1 Mwavu aungaga kuwagela Waizilaeli mwa makunt'ho amtendaga Daudi afanyanye kuwawaza want'hu wa Izilaeli wakudah kunda watowani. 2 Ivo Daudi niyo amgamba Yoabu na wakulu wa watowani, "Iteni mkawawaze Waizilaeli kulawa Beel Sheba kubula Dani, niyo mwanigaila ulosi vileke nimanye ivo weli."

3 Mna Yoabu ahitulaga akamgamba, "Zumbe Mnungu awagenyeze Waizilaeli nk'hanana gana kujink'ha ivo weli haluse, seuta ywangu, awa wose hi wandima wako? Nii waunga kudamanya mbuli iyo ikuunga iwagele Waizilaeli mwa masa?" 4 Mna ulosi wa seuta wamtendaga Yoabu atende enga ivo aungile seuta. Yoabu aitaga mwe isi yose ya Izilaeli niyo auya Yelusalemu. 5 Yoabu amwigailaga seuta Daudi want'hu awawazile. Mwe Izilaeli yose kwandaga na want'hu milioni imwenga na mwe isi ya Yuda wandaga want'hu laki imwenga na milongo mfungate alufu wakudaha kutowana na mabamba. 6 Mna Yoabu hawawazile Walawi na Wabenjamini kwaviya helelwagwa ne sigilizi ya seuta.

7 Mnungu helelwe ne mbuli iyo kwa ivo aitowaga Izilaeli. 8 Daudi amgambaga Mnungu, "Hidamanya wavu mkulu kwa mbuli ino nidamanye! Mna nakulombeza uniusile wavu miye mndima ywako kwaviya hidamanya mbuli ya kihezi."

9 Ivo Zumbe Mnungu amgambaga Gadi mlotezi ywa Daudi, 10 "Ita ukamgambe Daudi, Zumbe agamba, nakwink'ha mbuli nt'hatu za kusagula. Kesaguile imwenga mwe izo name nohutendele."

11 Ivo Gadi aitaga kwa Daudi niyo amgamba, Zumbe Mnungu kagamba, "Kesaguile kimwenga mwe izi, 12 unde na miyaka mitatu ya gumbo hegu miezi mitatu ya kutoigwa na kuguluswa ni wank'hondo wako, hegu mazuwa matatu Zumbe Mnungu ayo naawegaileni maine yaihile mwe isi, naho mtumigwa ywa kwe mbingu omboke awakome want'hu wose mwe isi yose ya Izilaeli. Haluse fanyanya kugamba nimwink'he uhituzi wani yehe anitumile?"

13 Daudi niyo amhitula Gadi, "Hingila mwo kwangadikisa. Mna hikuunga kusulumizwa ni want'hu. Leka nisulumizwe ni Zumbe Mnungu kwaviya yehe ni mta mbazi zitendese."

14 Ivo Zumbe Mnungu niyo awegaila Waizilaeli manyonge yaihile ayo yatendaga Waizilaeli alufu mfungate wabanike. 15 Mnungu niyo amtuma mtumigwa ywa kwe mbingu aite akaibanange Yelusalemu, mna umwo andaga akatenda ivo, Zumbe Mnungu ahitula zifanyanyi zakwe, ukomi usekudamanyika niyo amgamba mtumigwa ywa kwe mbingu, Leka! Use kutenda ivo. Mwo lupisi ulo mtumigwa ywa kwe mbingu andaga kakimaala he kiwasa cha Alauna Myebusi cho kuhutila ulozo.

16 Daudi enulaga meso yakwe kulanga niyo amuona mtumigwa ywa kwe mbingu ywa Zumbe kakimala hagati ye mbingu ne si akanda katoza sime yakwe akaionyekeza uko Yelusalemu kwa kuubananga. Aho Daudi na wadala vilongozi wose awo wavalaga suke za magunia naho wafunamizaga vihanga vawe kubula hasi. 17 Daudi amgambaga Mnungu, "Togola hiyo miye nilavile sigilizi want'hu wawazigwe? Ni miye nitendile wavu na kudamanya masa yatendese. Mna want'hu awa ni enga ngoto hawana icho wabanange. Nakulombeza weye Zumbe Mnungu, Mnungu ywangu makunt'ho aya yande mwa miye na mwe nyumba ya tate mna yasekuwapata want'hu wako."

18 Ivo mtumigwa ywa Zumbe Mnungu niyo amlagiza Gadi amgambile Daudi aite akamzengele Zumbe Mnungu kilingo mwe kiwasa cho kuhutila ngano cha Alauna Myebusi. 19 Daudi niyo atimila sigilizi ya Zumbe Mnungu, niyo akwela viligane no ulosi wa Gadi enga ivo Mnungu alagize. 20 Alauna eze ahituke na kumuwona yudya mtumigwa ywa Mnungu, yehe na wanawe wane wadya wendile hamwenga naye niyo wakefisa. Naye Alauna andaga akahuta ingano. 21 Daudi eze aite kwa Alauna, Alauna eze amuone Daudi afosaga mwe kiya kiwasa na kumfunamila Daudi kubula hasi kwa kumtunya. 22 Daudi niyo amgamba Alauna, "Nink'he kiwasa chako cho kuhutila ngano vileke nimzengele Zumbe Mnungu kilingo vileke makunt'ho yasekuwapata want'hu. Nitagile kwa yombe dikint'hile."

23 Naye Alauna niyo amgamba Daudi, "Kiguhe kiwasa iki haheina kuliha seuta ywangu, udamanye dyodyose idyo ukuunga. Kaula nalava ng'ombe kwaajili ya malavo yo kokwa na vyombo va kuhutila kwa nk'huni hamwenga ne ngano inde nt'hambiko. Vose ivo nakwink'ha."

24 Mna seuta Daudi amgambaga Alauna, "Hiyo ivo naunga nikigule kwa yombe dikint'hile. Heniguhe kwaajili ya Zumbe Mnungu kint'hu chandile chako hegu kumlavila nt'hambiko yo kokwa iyo hikuilihila." 25 Ivo Daudi amlihaga Alauna kwa vibesu va zahabu magana mtandatu kwaajili ya kiya kiwasa. 26 Ivo Daudi niyo amzengela Zumbe Mnungu kilingo hant'hu aho na kumlavila malavo yo kokwa na malavo yo utondowazi. Niyo amlombeza Zumbe Mnungu naye niyo azumila kulombeza kwakwe kwa kwigala moto kulawa kwe mbingu kuyoka yadya malavo mwe kilingo.

27 Akajika Zumbe Mnungu amlagizaga mtumigwa ywa kwe mbingu naye niyo aika sime yakwe mwe yala yakwe. 28 Mwo lupisi ulo Daudi eze aone kugamba Zumbe Mnungu kazumila kulombeza kwakwe mwe kiwasa cho kuhutila ngano ya Alauna Myebusi, alavaga nt'hambiko zakwe aaho. 29 Dihema Dikukile dya Zumbe Mnungu idyo didamanywe ni Musa kwe dijangwa hamwenga ne kilingo cha malavo yo kokwa, mwo lupisi ulo vandaga vikei hadya hant'hu ho kuvikila uko Gibeoni. 30 Mna Daudi hadahaga kuita uko ko kumlombeza Mnungu kwaviya andaga akaogoha sime ya mtumigwa ywa Zumbe Mnungu.