoha naho msekwingila chevu kwaajili yo ukulu we difyo idi. Nk'hondo ino hiyo yenyu mna ya Mnungu. 16 Luvi seleni mkatowane nawo umwo waneza kukwela Kolongo dya Sisi, nanywe nomnde mwe uheelo we dikolongo, mwe dijangwa dya Yelueli. 17 Homuungigwe kutowana nk'hondo ino. Nyuwe mkepange, kimaleni mtoge nomuone ivo Zumbe akuunga kuwayokolani. Nyuwe Yuda na Yelusalemu msekogoha naho msekwingila chevu. Iteni kwe nk'hondo, Zumbe Mnungu naye naande hamwenga na nyuwe!"

18 Aho seuta Yehoshafati afunamizaga mtwi wakwempaka hasi hamwenga na want'hu wose wa Yuda na wadya wakwikala Yelusalemu awo nawo wafunamizaga mitwi yawe mpaka hasi kwa kumvika Zumbe Mnungu. 19 Walawi wo lukolo lwa Kohati na Kola, wakimalaga na kumtunya Zumbe Mnungu, Mnungu ywa Izilaeli kwa izwi kulu. 20 Mtondotondo kwize kuche wahalawaga kuhinga kwe dijangwa hagihi na Tekoa. Weze wakonge utafi, Yehoshafati akimalaga niyo agamba, "Nitegelezeni nyuwe Yuda na nyuwe want'hu wa Yelusalemu! Mhuwieni Zumbe Mnungu, Mnungu ywenyu nanywe nomnde mtoga. Muwahuwile walotezi wakwe, nanywe nomnde wahumi." 21 Umwo eze ibinde kulangilizana na want'hu, Yehoshafati asagulaga want'hu wakeme na kumtunya Zumbe Mnungu kwajili yo uwedi wakwe, umwo wakalonga he difyo wagambaga, "Mgambeni Zumbe Mnungu nivedi kwaviya lukunde lwakwe ni lwa ulo na ulo!"

22 Umwo weze wakonge kukema na kutunya, Zumbe Mnungu awaikaga wadya wakunyatila mwa Amoni na Moabu na wadya wo mnima Seili uko wandaga wakatowana na Yuda nawo niyo wahumwa. 23 Want'hu wa Amoni na Wamoabu wawatowaga wanth'u wakwikala kwo mnima wa Seili na kuwabananga pele. Umwo weze wawabanange wakaya wo mnima Seili wakongaga kutowana woho wenye niyo wakomana pele. 24 Watowani wa Yuda weze wabule ho mnala uko kwedijangwa wakaulaga uko weli wank'hondo wawe niyo waona vimba venela kila hant'hu. Hahana mnt'hu yeyose ahonile.

25 Yehoshafati na watowani wakwe wagenda kuguha vitahigwa, uko waguhaga ng'ombe nyingi na vint'hu na ugoli mwingi na suke na vint'hu va yombe kulu. Yaguhaga lupisi lwa mazuwa matatu mwo kuduganya vint'hu ivo mna hawadahaga kuviguha vose kwaviya vandilisaga vingi. 26 Zuwa dya kane waduganaga mwe Dikolongo dya Nt'hogola niyo wamtogola Zumbe Mnungu kwa yose awadamanyile. Nuko kugamba kolongo idyo dyetangwa Kolongo dya Nt'hogola mpaka ivi dielo. 27 Yehoshafati niyo awalongoza watowani wakwe mpaka Yelusalemu kwa kinyemi, kwaviya Zumbe Mnungu awahumaga wank'hondo wawe. 28 Weze wabule Yelusalemu, waitaga kwe nyumba ya Zumbe Mnungu niyo watowa vinanda na mazeze na magunda. 29 Wogohi wa Mnungu wengilaga mwo useuta wose wa mwe isi umwo weze weve kugamba Zumbe Mnungu awatendelega kwa kuwahuma wank'hondo wa Izilaeli. 30 Ivo Yehoshafati alongozaga kwa utondowazi kwaviya Mnungu amwink'haga wamizi nt'hendelo zose.

31 Yehoshafati andaga na miyaka milongo mitatu na shano umwo eze akonge kwikaila Yuda. Alongozaga kulawa Yelusalemu kwa lupisi lwa miyaka milongo miidi na shano. Nine etangagwa Azuba mwanakike ywa Shilihi. 32 Atendaga ayedi ha Zumbe Mnungu enga ivo atendaga ise Asa. 33 Mna habanange kila hant'hu henuke ha kuvikila milungu. Want'hu wandaga wakei kumhitukila na kumvika Mnungu ywa wakale wawe kwa mioyo yawe yose.

34 Mbuli nt'huhu za Yehoshafati, kukongela aho akongaga useuta mpaka uheelo wo useuta wakwe, yawandikwa mwe kitabu cho kukumbukila cha Yehu mwana Hanani izo zi mwe kitabu cha kukumbukila cha maseuta wa Izilaeli.

35 Yehoshafati seuta ywa Yuda akelungaga na Ahazia seuta ywa Izilaeli, adamanyaga mbuli ziihile. 36 Wandaga hamwenga mwo kudamanya meli nyingi zo uchuuzi, nazo zadamayagwa uko Esioni Gebeli. 37 Mna Elizeli mwana Dodavahu kulawa mzi wa Melesha alavaga uwona mwa Yehoshafati, niyo agamba, "Kwaviya kukelunga na Ahazia, Zumbe Mnungu naazibanange ndima zako." Meli Zabogozokaga naho hazadahaga kutamba.