1 Ulu nulo ludongo lwa wakulu we zimp'huga za Waizilaeli, wakulu wawatowani maalufu na wakulu wa watowani wa magana na wakulu vilongozi wawe awo wandaga vilongozi awo wamdamanyilaga seuta Daudi kwa kukimaila vifyo va watowani awo wandaga mwo luzo lwa mwezi umweumwe mwo mhilimo wose. Kila kafyo kandaga na watowani alufu milongo miidi na wane.

2 Yashobeamu mwana Zabidieli andaga kilongozi ywe difyo dya nk'hongo mwo mwezi wa nk'hongo. Fyo dyakwe dyandaga na want'hu alufu milongo miidi na wane. 3 Yehe andaga mwelekwa ywa Pelesi, uyo andaga mkulu ywa watowani wose mwo mwezi wa nk'hongo. 4 Dodai andaga kilongozi ywa fyo dya kaidi mwo mwezi wa kaidi. difyo dyakwe kandaga na watowani alufu milongo miidi na wane. 5 Mtowani mkulu ywa fyo dya katatu dyandaga na watowani alufu milongo miidi na wane, uyo andaga Benaya mwana Yehoyada uyo andaga mlavant'hambiko. 6 Uyu niye Benaya andaga mtowani mdahi mwa kayo ka want'hu milongo mitatu naho niye andaga kilongozi ywe difyo idyo. Naye Amizabadi mwanawe andaga mtowani mkulu mwe difyo dyawe. 7 Asaheli nduguye Yoabu andaga ywa kane akulongoza fyo dya kane dyandaga na watowani alufu milongo miidi na wane niyo hant'hu hakwe mwo useuta haguhigwa ni Zebadia mwanawe. 8 Wa shano mwo mwezi wa shano andaga ni Shamhuti Mwizilahi uyo andaga na fyo dya watowani alufu milongo miidi na wane, 9 mwo mwezi wa mtandatu andaga ni Ila mwana Ikeshi kulawa Mtekoa andaga na fyo dya watowani alufu milongo miidi na wane. 10 Mwezi wa mfungate andaga ni Helesi Mpeloni mwana Efulaimu, yehe andaga na fyo dya watowani alufu milongo miidi na wane. 11 Mwezi wa mnane andag ni Sibekai Mhushati ywa Wazela andaga na fyo dya watowani alufu milongo miidi na wane. 12 Mwezi wa Kenda andaga ni Abiezeli Mwanatoti ywa Wabenyamini uyo andaga na fyo dya watowani alufu milongo miidi na kane. 13 Mwezi wa mlongo andaga ni Mahalai Mnetofati ywa Wazela uyo andaga na fyo dya watowani alufu milongo miidi na wane . 14 Mwezi wa mlongo na imwenga andaga ni Benaya Mpilatoni ywa Wai fulaimu naye andaga na fyo dya watowani alufu milongo miidi na wane. 15 Mwezi wa mlongo na kaidi andaga ni Helidai Mnetofati ywa Otinieli naye andaga na fyo dya watowani alufu milongo miidi na wane.

16 Awa nawo wakulu walongoze makabila ya Izilaeli. Kwa Walubeni andaga ni Eliezeli mwana Zikili na kwa Wasimeoni andaga ni Shefatia mwana Maaka, 17 kwa Walawi andaga ni Hashabia mwana Kemueli na kwa Haluni andaga ni Sadoki. 18 Kwa Yuda andaga ni Elihu yumwenga mwa wandugu wa seuta Daudi na kwa Waisakali andaga ni Omli mwana Mikaeli, 19 kwa Wazabuloni andaga ni Ishimaya mwana Obadia na kwa Wanafutali andaga ni Yelemoti mwana Azilieli, 20 kwa Waefulaimu andaga ni Hoshea mwana Azazia na kwe nusu ye dikabila dya Manase andaga ni Yoeli mwana Pedaya. 21 Kwe nusu ye dikabila dya Manase mwe Gileadi, andaga ni Ido mwana Zekalia, na kwa Wabenyamini andaga Yaasieli mwana Abineli. 22 Kwe dikabila dya Dani andaga ni Azaleli mwana Yelohamu. Awa nawo wakulu wa makabila ya Izilaeli.

23 Seuta Daudi andaga hawawazaga wadya wandaga na lika dya miyaka milongo miidi kwaviya Zumbe Mnungu aikaga kilapi kuwagenyeza Waizilaeli wande wengi enga nt'hondo za kwe mbingu. 24 Yoabu mwana Seluya akongaga kuwawaza mna habindaga kwaviya Mnungu afaga maya kwe mbuli yo kuwazigwa kwawe. Naho uwazilo uwo hauwandikwe mwe kitabu che nk'humbukila cha seuta Daudi.

25 Akimailaga vindolo va seuta andaga Azimaveti mwana Adieli,Yonatani mwana Uzia naye niye andaga mkimalizi ywo ugoli mwe isi ne mizi ne zikaya na magomela. 26 Uyo akimailaga walimi andaga Ezili mwana Kelubu. 27 Akimailaga ndima mwe migunda ya mizabibu ye kiseuta andaga ni Shimei kulawa kwo mzi wa Lamati, naho akimailaga want'hu wakudamanya divai na kuiika vedi andaga ni Shifimi. 28 Akimailaga migunda ya mizeituni ne mikuyu andaga ni Baali-Hanani kulawa kwo mzi wa Gedeli, naho akimailaga zinyumba zaikilaga mavuta ni Yoashi 29 Akimailaga mifugwa iyo andaga Shaloni, akimailaga mifugwa yandaga mwe makolongo andaga ni Shafati mwana Adilai. 30 Akimailaga ngamia andaga Obili Ishmaeli naho akimailaga zimp'hunda andaga Yedeya kulawa Melonoti. 31 Yazizi andaga mkimalizi ywa mafyo ye zingoto ne zimbuzi. Awa wose wandaga wakimalizi wa ugoli wa seuta Daudi.

32 Yonatani mtumbawe dya seuta Daudi andaga mlangilizi, mnt'hu mta ulosi wedi na umanyi naho andaga mwandisi. Yehe na Yehieli mwana Hakimoni wawahinizaga wana wa seuta. 33 Ahitofeli andaga mlongi ywa seuta, Hushai kulawa Alikite naye andaga mbwiyaye dya seuta Daudi. 34 Ahitofeli eze abanike hant'hu hakwe haguhagwa ni Yehoyada mwana Benaya na Abiatali. Yoabu andaga mkulu ywe difyo dya watowani wa seuta.