1 Ivo, Wafilisiti nawatowana nk'hondo na Waizilaeli mwo mnimna Giboa na Waizilaeli wengi nawakomigwa uko mna Sauli na wanawe na Waizilaeli watuhu wanyilikaga. 2 Wafilisiti wawakump'ukilaga Sauli na wanawe, niyo wawakoma wana wa Yonasani na Abinadabu na Maliki Shua wana wa Sauli. 3 Nk'hondo yandaga nk'hulu kumzunguluka Sauli, wadya wakulasa ne misale weze wamuone niyo wamlumiza. 4 Sauli amgambaga yudya enule vitowanilo vakwe, "Somola sime yako unitunge nibanike vileke want'hu awa hewevinilwe wase kunitendela lubezo." Mna yudya enule vitowanilo vakwe ogohesaga naho hadamanye enga ivo akuungwa adamanye. Ivo Sauli aguhaga sime yakwe niyo akekoma mwenye. 5 Yudya enule vitowanilo vakwe eze aone Sauli kabanika, yehe naye aketungiza mwe sime yakwe niyo abanika. 6 Ivo elo Sauli na wanawe watatu wabanikaga pele. 7 Waizilaeli wose awo wendile wakekala he dikolongo dya Yezileeli weze waone kugamba wadya watowani wanyilika na Sauli na wanawe wabanika, walekaga imizi yawe na kunyilika. Wafilisiti wezaga na kwikala umo. 8 Mwe dizuwa dya kaidi Wafilisiti umwo wezaga kuguha vint'hu va awo wakomigwe, wabwilaga vimba va Sauli na wanawe mwo mnima Giliboa. 9 Wamhambulaga mavalo ya nk'hondo, niyo waguha mtwi wakwe hamwenga ne vitowanilo vakwe naho wasigiilaga ulosi mwe isi yose ya Filisiti kubwelekeza ulosi kwa mahili yawe na want'hu wawe. 10 Waikaga vitowanilo vawe mwe inyumba ye milungu yawe, niyo waguha umtwi na kuutungika mwe nyumba ya mnungu ywawe Dagoni. 11 Want'hu wose wa Yabeshi Gileadi weze weve ayo yose Wafilisiti wamtendele Sauli, 12 watowani wose wahalawaga na kuguha kimba cha Sauli ne vimba va wanawe na kuvigala Yabeshi. Wamosaga msanga mavuha yawe hasi yo mti ukwitangwa mwaloni uko Yabeshi, nawo niyo wafunga kwa mazuwa mfungate. 13 Sauli abanikaga kwaviya andaga hiyo mhuwilwa kwa Zumbe, hatozile malagizo yo ulosi wa Zumbe, yehe aitaga kwa mlaguzi akatowe mnamulo, 14 hamuuzile Zumbe ulangilizi. Kwa ivo Zumbe amkomaga niyo amwink'ha useuta uwo Daudi mwana Yese.