1 Seuta Daudi umwo andaga akekala mwe nyumba yakwe ya kiseuta, zuwa dimwenga amwitanga mlotezi Nasani niyo amgamba, "Kaula miye nekala mwe nyumba yedi izengigwe kwa miti ya mielezi mna Disanduku dya Ndagano dya Zumbe Mnungu dyekala mwe Dihema."

2 Nasani niyo amgamba Daudi, "Damanya chochose icho ukufanyanya mwo umoyo wako, kwaviya Zumbe Mnungu ehamwenga na weye."

3 Mna kilo ikiya, ulosi wa Zumbe Mnungu wamwizilaga Nasani ukagamba, 4 "Ita ukamgambile mndima ywangu Daudi, Zumbe Mnungu agamba ivi, ‘Weye howizengele nyumba ya kwikala. 5 Kukongela lupisi ludya nize niwakombole want'hu wa Izilaeli kulawa Misili kubula ivi dielo, hikale mwe nyumba. Mna nekalaga mwe dihema dyandaga dikasamizwa kulawa hant'hu hamwenga kuita hant'hu hatuhu. 6 Mwe kila hant'hu niitile hamwenga na want'hu wa Waizilaeli wose, hinati nimuuze kilongozi yeyose nimsagule kugamba, nii hunuzengele Nyumba ya Mviko kwa maziti ya mielezi.’

7 "Ivo elo mgambile mndima ywangu Daudi, Zumbe Mnungu mta udahi agamba ivi, ‘Nakulavaga ko kudima umwo wandaga ukadima ngoto, vileke unde mkulu ywa want'hu wangu Izilaeli. 8 Kukongela lupisi ulo nandaga hamwenga na nyuwe hohose aho uitile nawahumaga wank'hondo wako wose hameso hako. Ivo neniditende zina dyako enga mazina ya want'hu watuhu wakulu wa mwe isi. 9 Name neniwenk'he want'hu wangu wa Izilaeli hant'hu ho kwikala vileke wanda na kwawe, naho hawageligwe nk'huswa nk'huswa naho. want'hu waihile hawagendeele kuwalumiza naho enga ivo wadamanyaga aho nk'hongo. 10 Naho kukongela mwe dizua diya nawagambile walamuzi wawalongoze want'hu wangu Izilaeli, iviaivia neniwahume wank'hondo wako wose. Hamwenga na ayo nalonga kugambila kugamba neniwenk'he welekwa wako udahi wa kulongoza. 11 Umwo ukeza kunda mazua yako yo wikazi yasila nawe niyo wabanika na kunda hamwenga na wakale wako wabanikaga, nenimsagule yumwenga ywa wanao ande seuta nami neniutende useuta wakwe utoge. 12 Yehe niye naanizengele nyumba, name neni utende useuta wakwe utoge ulo na ulo. 13 Miye neninde ise, yehe naande mwanangu, mna hikuluhausa lukunde lwangu kwakwe enga ivo nimuusile Sauli uyo akulongoele. 14 Ivo nenimwiike awalongoze want'hu wangu Waizilaeli naho useuta wangu nounde wa ulo na ulo, naho useuta nedikink'hise udahi ulo na ulo.’ "

15 Nasani amgambilaga Daudi mbuli zose viligane na maona enk'higwe ni Mnungu.

16 Ivo seuta Daudi niyo engila kwe Dihema Dikukile na kwikala hameso ha Zumbe Mnungu niyo alombeza, "Miye nna uwedi wani kwako weye Zumbe Mnungu, naho mp'huga yangu ni kint'hu chani vikuleka unidamanyile uwedi uno wose! 17 Hiyo ayo du udamanye, kunilagana mwe mbuli ya welekwa wangu mwa mazuwa yakwiza, naho weye Zumbe Mnungu kunitendela kale kunda enga mnt'hu mkulu. 18 Nigeeze naho miye Daudi mndima ywako kwa kunitunya? Kwaviya weye kunimanya miye mndima ywako. 19 Weye Zumbe Mnungu, kwajili ya kuunga kwako na kwa undima wako wanitendelea ivi naho kunilagisa ukulu wangu ukwiza. 20 Hahana mtuhu enga weye, weye Zumbe Mnungu naho hahana Mnungu mna ni weye enga ivo kivile suwe wenye. 21 Naho ni wahi enga want'hu wako Izilaeli awo Mnungu wawakombola kwajili yako mwenye vileke wande want'hu wako? Weye wakedamanyila zina kwa kudamanya mbuli nk'hulu naho zo kwehela aho wize uziguluse si hameso ha want'hu wako awo uwakombole kulawa Misili. 22 Wawatendaga want'hu wako Izilaeli wande want'hu wako mwenye ulo na ulo, nawe weye Zumbe Mnungu wanda Mnungu wawe.

23 "Haluse elo, weye Zumbe Mnungu ivo kint'hiza ndagano kwa mndima ywako no ulongozi wakwe noutoge ulo na ulo, damanya enga ivo ulagane. 24 Zina dyako neditunywe mazuwa yose, naho want'hu niyo wagamba, ‘Zumbe Mnungu mta udahi wose, Mnungu ywa Izilaeli niye Mnungu ywa Izilaeli.’ Naho ulongozi wako noutoge ulo na ulo. 25 kwaviya weye Mnungu ywangu kumgubuila mndima ywako Daudi kugamba ulongozi wangu nounde ulo na ulo. Ivo miye mndima ywako hiona vedi mwo moyo wangu kugamba hulombeze. 26 Haluse weye Zumbe Mnungu, weye niwe Mnungu, kumlagana mndima ywako mbuli izi izedi. 27 Haluse nakulombeza uvikile welekwa wa mndima ywako vileke ikale mazuwa yose ho undilo wako, weye Zumbe kuivikila nayo neinde ivikilwa ulo na ulo."