1 Ivo Daudi niyo agamba, "Nyumba ya Zumbe Mnungu nainde hant'hu aha, ne kilingo icho want'hu wa Izilaeli nawalavile malavo yo kokwa."

2 Daudi niyo alava sigilizi kwa watakwiza wandile wakekala mwe isi ya Izilaeli wakeduganye, naye niyo awapangila ndima. Niyo awaika wadya wakusongola maiwe kwajili yo kuzengela Nyumba ank'hulu ya Mnungu. 3 Daudi niyo alava vilama vingi va kudamanyila mitunga na madanga kwa kulunganyila zinyivi, naho niyo alava shaba ibindile wingi heikuhimika. 4 Naho alavaga miti ya mielezi ibindile wingi kwaviya Watilo na Wasidoni wamwigailaga Daudi. 5 Daudi niyo agamba, "Nyumba iyo mwanangu Selemani akuunga amzengele Zumbe Mnungu neinde yedi naho neitogolwe mwe isi yose. Mna kwaviya yehe akei mbwanga naho akei kudaha vedi, vaungwa nimuike lumwe." Ivo elo Daudi aikaga lumwe vint'hu vingi vo kuzengela umwo akanda akei kubanika.

6 Ivo Daudi niyo amwitanga na kumsigila Selemani mwanawe, na kumgamba amzengele Zumbe Mnungu, Mnungu ywa Izilaeli Nyumba. 7 Daudi niyo amgamba Selemani, "Mwanangu nehiungisa nimzengele Zumbe Mnungu, Mnungu ywangu nyumba vileke nimtogole. 8 Mna Zumbe niyo anigamba, hikoma want'hu wengi kwa kutowana nk'hondo zibindile wingi mwe isi, hounizengele nyumba. 9 ‘Mna noupate mwana kilume uyo akuunga ande na utondowazi kwa wank'hondo wakwe nt'hendelo zakwe zose. Zina dyakwe neetangwe Selemani, kwaviya mazuwa yo useuta wakwe naaigaile Izilaeli utondowazi. 10 Yehe niye naanizengele nyumba kwaajili ya nt'hogola ye dizina dyangu. Naande mwanangu name neninde ise naho welekwa wakwe nawailongoze Izilaeli ulo na ulo.’"

11 "Haluse mwanangu, Zumbe Mnungu, Mnungu ywako ande hamwenga na weye vileke udahe kumzengela nyumba enga ivo agambile noudamanye. 12 Zumbe Mnungu akwink'he umanyi no ubala vileke uwalongoze Izilaeli, utoze sigilizi zakwe Zumbe Mnungu, Mnungu ywako. 13 Unanda na wengele na kutimila zisigilizi za Zumbe Mnungu izo amsigiilaga Musa kuwenk'ha Waizilaeli, noudahe. Utoge na usekogoha naho usekwingila chevu. 14 Hikombekesa vileke nipate vint'hu va kuzengela nyumba ya Zumbe, tani laki imwenga za zahabu na tani milioni imwenga za masawa na shaba ne vilama vibindile wingi. Hiika lumwe zimbao na maiwe weye nawe waungigwa uviongezele. 15 Una wandima wabindile wingi. Kuna wakusongola maiwe na wazesi na wakusongola zimbao na want'hu wamanyize ndima zi hengi, 16 wakudamanya vint'hu va zahabu na va masawa na va shaba na va vilama. Haluse konga ndima Zumbe Mnungu na ande hamwenga nawe."

17 Ivo Daudi awalagizaga vilongozi wose wa Izilaeli wamwambize mwana Selemani. 18 Niyo awagamba, "Togola Zumbe Mnungu, Mnungu ywetu hehamwenga na nyuwe? Togola hewenk'hile utondowazi nt'hendelo zose? Yehe anitendaga niwahume want'hu wakwikala mwe isi ino naho isi imwo udahi wa Zumbe na want'hu wakwe. 19 Haluse kelaveni mioyo yenyu mwo kumvika Zumbe Mnungu, Mnungu ywenyu. Ivo elo kimaleni mkamzengele Zumbe Mnungu Hant'hu Hakukile vileke kudileta Disanduku dya Ndagano dya Zumbe hamwenga ne vyombo vose vikukile va Mnungu mndani mwe nyumba ikuungwa kuzengwa kwaajili ya kuditogola zina dya Zumbe."