1 Want'hu wa Yelusalemu wamwink'haga Ahazia mwana mdodo ywa Yeholamu kunda mkipe hant'hu ha ise, kwaviya wakuluze wose wakomagwa na fyo dya want'hu awo wezile mwe nk'hambi hamwenga na Waalabu. Ivo Ahazia mwana Yeholamu seuta ywa Yuda niyo anda seuta. 2 Ahazia akongaga kwikaila akanda na miyaka milongo miidi na miidi, alongozaga kulawa Yelusalemu kwa lupisi lwa mwaka umwenga. Nine etangagwa Atalia mwezukuluwe dya Omli. 3 Kwaviya nine andaga mlangilizi mwo kudamanya yaihile, yehe naye atimilaga miliganyizo wa wandugu wa Ahabu. 4 Adamanyaga wavu ha Zumbe Mnungu kwaviya ise eze abanike wandugu watuhu wa seuta Ahabu wandaga walangilizi wake, ivo wamlongozaga kudamanya yaihile. 5 Atimilaga fanyanyi zawe aite hamwenga na seuta Yeholamu mwana Ahabu seuta ywa Izilaeli akatowane na Hazaeli seuta ywa Shamu uko Lamoti Gileadi. Nawo Washamu wamlumizaga Yolamu. 6 Ivo auyaga Yezileeli vileke akahoneze zink'wenge zakwe izo apatile uko Lama, umwo eze atowane na Hazaeli seuta ywa Shamu. Naye Ahazia mwana Yeholamu seuta ywa Yuda agendaga kumtalamkila Yolamu mwana Ahabu uko Yezileeli kwaviya andaga mnyonge. 7 Mnungu andaga kalagiza kugamba, ubanangi umpate Ahazia umwo anagenda kumuona Yolamu. Ahazia eze abule, wafosaga hamwenga na Yolamu vileke wakabwilane na Yehu mwana Nimshi uyo asagulwagwa ni Zumbe vileke aibanange nyumba ya Ahabu. 8 Umwo Yehu akaisogeela nyumba ya Ahabu abwilanaga na wakulu wa Yuda hamwenga na wana wa wanduguze wa Ahazia awo wadamanyilaga ndima Ahazia naye niyo awakoma. 9 Amtimilaga Ahazia, naye niyo agwilwa akanda kakefisa uko Samalia. Wamletaga mpaka kwa Yehu niyo akomigwa. Wammosaga kimba chakwe kwaviya walongaga, Yehu ni mwezukuluwe dya Yehoshafati uyo amzungulaga Zumbe Mnungu kwa moyo wakwe wose.

Hasigale hata yumwenga mwe nyumba ya Ahazia uyo akudaha kunda seuta.

10 Atalia nine dya Ahazia eze aone kugamba mwanawe kakomigwa, ahalawaga niyo agenda kuwakoma welekwa wose wa kiseuta wa nyumba ya Yuda. 11 Mna Yehosheba mwanakike ywa seuta Yeholamu amguhaga Yoashi, kwa kinyele kulawa mwa wana seuta awo wandaga hagihi na kukomigwa. Amfisaga yehe hamwenga na mwelesi wakwe mwe chumba cho kugona mwe nyumba ya Mnungu. Ivo Yehosheba mwanakike ywa seuta Yeholamu mkaza mlavant'hambiko Yehoadani kwaviya andaga lumbudye Ahazia, amfisaga Yoashi vileke Atalia asekumkoma. 12 Naye ekalaga kwa lupisi lwa miyaka mtandatu akanda kakefisa kundani kwe chumba icho mwe nyumba ya Mnungu umwo Atalia akanda akalongoza isi akanda malikia.