1 Ivo want'hu wose wa Izilaeli wawazagwa mwe zink'holo ziwandikwe mwe kitabu cha maseuta wa Izilaeli. Want'hu wa Yuda watahagwa kuita Babeli kwaviya wandaga hiyo wahuilwa. 2 Ivo want'hu wa nk'hongo kuuya na kwikala mwe mizi yawe wandaga ni Waizilaeli wamwenga na walavant'hambiko na Walawi na wandima mwe Nyumba ya Mnungu. 3 Want'hu wamwenga kulawa mwa makabila ya Yuda na Benjamini na Eflaimu na Manase wagendaga kwikala mwo mzi wa Yelusalemu.

4 Awa ni hamwenga na, Utai mwana Amihudi na mwana Omli na mwana Imli na mwana Bani na wana Pelesi na mwana Yuda. 5 Na welekwa wa Shilo na Asaya nt'hulasasu na kilongozi na wanawe. 6 Na welekwa ywa Zela na Yeueli na ndugu zawe, wose wandaga want'hu gana mtandatu na milongo kenda. 7 Na welekwa wa Benjamini ni Salu mwana Meshulamu na mwana Hodavia na mwana Hasenua, 8 na Ibineya mwana Yelohamu na Ela mwana Uzi na mwana Makili na Meshulamu mwana Shefatia na mwana Leueli na mwana Ibiniya, 9 na ndugu zawe viligane ne vyeleko vawe. wandaga want'hu magana kenda milongo mishano na mtandatu. Want'hu awa wose wandaga wakulu we zikaya za watati zawe.

10 Awa nawo walavant'hambiko wekalaga Yelusalemu, Yedaya na Yehoyalibu na Yakini, 11 na Azalia mwana Hilikia na mwana Meshulamu na mwana Sadoki na mwana Melayoti na mwana Ahitubu no mkulu ywe Nyumba ya Mnungu, 12 na Adaya mwana Yelohamu na mwana Pashuli na mwana Malikiya na Maasai mwana Adieli na mwana Yazela na mwana Meshulamu na mwana Meshilemiti na mwana Imeli. 13 Walavant'hambiko wandaga wakulu we nk'holo za watati zawe hamwenga na ndugu zawe, wandaga want'hu alufu imwenga magana mfungate na milongo mtandatu. Wandaga want'hu wata udahi mwe ndima yawe yose mwe Nyumba ank'hulu ya Mnungu.

14 Awa nawo Walawi wekale Yelusalemu, Shemaya mwana Hashubu na mwana Azilikamu na mwana Hashabia na wana Melali, 15 na Bakibakali na Heleshi na Galali na Matania na mwana Mika na mwana Zikili na mwana Asafu. 16 Na Obadia na mwana Shemaya na mwana Galali na mwana Yedutuni na Belekia na mwana Asa na mwana Elikana, awo wandaga wakekala mwe zikaya za Wanetofati.

