1 Mwo lupisi ulo seuta Daudi awatowaga Wafilisiti na kuwahuma, niyo autaha mzi wa Gati hamwenga ne zikaya zakwe izo wandaga wakekala Wafilisiti. 2 Awahumaga Wamoabu, niyo wanda wandima wakwe naho wamlihaga kodi.

3 Naho Daudi amtowaga Hadadezeli seuta ywa Soba kubula mwe isi yandaga hagihi na Hamati, adamanyaga ivo umwo andaga akagenda kukimalisa mkola wa kukumbukila mwa zint'hendelo zo mto Eufulate. 4 Daudi atahaga magali yakugendezwa ni falasi alufu mlongo, watowani wakugendeza falasi alufu mfungate na gana na watowani wakugenda lwa viga alufu mbili na gana. Daudi isengaga zink'wali za viga vo kunyuma ve zifalasi mna awasigazaga falasi za magali gana. 5 Waalamu wa Damesiki weze waite kumwambiza Hadadezeli seuta ywa Soba, Daudi awatowaga na kuwakoma want'hu alufu milongo miidi na waidi. 6 Daudi niyo aika nk'hambi za watowani mwe mzi ywa Shamu ya Damesiki. Ivo awalongozaga Waalamu naho walihaga kodi. Zumbe Mnungu amwink'haga Daudi uhumi kila hant'hu aitaga. 7 Daudi aziguhaga nk'hindo za zahabu ziinule wakulu wa watowani wa Hadadezeli na kuzigala Yelusalemu. 8 Naho Daudi aguhaga shaba nyingi vitendese kulawa kwo mzi wa Tibahati na mzi wa Kuni iyo yandaga mizi ya Hadadezeli. Akajika kwe shaba iyo Solomoni adamanyaga mkola uwo na vint'hu vituhu ve Nyumba ank'hulu ya Mnungu.

9 Seuta Tou wa Hamati eze eve kugamba Daudi kawahuma watowani wose wa Hadadezeli seuta ywa Soba, 10 ivo amtumaga mwanawe Hadolamu kwa seuta Daudi vileke amlamse na kumvika kwaviya andaga katowana na Hadadezeli na kumhuma kwaviya Hadadezeli atowanaga na Tou nk'hanana nyingi. Hodolamu amwigailaga Daudi mageleko ya vint'hu vidamanywe kwa masawa na zahabu na shaba. 11 Seuta Daudi ayaikaga mageleko ayo kunda yakuka kwa ndima ya Zumbe Mnungu hamwenga ne masawa na zahabu iyo aiguhaga kulawa mwe si zose izo za Edomu na Moabu na Amoni na Filisiti na Amaleki.

12 Abishai mwana Seluya awakomaga Waedomu afulu mlongo na mnane mwe dikolongo dyo munyu. 13 Ivo aikaga nk'hambi za watowani uko Edomu, naho Waedomu wose wandaga wandima wa Daudi. Zumbe amwink'haga Daudi uhumi kila hant'hu aho aitaga.

14 Ivo Daudi alongozaga mwe Izilaeli yose na kuwadamanyila uwagilwa want'hu wose haheina kwazagula. 15 Yoabu mwana Seluya andaga kilongozi mkulu ywa watowani, Yehoshafati mwana Ahiludi andaga akaika nk'humbukila. 16 Sadoki mwana Ahitubu na Ahimeleki mwana Abiatali wandaga walavant'hambiko, Shausha andaga akawandika yakulaila, 17 Benaya mwana Yehoyada naye niyo awakimaila watowani wamizi Wakeleti na Wapeleti, wana Daudi wandaga wakulu mwo ulongozi wakwe.