1 Mwo mwaka wa mfungate Yehoyada alagisaga udahi, adamanyaga ndagano na wakulu wakwe. Uzia mwana Yeholamu na Ishumaeli mwana Yehohanani na Uzia mwana Obedi na Maaseya mwana Adaya na Elishafati mwana Zikili. 2 Wazungulukaga mwe mizi yose ya Yuda na kuwaduganya Walawi na vilongozi wa makabila ye zimp'huga za Izilaeli, niyo waita mpaka Yelusalemu.

3 Mdugano wose waikaga ndagano na seuta mwe nyumba ya Mnungu. Yehoyada niyo awagamba, "Mkauleni mwana uyu ywa seuta niye akuunga ande seuta viligane na ivo Zumbe Mnungu na welekwa wa Daudi. 4 Ivi nivo mkuunga mdamanye: Imwenga ya nt'hatu ya walavant'hambiko na Walawi awo nawande mwo wamizi mwe dizuwa dyo Kuhumula nawamile nk'hili, 5 imwenga ya nt'hatu nawamile zumba dya kiseuta, imwenga ya nt'hatu int'huhu nawamile Nk'hili ya Nk'hongelo. Want'hu wose nawande ho lwazo lwe nyumba ya Zumbe Mnungu. 6 Hokunde na mnt'hu yeyose naazumilwe kwingila mwe nyumba ya Mnungu mna ni walavant'hambiko na Walawi awo nawande mwo luzo lwa kumdamanyila Zumbe Mnungu. Woho wadaha kwingila kwaviya wakuka mna wadya want'hu watuhu wose nawatimile sigilizi ya Zumbe Mnungu na kusigala kuse. 7 Walawi nawamzunguluke seuta, kila mnt'hu akanda ne kitowanilo chakwe mwo mkono. Mnt'hu yeyose anageza kwingila mwe nyumba ya Zumbe Mnungu naakomigwe. Ikaleni hagihi na seuta hohose aho akuita." 8 Walawi na want'hu wose wa Yuda wadamanyaga enga ivo mlavant'hambiko Yehoyada alagize. Kila yumwenga aguhaga want'hu wakwe wadya wandile wakaita kwo luzo lwo kudamanya ndima mwe Dizuwa dyo Kuhumula na wadya wandaga wakalawa mwo luzo lwo kudamanya ndima, kwaviya mlavant'hambiko Yehoyada haungile wahalawe. 9 Niho mlavant'hambiko Yehoyada naye awenk'haga wakulu wa mafyo ya watowani magana gana awo mijungo ne zink'hindo nk'hulu na ndodo zandaga za seuta Daudi, izo zaikwagwa kwe Nyumba ya Mnungu. 10 Ivo awapangaga want'hu wose kukongela nt'hendelo ya kwa mwenye mzi mpaka nt'hendelo ya mkoma mahanya ye nyumba na kuzunguluka kilingo ne nyumba, kila yumwenga akanda na kitowanilo chakwe mwo mkono vileke amwamile seuta. 11 Akajika, Yehoyada amlavaga kuse Yoashi uyo mwana seuta, niyo wamvala nk'hofia ye kiseuta niyo amwink'ha kitabu che miko ya Mnungu na kumtambula kugamba yehe niye seuta. Want'hu watowaga magasa na kwanga wakagamba, "Seuta unde na wikazi mtali!" 12 Malikia Atalia naye eze eve want'hu wakagutiila kwa kinyemi na kwanga kwa kumtunya seuta, awatimilaga want'hu awo kwe Nyumba ya Zumbe. 13 Malikia eze asungiile amuonaga seuta mhya akimaala hagihi no mkola ho mwingiilo we Nyumba. Azungulukagwa ni wamizi na watowa magunda, naho want'hu wose wandaga wakanga kwa kinyemi na kutowa magunda yawe. Aho malikia Atalia alwebulaga divalo dyakwe kwa kinyulu akagamba, "Kusaguka uku, Kusaguka uku!" 14 Niyo mlavant'hambiko Yehoyada awatumaga wadya wakulu wa watowani, "Mlaveni kuse mgatigati mwa watowani naho mkomeni yeyose akuunga amwambize." Alongaga ivo kwaviya mlavant'hambiko a onaga hiyo vedi akomelwe mwe Nyumba ya Mnungu. 15 Ivo wamgwilaga na kumwombosela mwe sila ikombokela zifalasi kwe nyumba ye kiseuta niyo wamkomela uuko.

16 Niyo Yehoyada aikaga ndagano mwa yehe na want'hu wose na seuta kugamba nawande want'hu wa Zumbe Mnungu. 17 Want'hu niyo waita kwe nyumba ya milungu ya Baali niyo waimola na kumola kilingo chakwe cho mviko hamwenga na mahili yakwe. Naho niyo wamkoma Matani mlava nt'hambiko ywa Baali aaho he kilingo cho kulavila nt'hambiko. 18 Mlavant'hambiko Yehoyada aikaga walavant'hambiko na Walawi wakimaile ndima zose za mwe Nyumba ya Zumbe Mnungu. Wadamanyaga ndima yawe enga ivo wasiigilwagwa ni seuta Daudi, niyo wamlavila Zumbe Mnungu malavo ya kokwa enga ivo iwandikwe mwe zisigilizi za Musa. Naho wandaga wakakema na kwanga. 19 Yehoiada aikaga wamizi he nk'hili ye Nyumba ya Zumbe Mnungu vileke mnt'hu yeyose msavu ase kwingila. 20 Niho awaguhaga wakulu wa watowani magana gana, na wamizi na want'hu wose we isi. Wamselezaga seuta kulawa kwe Nyumba ya Zumbe Mnungu niyo wamwigala kwe nyumba ye kiseuta, niyo engila mwe nyumba ya kiseuta na seuta niyo ekala mwe difumbi dyakwe dyo useuta. 21 Want'hu wose wandaga na kinyemi, mzi niyo watondowala, kwaviya Atalia akomagwa kwa sime.