1 Ivo Waizilaeli wose waduganaga hamwenga kwa Daudi uko Hebuloni, niyo wamgamba, "Suwe kiwanduguzo wa sakame. 2 Aho kale, Sauli eze ande seuta weye wawalongozaga Waizilaeli mwe nk'hondo, naho Zumbe Mnungu, Mnungu ywako niyo akugamba, ‘Nounde kilongozi ywa want'hu wa Izilaeli naho nounde mkulu ywa want'hu wangu Izilaeli.’ 3 Ivo wadala wose wa Izilaeli waitaga kwa seuta Daudi uko Hebuloni, naye adamanyaga lagano nawo ha Zumbe Mnungu niyo wamkumba mavuta Daudi ande seuta ywa Waizilaeli viligane no ulosi wa Zumbe Mnungu enga ivo Zumbe alongile kombokela Samweli."

4 Daudi na Watowani wa Izilaeli wose waitaga kuutowa mzi wa Yelusalemu, Yelusalemu yamanyikaga enga Yebusi na awo Wayebusi wakaya wandaga wakekala umo. 5 Wakaya awo wa Yebusi wamgambaga Daudi, Howingile mwo mzi uno, ivo Daudi atahaga gomela dya Sayuni, akajika aho niyo wetangwa mzi wa Daudi. 6 Daudi niyo agamba, "Mnt'hu yoyose analongola ko kuwatowa Wayebusi, naande mkulu ywa watowani." Ivo Yoabu mwana Seluya andaga ywa nk'hongo kuwatowa, niyo anda mkulu ywawe. 7 Daudi niyo ekala mwe digomela idyo, ivo mzi uwo niyo wetangwa "Mzi wa Daudi." 8 Daudi auzengaga naho mzi uwo kukongela Milo na kuuzunguluka wose naho Yoabu audamanyaga mzi uwo uhya aho hasigalaga. 9 Daudi agendeelaga kunda na ludole kwaviya Zumbe Mnungu mta udahi andaga hamwenga naye.

10 Awa nawo wandaga wakulu wa watowani wa Daudi, hamwenga na want'hu wose wa Izilaeli, wamzumilaga kwa hamwenga vileke ande seuta enga ivo ulosi wa Zumbe Mnungu alongile na Waizilaeli.

11 Ulu nulo ludongo lwa watowani wadahi wa Daudi. awo Yashobeamu na Mhakimoni uyo andaga kilongozi ywa "Wadya watowani milongo mitatu." Yehe atoanaga kwa mjungo wakwe na kuwakoma want'hu magana matatu nk'hanana imwenga kwe nk'hondo. 12 Atimile andaga Eliazali mwana Dodai Mwahohi, mwa wadya watowani milongo mitatu. 13 Zuwa dimwenga Eliazali andaga hamwenga na Daudi uko Pas Damimu, umwo Wafilisiti weze wadugane kutowana nk'hondo. Uko kwandaga na nk'honde ya shayili nyingi, Waizilaeli nawo wawanyilikaga Wafilisiti. 14 Mna woho wakimalaga watogile hagati ye nk'honde iyo vileke isekuguhigwa, wawakomaga Wafilisiti. Zumbe Mnungu awambizaga kwa kuwenk'ha uhumi mkulu.

15 Wakulu watatu mwa wadya milongo mitatu waitaga kwa Daudi mwo luwe uko kwe mp'hanga ya Adulamu. Lupisi ulo watowani wa Wafilisiti wandaga watowa nk'hambi mwe dikolongo dya Lefaimu. 16 Daudi naye mwo lupisi ulo andaga mwe digomela, watowani wa Wafilisiti wandaga mwo mzi wa Betelehemu. 17 Daudi aonaga nk'hilu niyo agamba, "Namunk'hwamunk'hwa kunywa mazi kulawa mwe disima idi hagihi ne nk'hili yo mzi wa Betelehemu!" 18 Wadya watowani wakwe watatu wombokaga hagati ye nk'hambi ya watowani ya Wafilisiti, niyo wagenda kuteka amazi mwe disima idyo di hagihi ne nk'hili yo mzi niyo wamwigaila Daudi. Mna Daudi niyo alemela kunywa ayo niyo ayagidila hasi ha Zumbe Mnungu, 19 akagamba, Mnungu anamile nise kutenda ivi. "Togola ninywe sakame ya want'hu waungile nibanike!" Kwaviya nawakaunga nibanike kwa kuyaleta amazi aya. Ivo Daudi hazumile kuyanywa. Ayo nayo wadamanyaga wadya watowani wadahi watatu.

