1 Daudi alangilizanaga na wakulu wa vilongozi wa watowani wakwe malufu na vilongozi wa watowani wakwe magana hamwenga ne vilongozi wose. 2 Niyo awagamba Waizilaeli wose wadugane, "Uneva mnazumilana na miye naho enga ivo akuunga Zumbe Mnungu, Mnungu ywetu kitende ivi, Kigale wegala ulosi waite wawetange ndugu zetu wasigale mwe isi ya Izilaeli hamwenga na walavant'hambiko na Walawi wendile mwe mizi yawe na hant'hu ho kudimila weze kinde hamwenga. 3 Akajika kite kikadiguhe Disanduku dye Ndagano dya Mnungu ywetu kwaviya hakidikaulise mwo lupisi lwa seuta Sauli." 4 Want'hu wose niyo wazumila kudamanya ivo kwaviya yaonekaga kunda mbuli yedi.

5 Ivo Daudi awaduganyaga Waizilaeli wose mwe isi, kukongela mto Shiholi kwa mwenye mzi mwa Izilaeli kubula Lebo Hamati vileke wadisamize Disanduku dya Mnungu kulawa Kiliati Yealimu kuita Yelusalemu. 6 Daudi akanda hamwenga na Waizilaeli wose aitaga mwo mzi wa Baala, nuko kugamba Kiliati Yealimu mwe isi ya Yuda, vileke wadiguhe kulawa uko Disanduku dya Mnungu dikwitangwa kwa zina dyakwe Zumbe Mnungu akwikala mwe fumbi dyakwe dye Kiseuta mnanga mwe viumbwa vina mawawa. 7 Ivo wadiguhaga Disanduku dya Mnungu kulawa mwe nyumba ya Abinadabu kwa gali pyahamu dikugendezwa ni ng'ombe, Uza na Ahio wadilongozaga digali idyo. 8 Daudi na Waizilaeli wose wandaga wakavina kwa udahi wawe wose hameso ha Mnungu kwa ukemi na kutowa mazeze na vinanda na ngoma na lupatu na magunda. 9 Weze wabule mwe kiwasa cho kuhutila nk'hande za unga ya Kidoni, kwavia ng'ombe nezikobadika Uza auchulusaga mkono wakwe vileke aditoze Disanduku dya ndagano. 10 Maya ya Mnungu yamwizilaga Uza kwaviya aditozaga Disanduku dya Mnungu. Ivo abanikaga ho undiilo wa Mnungu. 11 Daudi niyo anda na maya kwaviya Zumbe Mnungu amkomaga Uza kwajili ya maya yakwe. Ivo hant'hu aho hetangwagwa Pelesi Uza, nuko kugamba kukomigwa kwa Uza kubula ivi dielo.

12 Daudi amwogohaga Mnungu mwe dizuwa idyo, niyo agamba, "Haluse nenidahe vivihi kudigala Disanduku dya Mnungu kwangu?" 13 Ivo Daudi hadiguhile Disanduku dye Ndagano vileke adigale kwakwe uko ko mzi wa Yelusalemu mna adigalaga kwa Obedi Edomu alawile kwo mzi wa Gati. 14 Disanduku idyo dye Ndagano dyasigalaga uko kwa Obedi Edomu kwa lupisi lwa miezi mitatu, Zumbe Mnungu naye aivikilaga nyumba ya Obedi Edomu na vint'hu vakwe vose.