1 Seuta Daudi augambilaga udya mdugano wose, "Mwanangu Selemani uyo yehe ekedu kasagulwa ni Mnungu akanda akei mdodo naho hana hadimanyize na ndima ino ni nk'hulu. Nyumba iyo akuunga aizenge hiyo ya mnt'hu mna ni nyumba ya Zumbe Mnungu. 2 Hikombeka kwa udahi wangu wose kuiikila lumwe vint'hu va mwe Nyumba ank'hulu ya Mnungu wangu, zahabu na masawa na shaba na kilama ne miti. Iviya iviya vint'hu va langi na maiwe yo kumemezela, maiwe ya langi na maiwe ya yombe na malumalu. 3 Naho nayalavaga kwaajili ye nyumba ikukile, ninanavo vint'hu nikiikile miye mwenye va zahabu na masawa, kwaviya naiungisa Nyumba ank'hulu ya Mnungu ywangu, nalava kwaajili ya Nyumba ank'hulu ya Mnungu ywangu. 4 Tani alufu nt'hatu za zahabu ya Ofili na tani magana mfungate za masawa yedi ya kuzigubika nk'handula za Nyumba ank'hulu ya Mnungu, 5 na kwaajili ye vyombo va zahabu na masawa vikuunga vidamanywe ni mafundi. Ivo ni ani akuunga alave kwa Zumbe Mnungu dielo?"

6 Niho wakulu we nk'holo na vilongozi wa makabila ya Izilaeli na wakulu wa watowani wa maelufu na wakulu wa watowani wa magana hamwenga na wakimalizi wakulu we ndima za seuta walavaga kwa kuunga kwawe. 7 Walavaga kwaajili ya ndima ya Nyumba ank'hulu ya Mnungu tani alufu shano za zahabu na tani mlongo za masawa na tani alufu mlongo na mnane za shaba na tani laki imwenga za kilama. 8 Wadya wandaga na maiwe ya yombe kulu wavilavaga viikwe mwe Nyumba ank'hulu ya Mnungu mwo ulangalizi wa Yehieli ywo lukolo lwa Gelishoni. 9 Want'hu wandaga ne kinyemi kwaviya walavaga kwa moyo wawo wose wamlavilaga Zumbe Mnungu, seuta Daudi naye andaga ne kinyemi vitendese.

10 Daudi niyo amtogola Zumbe Mnungu ho mdugano wose niyo agamba, "Utogolwe ulo na ulo weye Zumbe Mnungu, Mnungu ywa tati yetu Izilaeli ywa ulo na ulo. 11 Weye Zumbe Mnungu ywi mkulu naho mdahi, naho una nt'hogola itendese na umhumi. Vose vi mwe mbingu na mwe isi ni vako, weye Zumbe Mnungu useuta ni wako, nawe kutogolwa kunda mkulu mwe vint'hu vose. 12 Ugoli na nt'hunyo valawa kwako, vose wavilongoza. Udahi na ludole vose ni vako, nawe wawavikila wadya ukuwaunga na kuwenk'ha udahi wose. 13 Haluse elo weye Mnungu ywetu, chakugamba nivedi na kutogola dizina dyako dikukile.

14 "Mna miye ni ani na want'hu wangu ni wahi hata kidahe kukwink'ha kint'hu? Kwaviya vint'hu vose valawa kwako, kikulavila viya vikulawa kwako weye mwenye. 15 Suwe ni watakwiza hameso hako naho chomboka enga ivo wendile tate zetu wose. Mazuwa yetu aha mwe isi enga kizuli kikomboka, aha hiyo hetu. 16 Weye Zumbe Mnungu, Mnungu ywetu wingi wose uno kilavile vileke kikuzengele nyumba kwaajili yo ukulu we dizina dyako dikukile, ni weye ukink'hile, navo vose ni ugoli wako. 17 Namanya Mnungu ywangu kugamba weye wageza mioyo ya want'hu, nawe welelwa ni uhuwilwa wawe. Name mwo uhuwilwa wangu hilava vint'hu ivi vose kwa kuunga kwangu, naho haluse naona want'hu wako awa weaha wakakulavila kwa kuunga kwawe na kwa kinyemi. 18 Weye Zumbe Mnungu, Mnungu ywa Ibulahimu na Isaka na Yakobo, watati zetu, uiike mbuli ino ya kukelava kwako mazuwa yose mwe zifanyanyi ze mioyo wa want'hu wako naho ilongoze mioyo ya want'hu wako kwako. 19 Umwink'he mwanangu Selemani kuunga uku, kukelava kwa moyo wose vileke atoze sigilizi zako, malagizo yako ayatoze yose vileke adahe kuizenga Nyumba ank'hulu ya Mnungu iyo niikile lumwe uzesi wakwe naho aibinde."

20 Seuta Daudi niyo awagamba wose wadugane, "Mtogoleni Zumbe Mnungu, Mnungu ywenu." Wose wadugane niyo wamtogola Zumbe Mnungu ywa watati zawe, niyo wafika madi na kufunamiza mitwi yawe na kumvika Zumbe Mnungu, naho niyo wamtunya seuta Daudi.

21 Wamlavilaga nt'hambiko Zumbe Mnungu. Zuwa dya kaidi wamlavilaga malavo yo kokwa, majeku alufu na wana ngoto alufu hamwenga na malavo yawe na nt'ambiko nyingi kwaajili ya Waizilaeli wose. 22 Ivo mwe dizuwa idyo wadyaga no kunywa kwa kinyemi kikulu hameso ha Zumbe Mnungu.

Niyo wamuika Selemani mwana Daudi nk'hanana ya kaidi, wamkumbaga mavuta ande kilongozi kwa zina dya Zumbe Mnungu naho Sadoki ande mlavant'hambiko. 23 Selemani niyo ekala mwe difumbi dyakwe dyo useuta dya Zumbe Mnungu hant'hu ha ise Daudi. Niyo adamanya vedi mwo ulongozi wakwe na want'hu wose wa Izilaeli niyo wamogoha. 24 Vilongozi wose na watowani wadahi na wana kilume wose wa Daudi wakeikaga kwa seuta Selemani. 25 Zumbe Mnungu niyo amtogolesa Selemani hameso ha Waizilaeli wose na kumwink'ha vint'hu vose va kiseuta, kujink'ha seuta yoyose alongozaga mwe Izilaeli.

26 Daudi uyo mwana Yese andaga seuta mwe isi yose ya Izilaeli. 27 Alongozaga mwe Izilaeli kwa mihilimo milongo mine. Uko Hebuloni alongozaga kwa mihilimo mfungate, na mihilimo milongo mitatu na mitatu alongozaga uko Yelusalemu. 28 Daudi abanikaga adalahalise akanda na myakamingi, mgoli naho akutunywa ni want'hu. Uyo mwanawe Selemani niye aguhaga useuta hant'hu ha ise. 29 Mbuli zose adamanyaga seuta Daudi mwo useuta wakwe kukongela aho nk'hongo kubula kwo uheelo wo useuta wakwe, ziwandikwa mwe zink'humbukila za mlotezi Samweli na Natani, na mwe zink'humbukila za mlotezi Gadi. 30 Zink'humbukila izo zalonga ivo alongozaga na ivo andaga mta udahi na mbuli zalailaga kwakwe na kwa Izilaeli na useuta wa isi zose zandaga mgihi naye.