1 Mwe nk'hongo yo mhilimo wawe mhya, mwo lupisi umwo maseuta wakaita kwe nk'hondo, Yoabu alongozaga watowani na kuitaha isi ya Waamoni, naho aitaga nakuuzunguluka mzi wa Laba akanda na watowani. Mna Daudi asigalaga uko Yelusalemu. Naye Yoabu autowaga mzi wa Laba na kuubananga. 2 Daudi niyo aguha taji ya mnungu ywawe akwitangwa Milikomu ho mtwi hakwe naye niyo amanya kugamba taji iyo yandaga na kilo milongo mitatu na shano ya zahabu naho mndani mwake mwadaga ne maiwe ya yombe kulu. Daudi naye niyo akaguha ahambile taji yakwe. Naho atahaga vitahigwa vingi kulawa mwo mzi uwo. 3 Akajika awaguhaga want'hu wa mzi uwo niyo awaika wadamanye ndima kwa misumeno na sululu za vilama na hoya za vilama. Ivo nivo aitendaga mizi yose ya Waamoni. Daudi na want'hu wakwe niyo wauya Yelusalemu.

4 Akajika kwalailaga nk'hondo na Wafilisiti uko Gezeli. Sibekai Mhushati amkomaga Sipai uyo andaga yumwenga ywa welekwa wa Walefai awo wandaga mazint'hu, ivo Wafilisiti wandaga wahumwagwa.

5 Kwalailaga naho nk'hondo na Wafilisiti. Naye Elihanani mwana Yaili amkomaga Lahami nduguye Goliati kulawa mwo mzi wa Gati, uyo umhini wo mjungo wakwe wandaga enga mti kufumila.

6 Kwalailaga nk'hondo nt'huhu naho uko Gati, kwandaga na zint'hu dimwenga dyandaga tali vitendese na madole mtandatu mwe kila mkono na madole mtandatu mwe kila kiga, vose vandaga milongo miidi na vine. Yehe andaga welekwa wa Wanefeli. 7 Naye eze awahomole Waizilaeli, Yonasani mwana Shimea nduguye Daudi amkomaga. 8 Amatatu aya ayo yakomigwe ni Daudi na want'hu wakwe yandaga ni welekwa wa mazint'hu ya uko Gati.