1 Ivo want'hu wose wa Yuda wamguhaga Uzia mwanawe Amazia akanda na miyaka mlongo na mtandatu, na kumtenda mkipe hant'hu ha ise. 2 Akajika umwo ise eze abanike autahaga mzi wa Elati na kuuzenga uhya na kuuvuza mwo useuta wa Yuda. 3 Uzia akongaga kwikaila akanda na miyaka mlongo na mtandatu, alongozaga kwa lupisi lwa miyaka milongo mishano na miidi uko Yelusalemu. Nine etangagwa Yekolia ywa Yelusalemu. 4 Adamanyaga mbuli zikumwelela Zumbe Mnungu enga ivo atendaga ise Uzia. 5 Amdamanyilaga ndima Zumbe Mnungu kwa uhuilwa enga ivo ahinizwagwa ni Zekalia umwo andaga mgima, naho kwaviya amdamanyilaga ndima Zumbe Mnungu, Mnungu amvikilaga. 6 Uzia ahalawaga na kugenda kutowana nk'hondo mwa Wafilisiti, amolaga nk'handula ze mizi ya Gati na Yebine na Ashidodi. Azengaga uhya mizi ihagihi na Ashidodi na hant'hu hatuhu mwe isi ya Wafilisiti. 7 Mnungu amwambizaga kuwahuma Wafilisiti na Waalabu wakwikala Gulibaali na Wameuni. 8 Waamoni wamlihaga Uzia kodi niyo atogolweswa mpaka Misili kwaviya apataga ludole vitendese. 9 Naho Uzia azengaga vigela uko Yelusalemu mwe nk'hili ya hank'handa na nk'hili ya kwe Dikolongo, naho mwe mp'hembe yo lukandula na kuzitenda zitoge. 10 Naho hata mwe nyika azengaga vigela, niyo asimba masima mengi, kwaviya andaga na mifugwa mingi hasi ye vigulu na mwe zint'hindiga. Andaga na want'hu wakudamanya ndima mwe nk'honde zakwe za mizabibu uko kwe vigulu naho isi yo ulozo, kwaviya aungisaga kulima. 11 Hamwenga na ayo Uzia andaga na watowani wakeikaga lumwe kwaajili ya kuita kwe nk'hondo. Wakepangaga mwe vifyo vihengi. Ludongo lwawe lwawandikwagwa ni Yeieli na Maaseya, wose wandaga mwo useuta wa Hanania yumwenga ywa wakulu wa watowani wa seuta. 12 Uwazilo we vilongozi wose wa watowani, wandaga alufu milongo miidi na magana mtandatu. 13 Hasi ya useuta wawe kwandaga na watowani laki nt'hatu alufu mfungate na magana mashano wandile ne udahi kutoana na wank'hondo kwajili ya seuta. 14 Uzia awenk'haga watowani nk'hindo na mijungo na nk'hofia za kilama na valo na kink'hondo dya kwamila kifua, nyuta na misale na maiwe ya nk'humbaiwe. 15 Wamanyi wakwe wakulu wa uko Yelusalemu wadamanyaga vint'hu va kuduila misale na maiwe makulu kulawa mwe vigela na mwe zint'huzi zo lukazi lwe mizi. Niyo atogolweswa kila hant'hu naho andilisaga na ludole kwaviya Mnungu amwambizaga.

16 Mna aho seuta Uzia eze andilise na ludole weduvi wakwe wamtendaga ahumwe. Asagukaga kwa Zumbe Mnungu , Mnungu ywakwe kwa kwingila kwe Nyumba ya Mnungu akakawiila kufunk'hiza ubani he kilingo. 17 Mna mlavant'hambiko Uzia hamwenga na walavant'hambiko watuhu milongo mnane wamtimilaga seuta, 18 na kumkindila. Wamgambaga, "Hiyo uwagilwa kwako, Uzia kumfunk'hizila Zumbe Mnungu ubani. Ino ni ndima ya walavant'hambiko welekwa wa Haluni awo waikwe kwa ndima ya Zumbe Mnungu vileke wafunk'hize ubani. Halawe aha hant'hu hakukile kwaviya kuswesa uhuilwa kwa Zumbe Mnungu, nawe houpate nt'hunyo kulawa kwakwe." 19 Mwo lupisi ulo, Uzia andaga kakimala he Nyumba ya Mnungu hagihi ne kilingo, katozeleza chetezo cho kufunk'hizila ubani mwo mkono. Awaihiyaga walavant'hambiko umwo eze atende ivo, atozagwa na unyonge wa matana mwe futa yakwe aaho ha walavant'hambiko awo. 20 Uzia mlavant'hambiko mkulu na wadya walavant'hambiko watuhu, wamkaulaga niyo wamlava kuse, hata yehe mwenye asunguzaga kulawa kwaviya Zumbe Mnungu andaga kamtowa. 21 Seuta Uzia andaga na unyonge wa matana mpaka mazuwa ya kubanika kwakwe. Aikagwa mwe nyumba yakwe ekedu, kwaviya hazumilwe naho kwingila mwe nyumba ya Zumbe Mnungu. Yotamu mwanawe naye akanda mkimalizi we nyumba ya kiseuta naho awalongozaga want'hu we isi. 22 Udamanyi mtuhu wose wa seuta Uzia kulawa nk'hongo mpaka uheelo wo useuta wakwe, yawandikwa na mlotezi Isaya mwana Amozi. 23 Uzia abanikaga na kumoselwa msanga hagihi ne vikuta va kiseuta, kwaviya wagambaga, "Yehe ana unyonge wa matana" Yotamu mwanawe naye andaga seuta hant'hu ha ise.