1 Awa nawo wagosi wakelunganye na Daudi uko Sikilagi umwo andaga kaguluswa na Sauli mwana Kishi, wandaga watowani wadahi awo wamwambize Daudi kwe nk'hondo. 2 Awo wandaga want'hu we dikabila dya Benjamini enga ivo endile Sauli. Wandaga wadahi wa kulasa naho wa kutowa nk'humbaiwe, kulume na kumoso. 3 Kilongozi ywawe andaga Ahiezeli ambizagwa ni Yoashi wose wana Shemaa kulawa Gibea, Watuhu ni Yezieli na Peleti wana Azimaweti na Belaka na Yehu kulawa Anatoti, 4 Ishimaya kulawa Gibeoni, mtowani mwa wadya milongo mitatu na kilongozi wawe naho hamwenga na Yelemia na Yahazieli na Yohanani na Yozabadi kulawa Gedela, 5 Eluzai na Yelomoti na Bealia na Shemalia na Shefatia na Mhalufi, 6 Elikana na Ishia na Azaleli na Yoezeli na Yashobeamu kulawa mwe lukolo lwa Kola, 7 na Yoela na Zebadia wana Yelohamu kulawa Gedoli.

8 Naho want'hu we dikabila dya Gadi wakepangaga na kukelunga na Daudi mwe digomela dyakwe uko kwedijangwa. Wandaga watowani wata ludole naho wamanyikaga kwa kutowana ne vitowanilo, nk'hindo na mijungo. Futa zawe zandaga zatisa enga simba naho wandaga enga mbala ko mnima. 9 Kilongozi ywawe mkulu andaga Ezeli, wa kaidi Odadia na wakatatu ni Eliabu, 10 wa kane ni Mishimana na wa shano ni Yelemia, 11 ywa mtandatu ni Atai na ywa mfungate ni Elieli, 12 wa mnane ni Yohanani na ywa kenda ni Elisabadi, 13 ywa mlongo ni Yelemia na mlongo na imwenga ni Makibanai.

14 Wagadi awa wandaga ni watowani, viligane no useuta wawe, wadya wakulongoza wadodo awakimailaga watowani gana na wadya wakulongoza wakulu awakimailaga watowani alufu. 15 Want'hu awa wadendelukaga mto Yolodani mwo mwezi wa nk'hongo, mto wamemaga nt'hendelo zose niyo want'hu wendile wakekala mwa makolongo wanyilikaga kuita nt'hendelo yo ulailo wa zuwa na watuhu waitaga Usweelo we zuwa.

16 Want'hu wamwenga kulawa mwe dikabila dya Benjamini na watuhu kulawa mwe dikabila dya Yuda wezaga kwa Daudi mwe digomela dyakwe. 17 Daudi afosaga kuse kuwaona niyo awagamba, "Uneva mwiza kwa utondowazi vileke mnambize nawahokela kwa moyo wose, mna uveva mwiza kunisezenga kwa wank'hondo wangu mna miye hibanange mbuli yoyose, Mnungu ywa watati zenyu owaone na kuwasengelani."

18 Ivo Muye amwizilaga Amasai mkulu ywa wadya "Milongo mitatu," Niyo agamba,

"Suwe ni want'hu wako, weye Daudi, naho ki hamwenga na weye, mwana Yese!

Uhumi, unde kwako naho uhumi unde kwa wose wakukwambiza!

Kwaviya Mnungu ywako naakwambize."

Ivo Daudi niyo awahokela na kuwatenda kunda vilongozi wa watowani.

19 Watowani wamwenga we dikabila dya Manase niyo wakelunga na Daudi aho eze aite hamwenga na Wafilisiti wakatowane na seuta Sauli. Mna hata ivo havadahike awambize kwaviya vilongozi wa Wafilisiti wamgulusaga auye Sikilagi wakagamba, "Nekikehose wenye lumwo wikazi wetu kwaviya naanyilike akauya kwa zumbe wakwe Sauli." 20 Ivo Daudi aho eze aite Sikilagi, want'hu we dikabila dya Manase wakelungana naye. Adina na Yozabadi na Yediaeli na Mikaeli na Yozabadi na Elihu na Siletai. Kila yumwenga wawe andaga kilongozi we fyo dya want'hu alufu imwenga mwe dikabila dya Manase. 21 Wamwambizaga Daudi kutowana na mafyo ya wank'hondo wakwe wandaga wakeza kumtowa, kwaviya wose wandaga watowani. 22 Zuwa kwa zuwa want'hu wezaga kumwambiza Daudi niyo anda na fyo dya watowani wengi enga watowani wa Mnungu.

