1 Akajika Nahashi seuta ywa Waamoni abanikaga, mwanawe niyo anda seuta hant'hu hakwe. 2 Ivo Daudi niyo agamba, Nenimtendele uwedi Haluni mwana Nahashi, kwaviya ise anitendelaga uwedi. Ivo Daudi atumaga ulosi mwa yadya yampatile kwa file ya Ise. Nawo waitaga kwa Haluni vileke wamsangalaze uko mwe isi ya Waamoni. 3 Mna vilongozi wa Waamoli wamgambaga seuta, "Haluse weye wagamba Daudi amtunya iso kwaviya kawatuma want'hu weze wakukaule? Ikindedi hiyo ivo. Want'hu awa, wapelembi watumigwe waipelemba isi, kuipelemba isi na kuikaula vileke waibananga!"

4 Ivo Hanuni awaguhaga wagela ulosi wa Daudi, niyo awamoga zindevu na kutatula zisuke zawe mgati kubula mwe mawambo niyo awalekela wakeitile. 5 Wageliswagwa soni hevadahike kuuya kaya. Daudi eze icho kilaile, awegailaga ulosi kugmba wekale uko Yeliko kubula aho ndevu zawe zikeza kusuka.

6 Waamoni weze wamanye kugamba wamtenda Daudi awaihiye, Hanuni na awo Waamoni wawatumaga want'hu wegale kilo alufu milongo mitatu na kane za masawa vileke wakodishe magali na awo wayakugendeza ne zifalasi kulawa Mesopotamia na Alam Maaka na Soba. 7 Magali magana milongo mitatu na maidi ya nk'hondo yakugendezwa ni falasi na wadya wakugendeza magali ayo hamwenga na seuta wa Maaka na watowani wakwe, wezaga na kutowa nk'hambi hagihi ne Medeba. Waamoni wakeikaga lumwe kulawa kwe mizi yawe yose niyo weza kwe nk'hondo. 8 Daudi eze eve mbuli izo amtumaga Yoabu na watowani wakwe wose. 9 Waamoni wafosaga na kukepanga mwe nk'hili yo mzi wa Laba, mzi wawe mkulu, mna wadya maseuta wezile wandaga wekedu mwe nt'hindiga.

10 Yoabu eze aone kugamba wank'hondo wakepanga kulongole kwakwe na kunyuma kwake, yehe asagulaga watowani wadahi mwe Izilaeli vileke wakatowane na Waalamu. 11 Wadya watowani watuhu wasigale, awaikaga mwo useuta wa Abishai nduguye, naye niyo awapanga vileke watowane na Waamoni. 12 Yoabu amgambaga Abishai, "Uneva Waalamu wana ludole kujink'ha miye wize unambize, mna uneva Waamoni wananda na ludole kujink'ha weye nenize hwambize. 13 Ivo kikenk'he moyo naho kitowane kigosi kwaajili ya want'hu wetu na kwaajili ye mizi ya Mnungu ywetu naho Zumbe Mnungu naakitendele diya akuona ni dyedi kwakwe." 14 Ivo Yoabu na want'hu wakwe wagendaga kutowana na Waalamu, Waalamu nawo niyo wanyilika. 15 Waamoni weze waone Waalamu wanyilika, woho nawo wagulukilaga hameso ha nduguye Abishai na kwingila ko mzi. Ivo Yoabu niyo auya Yelusalemu. 16 Mna Waalamu weze waone kugamba wahumwa ni Waizilaeli, watumaga wegala ulosi waite wakegale Waalamu watuhu awo wendile ng'ambo yo mto Eufulate. Watowani awo wandaga wakalongozwa ni Shafaki, mkulu ywa watowani ywa Hadadezeli vileke awalongoze. 17 Daudi eze apate ulosi awaduganyaga hamwenga Waizilaeli wose niyo adendeluka mto Yolodani na kuita niyo apanga vifyo va wadya wakuunga wakatowane. Daudi apangaga nk'hondo vileke atoane na Waalamu, nawo niyo watowane naye. 18 Mna Waalamu niyo wawanyilika Waizilaeli. Daudi awakomaga Waalamu wakugendeza magali alufu mfungate na watowani wakugenda lwa viga alufu milongo mine. Naho amkomaga Shofaki mtowani .mkulu ywa watowani. 19 Ivo maseuta wakulongozwa na Hadadezeli weze waone kugamba wahumigwa ni Waizilaeli, wadamanyaga lagano dya utondowazi na Daudi nawo niyo wanda wandima ywa Daudi. Ivo Waalamu hawezumile kuwambiza Waamoni naho.