1 Seuta Selemani alagizaga kuizenga nyumba ya Mnungu aho Zumbe Mnungu naavikwe na kukezengela nyumba ya kiseuta kwaajili yakwe mwenye. 2 Awaikaga wagosi alufu milongo mfungate wande wakwinula nt'wika na wagosi alufu milongo mnane wande wakusongola maiwe mwe vigulu na wagosi watuhu alufu nt'hatu na magana mtandatu wande wakimalizi wawe.

3 Selemani atumaga ulosi kwa Hilamu seuta ywa Tilo niyo amgamba, "Unitendele name enga ivo umtendele tate Daudi, umwo wamwigailaga mielezi yo kuzengela nyumba ye kiseuta. 4 Haluse nihagihi kukonga kuzenga nyumba ya kumvika Zumbe Mnungu, Mnungu ywangu. Neni iike kwa kumvika Zumbe, nayo neinde hant'hu ha kokela ubani wa mhep'he wedi, na hant'hu mikate ikukile ikuikwa hakwe mazuwa yose, na hant'hu ha kulavila malavo yo kokwa kila zuwa mtondo na kisingi naho mwe dizuwa dyo Kuhumula na mwo kuwandama umwezi, ne mazuwa matuhu ye kinyemi ya Zumbe Mnungu, Mnungu ywetu enga ivo asigiile Izilaeli ulo na ulo. 5 Nyumba ya Mnungu iyo huunga niizenge neinde nk'hulu kwaviya Mnungu ywetu ni mkulu kujink'ha milungu yose. 6 Mna ni ani akudaha kumzengela Mnungu Nyumba ikanda mbingu zose hazikumkint'ha? Haluse ni miye ani nidahe kumzengela Zumbe nyumba? Mna neinde du hant'hu ha kulavila malavo ya kokwa ho undiilo wakwe. 7 Ivo elo nigaile mnt'hu amanyize kudamanya vyombo va zahabu na masawa na shaba na kilama na suke za zambalau na ink'hundu na buluu, naho akudaha kuhamba vedi. Mwe ndima iyo yehe naadamanye akanda hamwenga na mafundi awo chandanye mwe Yuda na Yelusalemu awo wasagulwe ni tate Daudi. 8 Naho nigaile mielezi na mibeloshi na misane kulawa Lebanoni kwaviya himanya kugamba want'hu wako wadaha kukant'ha zimbao uko Lebanoni. Want'hu wangu nawadamanye ndima hamwenga na want'hu wako, 9 vileke wanituile mbao nyingi kwaviya nyumba ya Mnungu huunga niizenge yaungwa inde nk'hulu naho ya kwehelwa. 10 Neniwenk'he wandima wako awo wakutula zimbao tani alufu milongo miidi za ngano isagigwe na tani alufu milongo miidi za shayili na lita laki nne za divai na lita laki nne za mavuta ye zeituni."

11 Naye Hilamu seuta ywa Tilo niyo amhitula Selemani kwa kumwandikila, "Kwaviya Zumbe Mnungu awaunga want'hu wakwe kakutenda weye unde seuta ywawe. 12 Naho Hilamu agendeelaga akagamba, Atogolwe Zumbe Mnungu, Mnungu ywa Izilaeli uyo aumbile mbingu ne isi! Kamwink'ha seuta Daudi mwana kilume mta mzungu na umanyi na ubala uyo akuunga amzengele Zumbe Mnungu nyum I'm I'mba nk'hulu ya kuvikila na nyumba ya kiseuta kwaajili yakwe mwenye. 13 Miye nohwigaile Hilamu Abi mnt'hu mmanyi ywedi, 14 uyo nine alawaga mwe dikabila dya Dani ise naye alalawaga Tilo. Yehe ni mmanyi ywa kudamanya vint'hu na ndima zose za zahabu na masawa na shaba na vilama na maiwe na zimbao hamwenga na kufuma. Ni mmanyi mwe kugela langi ya zambalau na buluu na ink'hundu na suke zedi. Yehe ni mmanyi mwe vint'hu vose naho adaha kukihamba kila kint'hu. Naadamanye ndima na mafundi wako na wadya wo mkulu ywangu Daudi uyo iso. 15 Haluse elo zumbe ywangu naawegaile wandima wakwe ngano na shayili na mavuta ya zeituni na divai enga ivo alongile, 16 naswe nekitule mbao enga ivo uungile kulawa Lebanoni suwe nekizinyinye kwa hamwenga na kuziika mwe bahali mnanga mwa mazi zikayeya mpaka Yafa. Akajika noudahe kuziguha mpaka Yelusalemu."

17 Seuta Selemani niyo alagiza wawazigwe wata kwiza wose awo wendile mwe Izilaeli, wawazagwa enga viya atendile ise Daudi, watakwiza awo wandaga laki imwenga alufu shano na nt'hatu na magana mtandatu. 18 Awaikaga watakwiza want'hu alufu mlongo mfungate wo kwinula nt'hanu na want'hu alufu milongo mnane wa kusongola maiwe mwe vigulu na want'hu alufu nt'hatu na magana mtandatu wo kukimaila want'hu wakudamanya ndima.