1 Lehoboamu aitaga Shekemu uko Waizilaeli wose wandaga wakeduganya vileke wamtende yehe kunda seuta. 2 Naye Yelobohamu mwana Nabati eze eve mbuli izo andaga akei Misili umwo aitaga akamnyilika Selemani, auyaga kulawa Misili. 3 Ivo makabila ya kasikazini yatumaga want'hu wamwitange Yehoboamu, yehe na mduganyo wose wa Izilaeli waitaga kwa Lehoboamu na kumgamba, 4 "Iso kakitwika nt'wika izamile haluse kihunguile nt'wika iyo naswe nekikudamanyile ndima." 5 Lehoboamu niyo awahitula, "Iteni kwa lupisi lwa mazuwa matatu akajika mniuiye." Ivo want'hu niyo wakeitila. 6 Naho seuta Lehoboamu aungaga amanye ulangilizi wa wakale awo wandaga walangilizi wa ise Selemani umwo andaga akei mgima, niyo awauza, "Togola mwafanyanya niwenk'he uhituzi wani want'hu awa?" 7 Niyo wamhitula, "Unaunga kunda ywedi mwa want'hu awa, na kuwabwedeza niyo wawagambila ulosi wedi, aho nawande wandima wako mazuwa yose."

8 Mna Lehoboamu alemelaga fanyanyi izo enk'higwe ni wadala mna yehe nakalangilizana na wabwanga we dilika dyakwe wandaga walangilizi wakwe. 9 Niyo awauza, "Nyuwe mwalava ulangilizi wani vileke niwenk'he uhituzi want'hu awa wanigambile niitende nt'hwika inde ihuha iyo tate awatwikaga?"

10 Wadya wabwanga niyo wamhitula, "Want'hu awo wakugambile, iso kakitwink'ha nt'wika izamile mna weye itende kunda haizamile weye wagambe, ‘Kadole kangu ke nyonk'wa kanene kujink'ha kigudi cha tate.’ 11 ‘Tate awatwikaga nt'wika izamile, mna miye neniuitende inde uzamisa. Tate nakawatowani kwa ngoda mna miye neniwatowe kwa mikotya ina miwa!’"

12 Mna mwe dizuwa dya katatu Yeloboamu hamwenga na makabila ya kasikazini niyo wauya kwa seuta Lehoboamu enga ivo awalagize. 13 Seuta Lehoboamu aubelaga ulangilizi enk'higwe ni wadala na kuwahitulaga kwa luhahila, 14 viligane na ulangilizi wa wabwanga weyawe niyo awagamba, "Tate nakawatwikani nt'wika zizamile mna miye neniitende izamise. Tate awatowaga kwa ngoda mna miye neniwatowe kwa mkotya una miwa!" 15 Ivo seuta hawategeleze want'hu kwaviya mbuli ino yalawaga kwa Zumbe Mnungu vileke ukint'he ulosi uwo Zumbe Mnungu alongaga na Yeloboamu mwana Nebati kombokela kwa Ahiya kulawa kwo mzi wa Shilo.

16 Mna want'hu wose wa makabila ya kasikazini weze waone kugamba seuta hawategeleze, wamhitulaga seuta na kumgamba, "Kina uhamwenga wani na Daudi? Suwe hakina ukipe kwa mwana Yese. Kila yumwenga naauye mwe nyumba yakwe, nyuwe want'hu wa makabilaya kasikzini. Uikaulise nyumba yako weye mwenye Daudi." Ivo want'hu wose wa makabila ya kasikazini niyo wakeuiya kwe zikwawe. 17 Mna Lehoboamu awalongozaga want'hu wa Izilaeli awo wekale mwe mizi ya Yuda.

18 Niho seuta Lehoboamu amtumaga Adonilamu uyo andaga mkimalizi wa wadya wadamanye ndima ndala ya kutigizwa, mna want'hu wa makabila ya kasikazini wamtowaga kwa maiwe niyo abanika. Seuta Lehoboamu niyo engila mwe digali dyakwe nakunyilikila Yelusalemu. 19 Ivo want'hu wa makabila ya kasikazini wasagukaga kwe nyumba ya Daudi mpaka ivi dielo.