1 Daudi akezengelaga nyumba mwo mzi wa Daudi, naho adamanyaga hant'hu kwajili ye Disanduku dye Ndagano dya Zumbe, niyo adizengela hema. 2 Niyo agamba, "Hahana mnt'hu yoyose akuunga adinule Disanduku dya Mnungu,mna ni Walawi du, kwaviya Zumbe Mnungu awasagulaga awo wedinule na kumdamanyila ndima mazuwa yose." 3 Ivo Daudi awaduganyaga Waizilaeli wose uko Yelusalemu vileke wadigale Disanduku dya Zumbe Mnungu hant'hu aho akeikilaga lumwe. 4 Daudi niyo awaduganya hamwenga welekwa wa Haluni na Walawi. 5 Kulawa mwo lukolo lwa Kohati, Ulieli andaga kilongozi ywa gana dimwenga na milongo miidi, 6 kulawa mwo lukolo lwa Melali, Asaya andaga kilongozi ywa wanduguze magana maidi na milongo miidi, 7 kulawa mwo lukolo lwa Gelishomu, Yoeli andaga kilongozi ywa wanduguze gana dimwenga na milongo mitatu, 8 kulawa mwo lukolo lwa Elisafani, Shemaya andaga kilongozi ywa wanduguze magana maidi, 9 na kulawa mwo lukolo lwa Hebuloni, Elieli andaga kilongozi ywa wanduguze milongo mnane, 10 na kulawa mwo lukolo lwa Uzieli, Aminadabu andaga kilongozi ywa wanduguze gana dimwenga mlongo na mbili.

11 Daudi niyo awetanga walavant'hambiko waidi Sadoki na Abiatali hamwenga na Walawi mtandatu, Awo Ulieli na Asaya na Yoeli na Shemaya na Elieli na Aminadabu, 12 niyo awagamba, "Nyuwe ni vilongozi wa lukolo lwa Walawi. Kikekuzeni hamwenga na wandugu zenyu Walawi vileke mkadiguhe Disanduku dya Zumbe Mnungu, Mnungu ywa Izilaeli kubula hant'hu aho diikilwe lumwe diikwe. 13 Kwaviya hamdikaulise aho nk'hongo nivo vikuleka Zumbe Mnungu ywetu nakanda na maya kwetu. Hakimuuzile ivo sigilizi yakwe ilongile."

14 Ivo walavant'hambiko hamwenga na Walawi wakekukizaga vileke wadigale Disanduku dya Zumbe Mnungu, Mnungu ywa Izilaeli. 15 Walawi niyo wadinula Disanduku dya Mnungu mwa maega yawe kwa miti yawe enga ivo Zumbe amgambile Musa wadamanye.

16 Daudi awagambaga vilongozi wa Walawi wasagule ndugu zawe wamwenga vileke wakeme kwa kinyemi, wakanda ne vyombo va ukemi, zeze na ving'weng'we na lupatu. 17 Ivo wawasagulaga want'hu awa kulawa mwo lukolo lwa wakemi. Hemani mwana Yoeli na Asafu nduguye uyo andaga mwana Belekia na wana Melali na ndugu zawe na Etani mwana Kushaya. 18 Wawasagulaga Walawi kunda wambizi wawe. Awo wandaga ni Zekalia na Yaazieli na Shemilamoti na Yahieli na Uni na Eliyabu na Benaya na Maaseya na Matisia na Elifelehu na Mikineya, na wamizi we nk'hili awo Obedi Edomu na Yeieli. 19 Ivo wakemi awo Hemaini na Asafu na Ethani wasagulagwa kutowa lupatu lwe shaba. 20 Zekalia na Azieli na Shemilamoti na Yehieli na Uni na Eliabu na Maaseya na Benaya wandaga watowa mazeze wakutimila maizwi ya Alamoti. 21 Mna Matisia na Elifelehu na Mikineya na Obedi Edomu na Yeieli na Azazia wandaga watowa mazeze kwa kulongozwa na maizwi ya Sheminiti. 22 Kwaviya Kenania andaga mmanyi mwo ukemi asagulwagwa kunda mkulu wa Walawi wakemi. 23 Belekia na Elikana wandaga wamizi we Disanduku dye Ndagano. 24 Shebania na Yoshafati na Netaneli na Amasai na Zekalia na Beyana na Eliezeli, awo wandaga walavant'hambiko waikwagwa kutowa magunda hameso ha Zumbe Mnungu. Odedi Edomu na Yehiya waikwagwa kunda wamizi we Disanduku dye Ndagano.

25 Ivo elo Daudi hamwenga na wadala wa Izilaeli na watowani wakulu maalufu alufu, wagendaga kudiguha Disanduku dye Ndagano dya Zumbe kulawa mwe nyumba ya Obedi Edomu kwa kinyemi. 26 Niyo wamlavila nt'hambiko Mnungu, majeku mfungate na madolome mfungate kwaviya Mnungu awambizaga Walawi kudinula Disanduku dye Ndagano. 27 Daudi andaga kavala suke zedi zing'aile enga ivo wavaile Walawi wose wedinule Disanduku, wakemi wadya nawo wavalaga enga iivo hamwenga na Kenania uyo andaga kilongozi ywawe wo ukemi. Daudi andaga kavala kizibau cha suke ing'aile. 28 Ivo Waizilaeli wose wadiguhaga Disanduku dye Ndagano kwa kinyemi na kwa izwi dya magunda na lupatu na izwi kulu dya mazeze na ving'weng'we.

29 Disanduku dya Ndagano dya Zumbe Mnungu umwo dyandaga dikengila mwo mzi wa Daudi, Mikali mwanakike ywa Sauli asunguiilaga mwe dilanga niyo amwona seuta Daudi aseziga kwa kinyemi, ivo ambelaga mwo moyo wakwe.