1 Ivi nivo wapangwagwa wamizi we nk'hili. Kulawa mwo lukolo lwa Kola andaga Mashelemia mwana Kole ywe mp'huga lwa Asafu. 2 Meshalemia andaga na wana kilume mfungate, Zekalia andaga nt'hulasasu, Yediaelia andaga niye ywa kaidi, ywa katatu andaga ni Zebadia, ywa kane andaga ni Yatinieli, 3 ywa shano andaga ni Elamu, ywa mtandatu andaga ni Yohanani, ywa mfungate andaga ni Eliehoenai.

4 Naho kwandaga na Obedi-Edomu, uyo Mnungu amvikilaga kwa kumwink'ha wana mnane. Shemaya akanda nt'hulasasu, ywa kaidi andaga ni Yehozabadi ywa katatu andaga ni Yoa, ywa kane andaga ni Sakali, ywa shano andaga ni Netaneli, 5 ywa mtandatu andaga ni Amieli, ywa mfungate andaga ni Isakali, ywa mnane andaga ni Peuletai.

6 Mwanawe Shemaya nae apataga wana kilume awo wandaga vilongozi mwo lukolo lwa tati yawe, kwaviya wandaga wagosi wata udahi mkulu. 7 Shemaya nt'hulasasu ywa Obedi-Edomu andaga na wana kilume mtandatu. Wana awo ni Otini na Lefaeli na Obedi na Elizabadi, wanduguze awo Elihu na Semakia wandaga nawo want'hu wata udahi.

8 Wose awo wana Obedi-Edomu awo wana wawe na wandugu zawe wandaga want'hu wata udahi wakudaha kudamanya ndima. Welekwa wose wa Obedi-Edomu wandaga milongo mtandatu na mbili. p 9 Meshelemia nae andaga na wana kilume na wanduguze. Mwa awa wose, want'hu wandaga na udahi we ndima iyo wandaga mlongo na mnane.

10 Hosa ywo lukolo lwa Melali andaga na wana kilume wane, Shimili uyo asagulwe ni ise ande kilongozi, mna yehe handaga nt'hulasasu. 11 ywa kaidi andaga ni Hilikia, ywa katatu andaga ni Tebalia na ywa kane andaga ni Zekalia. Wana kilume wose wa Hosa hamwenga na wanduguze wandaga mlongo na watatu.

12 Wamizi awa we nk'hili wapangwagwa viligane na vilongozi wawe, nawo wadamanyaga ndima mwe nyumba ya Zumbe enga ivo wandugu zawe wadamanyaga. 13 Kila mp'huga haheina kukaula wingi wawe yatowaga kula vileke wasagule ink'hili wakuunga wakimamile. 14 Kula ya kusagula wamizi we nk'hili ya ulailo wa zuwa apataga Shelemia. Naho watowaga kula kwaajili ya mwanawe Zekalia uyo kilongozi mta umanyi, niyo apata kula ya kunda mwamizi ywe nk'hili ya mkoma mahanya. 15 Kula kwajili ye nk'hili ya Kwa mwenye mzi yamgweelaga Odedi- Edomu, kula int'huhu yawagweelaga wanawe kwajili ye nyumba yo kuikila vint'hu. 16 Shupimu na Hosa wasagulwagwa kwa kula mwo wamizi wa kuhokezana we zink'hili za usweelo wa zuwa hamwenga ne nk'hili ya Shaleketi kwe sila ya nt'hendelo ya kukenya ye nyumba ya Mungu. 17 Kila zuwa kwandaga na wamizi mtandatu kwe nt'hendelo yo ulailo wa zuwa, wane nawo nt'hendelo ya mkoma mahanya, wane watuhu nt'hendelo ya Kwa mwenye mzi, na waidi watuhu, kwe nyumba ya kuikila vint'hu. 18 Uku kwe balaza kuhinga usweelo wa zuwa, uko waikwagwa wamizi wane kwe sila, waidi nawo waikwagwa kwe balaza iyenye. 19 Ivo nivo wapangigwe wamizi we zink'hili awo welekwa wa Kola na Melali.

20 Mwa Walawi Ahiya andaga mkaulizi ywe vindolo mwe Nyumba ank'hulu ya Mnungu na vint'hu viikigwe kwa ndima ya Zumbe. 21 Ladani yumwenga mwa wana Glishoni andaga niye mkale ywa mp'huga nyingi ikanda ni hamwenga ne mp'huga ya mwanawe Yehieli. 22 Wana kilume wa Yehieli awo, Zetamu na Yoeli, wandaga wakaulizi we kindolo che Nyumba ya Mnungu.

23 Iviya iviya ndima za kwe Nyumba ank'hulu ya Mnungu nezipangilwa kwa welekwa wa Amlam na Waishali na Wahebuloni na Wauzieli.

24 Shebueli mwelekwa ywa Gelishoni, mwana Musa andaga mkaulizi mkulu we vindolo. 25 Na wanduguze mwa welekwa wa Eliezeli wandaga ni Lehabia, Yeshaya, Yolamu, Zikili na Shelomiti. 26 Shelomiti na wanduguze wandaga wakaulizi we vindolo ve vint'hu viikigwe kwa ndima ya Zumbe Mnungu ni seuta Daudi na wakulu we zink'holo maalufu, na wakulu wa watowani magana, na wakulu wa watowani watuhu. 27 Vint'hu vimwenga vatahigwe kwe nk'hondo waviikaga kwajili ya kudamanyila nyumba ya Zumbe Mnungu idya imoligwe. 28 Na vint'hu vose vilavigwe ni mlotezi Samweli kwa undima wa mwe Nyumba ank'hulu ya Mnungu hamwenga na Sauli mwana Kishi na Abineli na Yoabu mwana Seluya, vandaga mwo ukimalizi wa Shelomiti hamwenga na wanduguze.

29 Kulawa mwe welekwa ywa Waishali, Kenani na wanawe wenk'hagwa ndima kuse ye Nyumba ya Mnungu enga wakulu wa want'hu naho walamuzi wa masa mwe Izilaeli. 30 Kulawa mwe welekwa wa Wahebuloni, Hashabia na wanduguze, want'hu alufu imwenga na magana mfungate wakuhuwilwa udahi wenk'hagwa ndima yo kuikimaila Izilaeli izo zandaga nt'hendelo yo usweelo wa zuwa yo mto Yolodani. Wakimailaga ndima yose ya Zumbe Mnungu na ndima ya maseuta. 31 Mwo welekwa ywa Hebuloni, Yelia andaga niye kilongozi ywe zink'holo zose naho mwo mhilimo wa milongo mine yo useuta wa seuta Daudi, wazungulaga wagosi wata udahi mkulu wawapataga uko Yezeli mwe Gileadi. 32 Seta Daudi amsagulaga Yeliya na wndugu zakwe want'hu alufu mbili na magana mfungate wadanga want'hu wahuwilwa na vilongozi we zink'holo wakimaile mbuli zos za Mnungu na seuta Daudi mwe na hant'hu ha Walubeni, na Wagadi ne nusu ye dikabila dya Manase zandaga nt'hendelo ya Ulailo wa zuwa wa Manase .