1 Awa nawo welekwa wamwenga wa Yuda: Pelesi na Hesiloni na Kalimi na Huli na Shobali. 2 Leaya mwana Shobali amwelekaga Yahati uyo andile ise dya Ahumai na Lahadi. Izi nizo zink'holo za Wazolati.

3 Wana kilume wa Etamu wandaga ni Yezileeli na Ishima na Idibashi. Wandaga na lumbu dyawe yumwenga akwitangwa Haseleliponi. 4 Penueli niye aukongaga mzi wa Gedoli, Ezeli naye niye aukongaga mzi wa Husha. Awa nawo welekwa wa Huli, nt'hulasasu ywa Efulata uyo akongaga mzi wa Betelehemu.

5 Ashulu uyo akongaga mzi wa Tekoa andaga na wavele waidi, Hela na Naala. 6 Naala awelekelaga wana kilume wane, wana awo wandaga ni, Ahuzamu na Hefeli na Temeni na Haahashatali. 7 Hela amwelekelaga wana watatu: Seleti na Ishali na Etinani. 8 Kozi awelekaga Anubi na Sobeba, naho uyo niye andaga mkale ywe zink'holo za welekwa wa Ahaliheli mwana Halumu. 9 Kwandaga na mnt'hu yumwenga etangwagwa Yabesi, ogoheswagwa kujink'ha wanduguze wose. * 10 Mna Yabesi amlombezaga Mnungu ywa Izilaeli niyo agamba, "Weye Mnungu nakulombeza univikile naho unink'he isi nk'hulu. Udahi wako unde hamwenga na miye naho uniike hale na mbuli ziihile zikudaha kunigela kinyulu." Mnungu naye niyo amwiva yadya alombeze.

11 Kalebu nduguye Shuha, amwelekaga Mehili, Mehili naye amwelekaga Eshitoni. 12 Eshitoni andaga na wana watatu. Wana awo ni, Beti Lafa na Pasea na Tehina. Tehina andaga niye aukongaga mzi wa Ili Nahashi. Welekwa wawe wekalaga mwo mzi wa Leka.

13 Kenazi awelekaga wana kilume waidi, wana awo ni Otinieli na Selaya. Wana Otinieli wandaga ni Hatati na Meonotai.* 14 Meonotai amwelekaga Ofula.

Selaya amwelekaga Yoabu, uyo akongaga Dikolongo dya Wadamanyi wedi wa vint'hu.

15 Kalebu mwana Yefune andaga na wana kilume watatu, Ilu na Ela na Naamu. Mwana kilume ywa Ela andaga ni Kenazi.

16 Wana kilume wa Yehaleleli wandaga ni Zifu na Zifa na Tilia na Asaleli.

17 Wana Ezila wandaga ni Yeseli na Meledi na Efeli na Yaloni. Meledi amlombaga Bitia mwana kike ywa Falao. Uyo amwelekelaga wana kilume waidi : Shamai na Ishiba na mwana kike yumwenga uyo Miliamu. Ishiba niye akongaga mzi wa Eshitemoa. 18 Meledi alombaga mvele mtuhu ywa Kiyahudi. Uyo amwelekelaga wana kilume watatu, Yeledi uyo akongaga mzi wa Gedoli, na Hebeli akaongaga mzi wa Soko, na Yekutieli niye akongaga mzi wa Zanoa.

19 Hodia amlombaga lumbudye dya Nahamu uyo welekwa wakwe wakongaga lukolo lwa Galami, wekalaga mwo mzi wa Keila, lukolo lwa Maakati nalo lwekalaga mwo mzi wa Eshitemoa. Aha msitali wa 19 Kiibulania hakikombaga nyike.

20 Shimoni andaga na wana kilume wane: Amnoni na Lina na Beni Hanani na Tiloni. Ishi andaga na wana waidi wana awo ni, Zoheti na Ben Zoheti.

21 Shela andaga yumwenga mwa wana Yuda. Welekwa wakwe ni hamwenga na Eli awo wakongaga mzi wa Leka na Laada naye niye akongaga mzi wa Malesha, ne nk'holo za wakudamanya suke zedi zing'aile nawo wandaga wakekala mwo mzi wa Bet Ashibea. 22 Yokimu na want'hu wakwikala mwo mzi wa Kozeba na Yoashi na Salafi walombile uko Moabu wezaga Lehemu. Mbuli izi ni za kale vitendese, Kiibulania hakikombaganyike mwo msitali uno. 23 Awa wandaga waumbi wekale mwe mizi ya Netaimu na Gedela, wakaumba vint'hu va seuta.

24 Simeoni andaga na wana kilume washano nawo ni, Nemueli na Yamini na Yalibu na Zela na Sauli . 25 Mwana Sauli andaga ni Shalumu, Shalumu amwelekaga Mibisamu na Mibisamu naye amwelekaga Mishima. 26 Mishima amwelekaga Hamueli uyo amweleke Zakuli na Zakuli naye amwelekaga Shimei. 27 Shimei andaga na wana kilume mlongo na mtandatu na wanakike mtandatu, mna wanduguze wandaga hawana wana wengi, ivo lukolo lwawe lwose lwandaga haluna want'hu wengi enga kabila dya Yuda. 28 Mizi iyo wandaga wakekala welekwa wa seuta yandaga ni Beeli Sheba na Molada na Hasali Shuali, 29 Biliha na Ezemu na Toladi, 30 Besueli na Holima na Sikilagi, 31 Beti Malikaboti na Hazali Susimu na Beti Bili na Shaalaimu. Ino niyo mizi yawe kubula umwo akalongoza seuta Daudi. 32 Naho wekalaga mwe mizi mituhu mishano mizi iyo ni: Etamu na Aini na Limoni na Tokeni na Ashani, 33 hamwenga ne zikaya zizunguluke mwe mizi iyo uko Baalati. Ino yandaga mizi yawe, waikaga zink'holo zawe vileke wakumbukile.

34 Want'hu awa wandaga wakulu we zink'holo zawe: Meshobabu na Yamleki na Yosha mwana Amazia, 35 Yoeli na Yehu mwana Yoshibia na mwana Selaya na mwana Asieli, 36 Elioenai na Yaakoba na Yeshohaya na Asaya na Adieli na Yesimieli na Benaya, 37 Ziza mwana Shifi na mwana Aloni na mwana Yedaya na mwana Shimli na mwana Shemaya. 38 Zink'holo zawe zabindaga wingi. 39 Wenelaga kubula mwe mwingiilo wo mzi wa Gedoli nt'hendelo yo ulailo wa zuwa he dikolongo vileke wazungule madimilo ye mifugwa yawe. 40 Uko wapataga madimilo mengi yedi. Isi nayo yandaga na hant'hu hakulu, naho yandaga no utondowazi na kuhola. Awo wekale mwe isi iyo aho nk'hongo wandaga Wahamu. 41 Mwo lupisi lwa seuta Hezekia ywa Yuda, want'hu awo waandikwe mazina yawe waitaga uko Gedoli, niyo wabananga dihema dya Wameuni awo wandaga wakekala uko na kuwagulusa kubula dielo. Wekalaga uuko kwa lupisi lutali kwaviya kwandaga na madimilo mengi kwajili ye mifugwa yawe. 42 Want'hu wengi we dikabila dya Simeoni wakubula magana mashano waitaga kubula ko mnima Seili. Walongozagwa na wana wa Ishi awo Pelatia na Nealia na Lefaya na Uzieli. 43 Want'hu wa Simioni wawakomaga Waamaleki wasigale awo wanyilikaga, woho niyo wekala uuko kubula ivi dielo.