1 Niyo wedigala Disanduku dya Mnungu naho niyo wadiika mndani ye dihema umwo Daudi andaga kadikimalisa, walavaga malavo yo kokwa na malavo yo utondowazi uku Mnungu akaona. 2 Daudi eze ibinde kulava malavo ayo yo kokwa, awavikilaga want'hu kwa zina dya Zumbe Mnungu. 3 Niyo awapangila Waizilaeli wose wagosi kwa wavele, kila yumwenga apangilagwa mkate na kihendo cha nyama na mkate wa zabibu.

4 Awasagulaga mwa awo Walawi vileke wadamanye ndima he Disanduku dya Mnungu, kumwink'ha ukulu naho wamtunye na nt'hogola Zumbe Mnungu, Mnungu ywa Izilaeli. 5 Amsagulaga Asafu kunda kilongozi ywawe, nakwambizwa ni Zekalia. Yeieli na Shemilamoti na Yehieli na Metisia na Eliabu na Benaya na Obedi Edomu na Yeieli, awasagulaga watowe miluli na mazeze, Asafu niyo atowa lupatu, 6 naho walavant'hambiko Benania na Yahalieli wasagulagwa kutowa magunda kwa lupisi lwose he Disanduku dye Ndagano dya Mnungu. 7 Ivo mwe dizua idyo yandaga hiho nk'hanana ya nk'hongo Daudi kumwink'ha Asafu na wandugze Walawi undima wa kumkemela Zumbe Mnungu mila ya kumgamba nivedi.

8 Mtogoleni Zumbe Mnungu,

dibwelekezeni zina dyakwe,

wagambileni si, mbuli izo atendile.

9 Mtogoleni naho kemeni wila wa kumgamba Mnungu, nivedi,

Wagambileni mbuli zakwe zo kwehela izo adamanye.

10 Ditunyeni zina dyakwe dikukile,

wadya wakumzungula Zumbe Mnungu wande ne kinyemi.

11 Mzunguleni Zumbe na udahi wakwe,

mvikeni yehe mazuwa yose.

12 Kumbukileni mbuli zo kwehela izo atendile,

vihungi vakwe na usengelo alavaga.

13 Nyuwe vyeleko va Izilaeli, mndima ywakwe,

Nyuwe vyeleko va Yakobo wasagulwe.

14 Yehe Zumbe Mnungu, niye Mnungu ywetu,

usengelo wakwe umwe isi yose.

15 Yehe atoza Ndagano yakwe ulo na ulo,

naho adamanya yadya akulagana kwa vyeleko alufu.

16 Ndagano adamanye na Abulahamu,

ne kilapi akelisile kwa Isaka.

17 Zumbe Mnungu aikaga Indagano na Yakobo,

Na Ndagano ya ulo na ulo kwa Izilaeli. 18 Niyo awagamba, "Neniwenk'he isi ya Kanaani,

naho isi iyo neinde ukipe wenyu nyuwe wenye."

19 Umwo wandaga wageke mwo uwazilo,

mwandaga wageke kindedi naho watakwiza mwe isi ya Kanaani.

20 Mwangadikaga kulawa si imwenga kubula si nt'huhu,

naho kulawa useuta umwenga kubula useuta mtuhu.

21 Mnungu hamlekile mnt'hu yoyose awatendeleni vihile,

kwa kuwamila awakanyaga maseuta.

22 "Msekuwatendela vihile awo niwasagule,

naho mse kuwalumiza walotezi wangu."

23 Mkemeleni Zumbe Mnungu mwe isi yose,

naho bwelekezeni zuwa kwa zuwa zimbuli zakwe za kuyokola.

24 Bwelekezeni ukulu wakwe mwe si,

naho wagambileni want'hu wose mbuli zakwe za kwehela.

25 Kwaviya Zumbe Mnungu ni mkulu mta nt'hogola itendese,

yehe ni ywa kogofya kujink'ha milungu yose.

26 Kwaviya milungu yose ya mwe isi hiyo kint'hu,

mna Zumbe Mnungu niye aumbaga mbingu.

27 Ukulu no uwedi utendese mwe isi vamzunguluka,

udahi na kinyemi viaho ho undiilo wakwe.

28 Mwink'heni Zumbe Mnungu nt'hogola want'hu wose mwe si,

ubwelekezeni ukulu na ludole lwakwe.

29 Mwink'heni Zumbe Mnungu nt'hogola yo ukulu we dizina dyakwe,

igaleni nt'hambiko naho mwingile ho undiilo wakwe.

Mvikeni Zumbe Mnungu kwa wedi wa ukuki,

30 nyuwe want'hu wa si zingize halongole hakwe!

Si yose kaiika itoge, si heikusingisika.

31 Indeni ne kinyemi mbingu ne isi!

Wagambileni want'hu wa si, Zumbe Mnungu niye seuta.

32 Bahali neivume hamwenga na vose vimndani mwake,

nk'honde nazo zinde ne kinyemi na vose vimndani mwake. 33 Naho miti ya kwe mbago neikeme,

neikeme kwa kinyemi ha meso ha Zumbe,

kwaviya yehe naeze aisengele si. 34 Mtogoleni Zumbe Mnungu kwaviya ni ywedi

lukunde lwakwe ni lwa ulo na ulo.

35 Mgambeni, "Zumbe Mnungu ukiyokole,

akiike hamwega na kukiyokola kulawa mwe si,

vileke kidigambe idizina dyako dikukile,

na kuuona uwedi mwe zint'hogola zako."

36 Atogolwe Zumbe Mnungu, Mnungu ywa Izilaeli!

Atogolwe ulo na ulo.

Naho want'hu wose nawagambe, "Taile," Naho wamtogole Zumbe Mnungu.

37 Ivo seuta Daudi niyo awaleka Asafu na wanduguze Walawi hant'hu aho heikilwe Disanduku dya Ndagano dya Zumbe Mnungu kwajili ya kudamanyila mviko zikuungwa he Disanduku mazuwa yose. 38 Obedi Edomu, hamwenga na weyawe milongo mtandatu na mnane wawambizaga. Obedi Edomu mwana Yedusuni na Hosa wandaga wamizi we zink'hili. 39 Seuta Daudi amwasaga mlavant'hambiko Sadoki na walavant'hambiko weyawe he dihema dyo mviko dya Zumbe Mnungu idyo dyandaga hant'hu ho kuvika uko Gibeoni, 40 vileke wamlavile Zumbe Mnungu malavo yo kokwa mlanga mwe kilingo lupisi lwose mtondo na kisingi, viligane na yose yaandikwe mwe sigilizi ya Zumbe iyo awalagize Waizilaeli. 41 Hamwenga nawo wandaga Hemani na Yedusani na wadya wose wasagulwe, wawandikwe mazina yawe vileke wamtogole Zumbe Mnungu kwaviya uwedi wakwe ni wa ulo na ulo. 42 Hemani na Yedusuni wandaga nawo wakimalizi wa magunda na lupatu kwajili ya wakemi na kwajili ya kukema wila ukukile. Lukolo lwa Yedusuni wasagulagwa kukimaila wamizi we zink'hili. 43 Ivo kila mnt'hu ahalawaga na kuita kwe nyumba yakwe, Daudi naye aitaga kwe nyumba yakwe na kuivikila mp'huga yakwe.