1 Seuta Hilamu ywa Tilo atumaga wegala ulosi kwa Daudi, wamwigailaga miti ye mielezi, wazesi wa kuzenga kwa kusongola maiwe na wadya wakusongola miti vileke wamsengele Daudi nyumba ye kiseuta. 2 Ivo Daudi amanyaga kugamba Zumbe Mnungu kamtenda kunda seuta ywa Izilaeli naho useuta wakwe utogoleswa kwajili ya want'hu wose wa Izilaeli.

3 Uko Yelusalemu, Daudi alombaga wavele wabindile wingi, niyo eleka wana kilume na wana kike wengi. 4 Aya nayo mazina ya wana welekwe uko Yelusalemu, Shamua na Shobabu na Natani na Solomoni, 5 Ibahali na Elishua na Elipeleti, 6 Noga na Nefegi na Yafia, 7 Elishama na Beeliada na Elifeleti.

8 Wafilisiti weze weve kugamba Daudi kakumbwa mavuta kunda seuta mwe isi yose ya Izilaeli, watowani wose wafosaga wakamzungule, Daudi eze eve kugamba azungulwa afosaga vilieke atowane nawo. 9 Wafilisiti wabulaga mwe dikolongo dya Lefaimu niyo wakonga kuwahoka want'hu vint'hu vawe. 10 Ivo Daudi amuuzaga Mnungu, "Haluse niite hawatowe Wafilisiti? Nounink'he udahi wa kuwahuma?" Zumbe Mnungu niyo amgamba, "Ita, nohwink'he udahi wa kuwahuma." 11 Ivo Daudi aitaga uko Baal Pelasimu, awahumaga niyo agamba, Mnungu kawatenda watowani wangu wawahume wank'hondo wangu kwa kukehenyeza enga ivo yeli malao. Ivo hant'hu aho hetangwagwa Baal Pelasimu, kwa ulosi wa Kiibulania nuko kugamba Zumbe omboka hant'hu hafinyu. 12 Wafilisiti umwo wakanyilika wayasaga milungu yawe uko, Daudi niyo agamba yokwe moto. 13 Wafilisiti wawahokaga Waizilaeli mwe dikolongo idyo kaidi. 14 Daudi amuuzaga Mnungu naho, Mnungu niyo amhitula, "Usekuwatowela kulawa aha, mna watemangize kulawa kwe miti ya mifolosadi. 15 Aho ukeza kwiva sindo enga fyo dya watowani wakomboka kulanga kwe miti iyo ye mifolosadi, niho noufose wiite ukatowane nk'hondo, kwaviya Zumbe Mnungu kakulongoela akatowane na Waifilisiti." 16 Daudi atendaga enga ivo alagizwe ni Mnungu, awatowaga watowani wa Kifilisiti kulawa Gibeoni kubula Gezeli. 17 Ivo Daudi amanyikaga mwe isi yose, Zumbe naye atendaga want'hu wa isi zose wamwogohe Daudi.