20 Abishai nduguye dya Yoabu andaga mkulu ywa watowani milongo mitatu. Yehe atowanaga kwa mjungo want'hu magana matatu niyo awakoma, ivo niyo anda mkulu mwa wadya watowani watatu. 21 Ivo amanyikaga mwa wadya watowani milongo mitatu naka tunyiswa niyo anda mkulu ywawe, mna hamanyikisaga enga wadya watowani watatu.

22 Benaya mwana Yehoyada kulawa Kabizeeli andaga mtowani mdahi, adamanyaga mbuli nyingi zo kwehela. Awakomaga watowani wadahi waidi kulawa Moabu, naho zuwa dimwenga mwo lupisi lwa balafu, aseelaga na kukoma simba he dibome. 23 Iviya iviya amkomaga Mmisili yumwenga, mnt'hu mtali vitendese, utali wakwe ujink'ha mita mbili, naho mwo mkono wakwe andaga kenula mjungo mkulu vitendese enga mti wa kufumila. Mna Benaya aitaga akanda ne ngoda du. Auguhaga mjungo uwo na kumkoma Mmisili uyo kwa mjungo wakwe mwenye. 24 Mbuli izi nizo adamanye Beyana mwana Yehoyada akanda na nt'hogola enga iidya ya wadya watowani milongo mitatu. 25 Ivo yehe andaga kamanyikisa kujink'ha wadya watowani wadahi milongo mitatu, mna yehe hamanyikise enga wadya watowani watatu. Daudi amuikaga kunda kilongozi mwe difyo dya wamizi wakwe.

26 Watowani wadahi wa Daudi wandaga ni Asaheli nduguye dya Yoabu na Elihanani mwana Dodo ywa Betelelemu, 27 Shamoti Mhalodi na Helesi Mpeloni, 28 Ila mwana Ikeshi kulawa Tekoa na Abiezeli kulawa Anatoti, 29 Sibekai Mhushati na Ilai Mwahohi, 30 Mahalai Mnetofati na Heledi mwana Baana Mnetofati, 31 Itai mwana Libai kulawa Gibea we dikabila dya Benjamini na Benaya Mpilatoni, 32 Hulai kulawa kwe vizuto va Gaashi na Abieli Mwaibati. 33 Azimaweti Mbahalumu na Eliaba Mshaaliboni, 34 wana Yasheni Mgiloni na Yonatani mwana Shagee Mhalali, 35 Ahiamu mwana Sakali Mhalali na Elifali mwana Uli, 36 Hefeli Mmekelati na Ahiya mpeloni, 37 Hezilo Mkalimeli na Naalai mwana Ezibai, 38 Yoeli nduguye dya Natani na Mibihali mwana Hagili, 39 Zeleki Mwamoni na Nahalai Mbeeloti andaga mwinula vitowanilo va Yoabu mwana Seluya, 40 Ila na Gelebu alawaga kwo mzi wa Itili, 41 Ulia Mhiti na Zabadi mwana Ahalai, 42 Adina mwana Shiza Mlubeni uyo andaga hamwenga na want'hu milongo mitatu. 43 Hanani mwana Maaka na Yoshafati Mmitini, 44 Uzia Mwashetelati na Shama na Yeieli mwana Hotamu alawile kwo mzi wa Aloeli, 45 Yediaeli mwana Shimli na mvunawe Yoha walaile kwomzi wa Tizi, 46 Elieli lawile kwommzi wa Hawi na Yelibai na Yoshavia wana Elinaamu na Itima Mmoabu, 47 Elieli na Obedi na Yaasieli walawile Sobai.