23 Awa nawo watowani wata vitowanilo wakelunganye na Daudi uko Hebuloni vileke wauguhe useuta kulawa kwa Sauli enga ivo Zumbe Mnungu alongile: 24 Watowani kulawa kwe dikabila dya Yuda awo wandaga ne mijungo na nk'hindo wandaga alufu mtandatu na magana mnane. Wose wandaga ne vitowanilo vawe kwajili ya nk'hondo. 25 Watowani kulawa kwe dikabila dya Simeoni want'hu alufu mfungate na gana wakeikaga lumwe kwajili ye nk'hondo. 26 Watowani kulawa kabila dya Lawi wandaga alufu nne na magana mtandatu. 27 Hamwenga na Yehoyada mwelekwa ywa Haluni na weyawe wandaga want'hu alufu nt'hatu na magana mfungate. 28 Na Sadoki mbwanga mtowani kwe nk'hondo, yehe hamwenga na watowani milongo miidi na waidi kulawa mwo lukolo lwa Ise mwenye. 29 Watowani kulawa mwe dikabila dya Benjamini nduguze Sauli wandaga want'hu alufu nt'hatu. Wengi wawe wasigale wandaga wahuwilwa kwe nyumba ya Sauli kubula aho waitaga kwa Daudi. 30 Watowani wadahi kulawa mwe dikabila dya Efulaimu magana milongo miidi na magana mnane, kila yumwenga andaga mhuilwa mwo lukolo lwakwe. 31 Watowani kulawa nusu ye dikabila dya Manase wandile usweelo wa zuwa wandaga alufu mlongo na mnane, wamanyikaga mazina vileke weze wamkumbe mavuta Daudi ande seuta. 32 Wakulu kulawa mwe dikabila dya Isakali, wandaga magana maidi hamwenga na wandugu zawe wakalongozwa ni sigilizi yawe. Wakulu awo wandaga na umanyi mwe zimbuli ze misimo naho wamanyaga kiya waizilaeli waungwagwa kudamanya. 33 Watowani kulawa mwe dikabila dya Zabuloni, wandaga alufu milongo mishano watowani wahuwilwa wakudaha kutowana nk'hondo wakanda ne vitowanilo ve hengi waitaga kumwambiza Daudi. 34 Watowani kulawa mwe dikabila dya Nafutali, wandaga alufu hamwenga na watowani alufu milongo mitatu na mfungate wata vitowanilo na nk'hindo na mijungo. 35 Watowani kulawa mwe dikabila dya Dani wandaga alufu milongo miidi na mnane na magana mtandatu wata vitowanilo va nk'hondo. 36 Watowani kulawa mwe dikabila dya Asheli wandaga magana milongo mine wakeikile lumwe kwa kutowana nk'hondo. 37 Watowani kulawa mwe dikabila dya Walubeni ne dikabila dya Wagadi ne inusu ye dikabila dya Manase kulawa ng'ambu yo mto Yolodani wandaga want'hu laki imwenga na milongo miidi wakanda ne vitowanilo vi hengi va nk'hondo.

38 Watowani wose wakeikaga lumwe kwajili ya nk'hondo, waitaga Hebuloni vileke wamkumbe mavuta Daudi ande seuta ywa Izilaeli yose. Na want'hu wose wa Izilaeli wakelunganyaga hamwenga vileke wamkumbe mavuta Daudi ande seuta. 39 Ivo wekalaga na Daudi kwa lupisi lwa mazuwa mant'hatu, wakadya no kunywa kwaviya ndugu zawe wambikaga nk'hande kwajili ya kudya. 40 Naho wambuya zawe wa hagihi na wadya wa hale enga wadya wakwikala uko Isakali na Zabuloni na Nafutali waletaga nk'hande zinulwe ne zip'hunda na ngamiya na nyumbu, ne zing'ombe. Waletaga unga ne mikate ya tini ne zizabibu na divai na mavuta na ng'ombe na ngoto nyingi, niyo kwanda na nk'hande nyingi kwaviya kwandaga na kinyemi mwe Izilaeli.