1 Seuta Daudi awetangaga uko Yelusalemu vilongozi wose wa Izilaeli, wa makabila na watowani wakulu wa mafyo wakumdamanyila ndima seuta naho watowani wakulu maelufu elufu na watowani wakulu magana gana na wakimalizi wa ugoli wose we mifugwa ye seuta na wanawe hamwenga na wakulu we nyumba ye kiseuta na watowani wose wata udahi.

2 Want'hu wose weze wnde aaho, Seuta Daudi akimalaga niyo agamba, Nyuwe want'hu wangu. Naungaga mwo moyo wangu nizenge hant'hu ho kuika Disanduku dye Ndagano dya Zumbe Mnungu, vileke kidaha kita aho vileke kikamvike Zumbe Mnungu, naho nakiikilaga lumwe vint'hu vose vo kuzengela. 3 Mna Mnungu anilemezaga kwaviya miye ni mnt'hu ywa nk'hondo hitowana naho hikoma want'hu wengi. 4 Mna Zumbe Mnungu, Mnungu ywa Izilaeli anisagulaga miye mwe nk'holo ya tate yangu kunda seuta ulo na ulo. Adisagulaga dikabila dya Yuda dilongoze naho viligane ne dikabila idyo asagulaga nk'holo ya tate yangu na wana wa tate yangu, ahelelagwa ni miye niyo aniika ninde seuta ywa Izilaeli yose. 5 Zumbe Mnungu kanink'ha wana wengi naho mwa awo wose kamsagula Selemani mwanangu vileke akaile difumbi dyo useuta wakwe Zumbe Mnungu ailongoze Izilaeli.

6 "Zumbe Mnungu anigambaga, ‘Mwanao Selemani niye akuunga anizengele nyumba no uwa, kwaviya himsagula yehe ande mwanangu, name neninde Ise. 7 Neniugendeze useuta wakwe mazuwa yose uneva anatimila zisigilizi zangu ne imiko yangu enga ivo akutenda hata dielo.’

8 "Ivo elo, nawalagiza ho undiilo wa Izilaeli wose na mwo mdugano wa want'hu wa Zumbe Mnungu na ha Zumbe Mnungu ywetu, mzitoze zisigilizi zose za Zumbe Mnungu, Mnungu ywenu, vileke isi ino yedi igendeele kunda yenyu naho unde ukipe wa welekwa wenyu ulo na ulo."

9 "Mwanangu Selemani nawe, ummanyise Mnungu ywa iso naho umvike kwa moyo wako wose na kwa ubala wako, kwaviya Zumbe Mnungu aikaula mioyo naho ammanya zifanyanyi zo mnt'hu. Unamzungula noumwone mna unamleka naakuleke ulo na ulo. 10 Ivo ukaulise na kukumbukila kugamba, Zumbe Mnungu kakusagula weye vileke umzengele nyumba ya kuvikila. Unde mdahi ukadamanye ivo."

11 Daudi amwink'haga mwanawe Selemani mliganyizo wa ivo vikuungwa vinde mwo kuzengwa uwa we nyumba ya Zumbe Mnugu na nyumba na magulu ya kuikila vint'hu vakwe, na hant'hu ha kulanga, vyumba va kundani na hant'hu hakukise. 12 Amgambilaga vose ivo Muye akukile aikaga mwo moyo wakwe kwajili ye zibalaza ze Nyumba ya Zumbe Mnungu na nyumba ya kuikila vint'hu kwaajili ya ndima ya Mnungu. 13 Naho amgambilaga iviaivia amwink'haga mzungu wa kuwapanga walavant'hambiko na Walawi naho awapangaga kwaajili ye ndima zose zi mwe Nyumba ank'hulu ya Mnungu na kuviika vedi vint'hu vose va mwe Nyumba ank'hulu ya Mnungu. 14 Amwink'haga zahabu ikuungigwa kwa kudamanyila vint'hu vose va zahabu, masawa ayo yakuungwa kudamanyila vint'hu va masawa nevikaungwa mwo undima. 15 Amwink'haga zahabu kwajili yo kusana kila kint'hu cho kuikila vimuli vakwe. Naho amwink'haga masawa kwa kusanila kila kint'hu cho kuikila vimuli cha masawa ne vimuli vakwe viligane na ivo vikuungwa, 16 na zahabu ya kudamanyila meza ya kuikila mikate ilavigwe kwa Mungu, na masawa ya kudamanyila meza zint'huhu, 17 naho alavaga malagizo kugamba zahabu yedi ikuungigwa kudamanyila makoleo na mabiga ne vikombe na masawa yakuungigwa kudamanyila nyiga za masawa, 18 na zahabu yedi ya kudamanyila kilingo cho kufunk'hizila ubani. Amwink'haga naho mliganyizo wakwe we digali dya zahabu dya viumbwa wata mawawa wayagubulaga mawawa na kudigubika Disanduku dya Ndagano dya Zumbe Mnungu. 19 "Aya yose seuta Daudi ayaikaga pwilili kwa kuwandika ivo alagiswe ni Zumbe Mnungu vileke ndima yose idamanyike viligane na ivo alagiswe."

20 Seuta Daudi niyo amgamba mwanawe Selemani, "Utoge naho unde mdahi, udamanye ndima ino. Usekogoha naho usekwingila chevu, kwaviya Zumbe Mnungu uyo endile Mnungu ywangu he hamwenga nawe. Hakuleke mna naande nawe kubula umwo eze ibinde ndima yose ikuungigwa mwe nyumba ya Zumbe Mnungu. 21 Walavant'hambiko na Walawi wapangilwa kale ndima izo wakuunga wadamanye mwe Nyumba ank'hulu ya Mnungu. Naho kila mnt'hu kwa kuunga kwakwe mta umanyi wa kila ndima naakwambize mwe zindima zose. Vilongozi na want'hu wose nawadamanye kila icho nouwagambe wadamanye."