1 Selemani mwana seuta Daudi andaga mdahi mwo kwikaila kwakwe, Zumbe Mnungu, Mnungu ywakwe amvikilaga na kumtenda ande na udahi.

2 Seuta Selemani awetangaga watowani wakulu wose we vifyo va maalufu na va magana na walamuzi na vilongozi wose we zink'holo za Waizilaeli. 3 Ivo Selemani aulagizaga mdugano wose wakwele mpaka hant'hu henuke ha kulavila nt'hambiko uko Gibioni, kwaviya aho naho hant'hu handile ne Dihema dikukile dya Mnungu idyo Musa mndima ywa Zumbe adidamanyaga uko kwe dijangwa. 4 Mna Disanduku dye ndagano dya Mnungu dyandaga uko Yelusalemu kwe Dihema idyo seuta Daudi adikimaga umwo adiletaga kulawa Kiliati Yealimu. 5 Mna kilingo kiya che shaba icho Bezaleli mwana Uli mwezukuluwe dya Huli adamanyaga yandaga uko Gibioni kulongole ye Dihema Dikukile dya Zumbe Mnungu. Aho Selemani na want'hu wose niyo wamlombeza Zumbe Mnungu. 6 Selemani akwelaga hant'hu ha kulanga kwandaga ne kilingo che shaba ho undiilo wa Zumbe, kwe Dihema dikukile. Alavaga nt'hambiko alufu za kokwa mnanga mwe kilingo icho.

7 Kwe kilo kiya Mnungu amwiziilaga Selemani niyo amgamba, "Lombeza chochose name nohwink'he."

8 Selemani niyo amgamba Mnungu, "Kumtendela tate Daudi uwedi utendese weye nawe kunitenda kunda seuta hant'hu hakwe. 9 Haluse Zumbe Mnungu kint'hiza kilapi chako kwa tate Daudi. Kunitenda ninde seuta mwa want'hu wengi hewekuwazika enga nt'hifu ya si. 10 Haluse nakulombeza unink'he mzungu na umanyi vileke nidahe kwikaila want'hu awa, kwaviya nenidahe vivihi kuwalongoza awa want'hu wako wabindile wingi?"

11 Mnungu niyo amgamba Selemani, "Mbuli ino ulombeze imwe moyo wako, naho hulombeze ugoli hegu nt'hunyo hegu hulombeze wakukuihiya wabanangwe hegu wikazi mtali mna kulombeza mzungu na umanyi vileke uwalongoze vedi want'hu wangu awo hwink'hile unde seuta ywawe, 12 ivo nohwink'he mzungu na umanyi. Naho nohwink'he ugoli na nt'hunyo iyo hahali seuta yoyose andaga navo, naho hahali yoyose naande navo."

13 Ivo Selemani niyo ahalawa hant'hu ha kuvika uko Gibeoni, kwe Dihema dikukile niyo auya Yelusalemu. Naye niyo awalongoza Waizilaeli. 14 Selemani niyo aduganya magali ya nk'hondo yakuvutwa na Falasi na falasi. Andaga na magali ya nk'hondo alufu imwenga na magana mane na falasi alufu mlongo na mbili izo aziikaga mwe mizi iyo yandaga na magali matuhu ya nk'hondo uko Yelusalemu. 15 Seuta Selemani atendaga masawa na zahabu vizoelwe na kunda enga maiwe uko Yelusalemu, mielezi nayo yandaga mingi enga miti ya mikuyu ya uko hasi yo mnima ya Yudea. 16 Falasi za Selemani zalawaga Misili na Kilikia, wachuuzi wakwe wazigulaga kulawa uko. 17 Wagulaga magali ye nk'hondo kulawa Misili kwa yombe dya enga kilo mfungate za masawa kwa kila imwenga, na kila falasi enga kilo mbili. Naho wawegailaga na maseuta wa Wahiti na maseuta wa Wasila.