1 Daudi eze ande kadalahalisa, amuikaga mwanawe Selemani kunda seuta ywa Izilaeli.

2 Seuta Daudi awetangaga wakulu wose wa Izilaeli hamwenga na walavant'hambiko na Walawi. 3 Walawi wose wagosi kukongela miyaka milongo mitatu na kugendeela wawazagwa, wose wandaga ni alufu milongo mitatu na mnane. 4 Daudi awapangaga ivi, alufu milongo miidi na wane nawadamanye ndima mwe Nyumba ya Zumbe na alufu mtandatu nawande waika nk'humbukila na walamuzi, 5 na alufu nne nawande waamizi we Nyumba ya Mnungu naho alufu nne nawande wakemi wakumtunya Zumbe Mnungu kwa wila uwo audamanyaga seuta mwenye kwaajili ya kumtogola.

6 Daudi awapangaga Walawi mwa mafyo matatu viligane ne nk'holo za kabila dya Lawi: Nk'holo ya Gelishoni na nk'holo ya Kohasi ne nk'holo ya Melali.

7 Wana Gelishoni wandaga waidi, wana awo ni Ladani na Shimei. 8 Ladani andaga na wana watatu, wana awo ni Yehieli mkulu ywawe na Zetamu na Yoeli. 9 Wana Shimei wandaga watatu wana awo ni Shelomiti na Hazieli na Halani. Awa wandaga vilongozi wa lukolo lwa Ladani. 10 Wana Shimei wandaga wane, wana awo ni Yahati na Zina na Yeushi na Belia. 11 Yohati niye andaga mkulu wawe, akitimilwa ni Zina mna Yeushi na Belia kwaviya wandaga hawana welekwa wengi nawazigwa kunda lukolo lumwenga.

12 Wana Kohati wandaga wane, wana awo ni Amlamu na Ishali na Hebuloni na Uzieli. 13 Wana Amlamu wandaga Haluni na Musa. Haluni asagulwagwa ande nuyo ywa kuika ukuki vyombo vikukise naho welekwa wakwe wande nawo wakafunk'hiza ubani ho undiilo wa Zumbe Mnungu wakamdamanyila ndima na kuwavikila want'hu kwa ukuki wa Zumbe Mnungu mazuwa yose. 14 Mna wana Musa mnt'hu ywa Mnungu, wawazagwa mwe dikabila dya Lawi. 15 Wana Musa wandaga ni Gelishomu na Eliezeli. 16 Shebueli niye andaga mkulu mwa wana Gelishomu. 17 Eliezeli andaga na mwana yumwenga du, Lehabia naye andaga kilongozi mna Lehabia andaga na welekwa wengi vitendese.

18 Ishali amwelekaga Shelomiti, kilongozi ywe dikabila dyose. 19 Wana Hebuloni wandaga wane awo Mkulu wawe andaga Yelia, wa kaidi ni Amali, ywa katatu ni Yahazieli na ywa kane ni Yekameamu. 20 Wana Uzieli wandaga waidi awo Mika mkulu ywawe na ywa kaidi ni Ishia.

21 Melali andaga na wana waidi awo Mali na Mushi. Wana Mali wandaga waidi awo Eliazali na Kishi. 22 Eleazali abanikaga haheina mwana kilume mna andaga na wana kike du. Wandele awo niyo walombigwa ni sovize wana Kishi. 23 Wana Mushi wandaga watatu awo Mali na Edeli na Yelomoti.

24 Awa nawo wana Lawi viligane ne zink'holo zawe ne zimp'huga zawe. Kila yumwenga ywawe mta miyaka milongo miidi na kugendeela, awandikagwa dizina dyakwe naho adamanyaga ndima mwe Nyumba ya Zumbe Mnungu.

25 Daudi niyo agamba, "Zumbe Mnungu, Mnungu ywa Izilaeli kawenk'ha want'hu wakwe kutondoala, naye neekale Yelusalemu ulo na ulo. 26 Kwa ivo Walawi hawaungwe naho kudisamiza Dihema Dikukile hegu vyombo vakwe va mviko." 27 Vikuligana na malagizo yo uheelo ayalavile Daudi, Walawi wose wakubula miyaka milongo miidi waandikagwa kwa ndima ya mwe Nyumba ya Mnungu. 28 Ndima yawe ni kuwambiza Walawi na walavant'hambiko wo lukolo lwa Haluni kudamanya ndima mwe nyumba ya Zumbe, kuviika vedi vyombo vikukile vose na kudamanya ndima zikuungigwa mwe nyumba ya Zumbe Mnungu. 29 Wandaga wakimalizi wa ndima yo kudamanya mikate ikukile, malavo ya unga udinyigwe, malavo ya nk'hande, mikate haigeilwe ugwadu na malavo yo kokwa na malavo yahanganywe na mavuta. Walawi awo nawo waungagwa kumanya vihimo vose ukulu. 30 Wakimalaga ha Zumbe Mnungu kwa kumtogola na kumtunya mtondo na kisingi, 31 na malavo zo kokwa yakalavigwa kwa Zumbe mwe dizuwa dyo Kuhumula dyo mwezi mhya, na mwe mwa mazuwa ya kinyemi yasagulwe. Sigilizi ziikigwe wo uwazilo wa Walawi walagizwe kudamanya ndima izo ha Zumbe Mnungu mazuwa yose. 32 Ivo nivo Walawi wadamanyaga mwe Dihema dyo Dikukile na hant'hu hakukile na kuwambiza wandugu zawe walavant'hambiko wa welekwa wa Haluni, mwo undima mwe nyumba ya Zumbe Mnungu.