1 Mwo mwaka wa mlongo na mnane wa kwikaila kwakwe seuta Yeloboamu, Abiya andaga seuta ywa Yuda. 2 Alongazaga kwa lupisi lwa miyaka mitatu akanda Yelusalemu. Nine andaga Maaka mwana kike ywa Ulia ywa Gibea.

Kwalailaga nk'hondo mwa Abiya na Yeloboamu. 3 Abiya akeikaga lumwe kutowana nk'hondo akanda na watowani wata udahi laki nne, Yeloboamu naye ambasaga Abiya akanda na watowani laki mnane wata udahi.

4 Seuta Abiya akimalaga mwo mnima Semalaimu, mwe isi ye vigulu va Efulaimu niyo amgamba Yeloboamu na wat'hu wa makabila ya kasikazini, "Nitegeleze weye Yeloboamu na want'hu wose wa makabila ya kasikazini!" 5 "Togoleni, hammanyize kugamba Zumbe Mnungu, Mnungu ywa Izilaeli amwink'haga Daudi na welekwa wakwe useuta mwa Izilaeli ulo na ulo kwa Ndagano heikubanika? 6 Mna Yeloboamu mwana Nebati mndima ywa Selemani mwana Daudi asagukaga kwa mkulu ywakwe. 7 Akajika akeduganyilaga kafyo ka want'hu wahezi hewekufaha kint'hu, na kumuunga Lehoboamu mwana Selemani adamanye yadya wakuunga woho, wakamanya kugamaba andaga mbwanga mdodo heena udahi wa kuhigana nawo. 8 Mna haluse nyuwe mwiika mzungu wa kuuhiga useuta wa Zumbe Mnungu uwo enk'higwe Daudi na welekwa wakwe, hambwe kwaviya weyuko watowani wengi na mahili ya zahabu na ndama ayo adamanye Yeloboamu kunda milungu yenyu. 9 Nyuwe muwagulusa walavant'hambiko wa Zumbe Mnungu na wana wa Haluni na Walawi niyo mwakedamanyila walavant'hambiko wenyu wenye enga ivo wakutenda want'hu we si nt'huhu. Yeyose akwiza kwenyu kukekukiza uku akanda na kajeku na ndolome mfungate adaha kunda mlavant'hambiko kwa vint'hu hiyo milungu kwenyu.

10 "Mna kwetu suwe, Zumbe Mnungu niye Mnungu ywetu hekimleke. Naho kinanao walavant'hambiko wa welekwa wa Haluni awo wakumdamanyila ndima Zumbe Mnungu nawo wambizwa ni Walawi. 11 Kila zuwa mtondo na kisingi, walavant'hambiko walavaga malavo yakint'hile yo kokwa na kufunk'hiza ubani wa mhep'he wedi, naho kuwiika mnanga mwe meza ikukile, mikate ya kuikwa ha Mnungu na kukiika vedi kinala che zahabu yedi na kukweleza vimuli kila mwalagulo. Suwe chayatimila malagizo ya Zumbe Mnungu, Mnungu ywetu mna nyuwe mumleka. 12 Mnungu ehamwenga na suwe, yehe niye kilongozi ywetu, walavant'hambiko wakwe wakanda na magunda yawe wakeika lumwe wayatowa vileke wakik'he kilagiso cha kukonga nk'hondo na nyuwe. Nyuwe want'hu wa makabila ya kasikazini, lekeni kutowana nk'hondo na Zumbe Mnungu, Mnungu ywa wakale wenyu kwaviya homde wahumi!"

13 Mna mwo lupisi ulo, Yelobohamu andaga kawatuma watowani wakwe wakawakump'hukile watowani wa Yuda kulawa nt'hendelo ya kunyuma, umwo wadya watuhu wawabasa kwa kulongole. 14 Watowani wa Yuda weze wabagaze, wetukaga na kuona kugamba wazungulukwa, ivo wailaga kwa Zumbe Mnungu, walavant'hambiko nawo watowaga magunda yawe. 15 Niho watowani wa Yuda wagutilaga kwe nk'hondo naho weze watende ivo, Mnungu amhumaga Yeloboamu na watowani wakwe wa want'hu wa makabila ya kasikazini hameso ha Habiya na want'hu wa Yuda. 16 Want'hu wa makabila ya kasikazini wawanyilikaga want'hu wa Yuda, Mnungu naye awatendaga wahumwe. 17 Abiya na watowani wakwe wawatowesaga niyo awahuma, wawakomaga watowani wa Izilaeli laki shano awo wandilisaga na udahi mwe Izilaeli. 18 Ivo want'hu wa Yuda wapataga uhumi mwa want'hu wa Izilaeli kwaviya wamzumilaga Zumbe Mnungu, Mnungu ywa wakale wawe.

19 Fyo dya watowani dya Abiya dyamgulusaga Yeloboamu ne difyo dyakwe, niyo dyamhoka mizi yakwe ya Beteli na Yeshana na Efuloni hamwenga ne zikaya izo zandaga mnk'handa ye mizi iyo. 20 Yeloboamu hapatile ludole naho mwo lupisi lwo useuta wa Abiya. Zumbe Mnungu naye amtowaga Yeloboamu naye niyo abanika.

21 Mna Abiya apataga ludole. Niyo alomba wavele mlongo na kane, apataga wana kilume milongo miidi na waidi na wana kike mlongo na mtandatu. 22 Mbuli nt'huhu za Abiya hamwenga na mbuli adamanye na izo alongile, ziwandikwa mwe kitabu cha nk'humbukila cha mlotezi Ido.