17 Wamizi we Nyumba ank'hulu ya Mnungu wekale Yelusalemu wandaga ni Shalumu na Akubu na Talimoni na Ahimani na Walawi weyawe. Shalumu andaga niye mkulu ywawe. 18 Waikwagwa mwe nk'hili ya seuta iyo yandaga mwe nt'hendelo yo ulailo wa zuwa kubula ivi haluse. Awa wandaga wamizi kulawa mwe nk'hambi ya Walawi. 19 Shalumu mwana Kole, Kole uyo mwana Ebiasafu hamwenga na weyawe wo lukolo lwa Kola wandaga wakakimaila ndima iyo wenk'higwe enga ivo wandaga wakale wawe mwo wamizi we nk'hili ye Dihema dya Zumbe Mnungu. 20 Aho kale Finehasi mwana Eleazali andaga mkimalizi ywawe, naho Zumbe Mnungu andaga hamwenga naye. 21 Zekalia mwana Meshelemia andaga mkimalizi mwe dihema dikukile. 22 Want'hu wose wawazigwe, ni magana maidi na mlongo umwenga na waidi kunda wamizi mwe Nyumba ya Mnungu. Wawandikagwa viligane ne zikaya izo wekalaga. Seuta Daudi na Samweli uyo aone nawo wawaikaga mwe ndima yawe. 23 Ivo want'hu awo na welekwa wawe wandaga wakimalizi wakwamila nk'hili ze Nyumba ya Zumbe Mnungu. 24 Kila nt'hendelo ya ulailo wa zuwa na usweelo wa zuwa na mkoma mahanya na kwa mwenye mzi kwandaga ne nk'hili yendile na wamizi. 25 Wamizi awa wambizagwa na Walawi awo wakwikala mwe zikaya awa waungagwa kwamila kwa mazuwa mfungate kila lupisi. 26 Mna wadya wamizi wakulu wane awo wandaga Walawi waikwagwa kukaula vyumba ne kindolo che Nyumba ya Mnungu. 27 Woho wekalaga hagihi ne Nyumba ya Mnungu kwaviya newakaungwa kuikaula. Naho waziikaga zifunguo kwajili ya kuukomola zink'hili kila mtondo.

28 Walawi wamwenga wakimaile vyombo vandaga kwajili yo mviko waungwagwa kuviwaza umwo vandaga vikalavigwa na umwo vandaga vikavuzwa. 29 Watuhu wasagulwa kuvikimaila vint'hu ve Nyumba ya Mnungu na vyombo vose vikukile na unga wedi na divai na mavuta ye zeituni na ubani na vint'hu va mhep'he. 30 Mna ndima yakuhanganya vint'hu vo mhemp'he yadamanyagwa ni walavant'hambiko. 31 Mlawi yumwenga etangwe Metisia andaga nt'hulasasu ywa Shalumu mwo lukolo lwa Kola enk'hagwa kukimaila koka mikate ya malavo. 32 Ndugu zawe watuhu wa lukolo lwa Kohati wandaga wakakimaila imikate kwajili ya Nyumba ank'hulu ya Mnungu mwe kila zuwa dyo kuhumula. 33 Wadya wandaga wakemi, vilongozi we nk'holo za Walawi wekalaga mwe Nyumba ank'hulu ya Mnungu. Woho hawadamanyaga ndima nt'huhu yoyose kwaviya wandaga mwe ndima kilo na nomsi. 34 Want'hu wose awa wandaga vilongozi we dikabila dya Walawi, viligane ne zink'holo zawe, woho nawo vilongozi wekalaga Yelusalemu.

35 Yaieli uyo aukongaga mzi wa Gibeoni, mkaziwe etangwagwa Maaka. 36 Nt'hulasasu ywakwe andaga ni Abidoni, atimilagwa ni Zuli na Kishi na Baali na Neli na Nadabu, 37 Gedoli na Ahio na Zekalia na Mikiloti. 38 Mikiloti amwelekaga Shimeamu. Welekwa wakwe wekalaga Yelusalemu hagihi ne zink'holo zawe. 39 Neli amwelekaga Kishi, Kishi naye amwelekaga Sauli. Sauli andaga na wana wane. Wana awo ni Yonasani na Maliki Shua na Abinadabu na Eshibaali. 40 Yonasani amwelekaga Melibu Baali na Melibu Baali naye amwelekaga Mika. 41 Mika andaga na wana wane Wana awo ni Pitoni na Meleki na Talea na Ahazi. 42 Ahazi amwelekaga Yala na Yala naye amwelekaga Alemeti na Aziweti na Zimli na Zimli naye amwelekaga Moza. 43 Moza amwelekaga Binea na Binea naye amwelekaga Lefaya na Lefaya amwelekaga Eleasa na Eleasa amwelekaga Aseli

44 Aseli andaga na wana mtandatu. Wana awo ni Azilikamu na Bokelu na Ishumaeli na Shealia na obadia na Hamani. Wose awa wandaga wana Aseli.