1 Aya nayo mafyo ya welekwa wa Haluni enga ivo wapangigwe. Haluni andaga wa wana wane. Nadabu na Abihu na Eleazali na Itamali. 2 Nadabu na Abihu wabanikaga umwo tati yawe andaga akei mgima, nawo wandaga hawana wana ivo elo wandugu zawe awo Eleazali na Itamali niyo wanda walavant'hambiko. 3 Seuta Daudi awapangaga welekwa wa Haluni mwe mafyo viligane no undima wawe. Amwambizaga mwo kudamanya ivo andaga ni Sadoki, mwelekwa ywa Eleazali na Ahimeleki mwelekwa ywa Itamali. 4 Vilongozi wengi walawaga mwa welekwa wa Eliazali kujink'ha wandya walawaga mwo welekwa wa Itamali. Vilongozi awo wapangwagwa enga ivi. Wakulu we zimp'huga walawile mwo welekwa wa Eliazali wandaga mlongo na mtandatu. Wakulu we zimp'huga walawile mwo welekwa wa Itamali wandaga mlongo na mfungate. 5 Wawapangaga kwa kutowa kula kwaviya kwandaga na wandima wa mwe nyumba wa Mnungu na walavant'hambiko mwe zink'holo zose zimbili, lukolo lwa Eleazali na lukolo lwa Itamali. 6 Welekwa wa Eliazalina Itamali nawo wa ndaga wa nk'hongo mwo kutowa kula. Akajika Shemaya mwana Nataneli uyo Mlawi awawandikaga mazina yawe ho undiilo wa seuta Daudi na wakulu na mlavant'hambiko. Ahimeleki mwana Abiatali ne vilongozi we zimp'huga za walavant'hambiko na za Walawi wose wandaga waona.

7 Watowaga kula imwenga apataga Yoalibu ya kaidi apataga Yedaya, 8 ya katatu apataga Halimu ya kane apataga Seolimu, 9 ya shano apataga Malikia ya mtandatu apataga Miyamini, 10 ya mfungate apataga Hakosi ya mnane apataga Abiya, 11 ya kenda apataga Yeshua ya mlongo apataga Shekania, 12 ya mlongo na imwenga apataga Eliashibu ya mlongo na mbili apataga Yakimu, 13 ya mlongo na nt'hatu apataga Hupa, ya mlongo na kane apataga Yeshebeabu, 14 ya mlongo na shano apataga Biliga ya mlongo na mtandatu apataga Imeli, 15 ya mlongo na mfungate apataga Hezili ya mlongo na mnane apataga Hapisesi, 16 ya mlongo na kenda apataga Patahia ya milongo miidi apataga Yehezikeli. 17 Ya milongo miidi na imwenga apataga Yakini ya milongo miidi na mbili apataga Gamuli, 18 ya milongo miidi na nt'hatu apataga Delaya na ya milongo miidi na kane apataga Maazia.

19 Aya nayo mafyo yawandikwagwa viligane no undima wawe wakengila mwe Nyumba ya Zumbe Mnungu na kudamanya kiya wakuungwa wadamanye, enga ivo wasiigilwe ni Haluni mkale ywawe enga ivo alagizwe ni Zumbe Mnungu, Mnungu ywa Izilaeli.

20 Awa nawo wakulu watuhu we zimp'huga welekwa wa Lawi. Kulawa kwa wana wa Amlamu andaga ni Shebaeli na kulawa kwa Shebaeli andaga ni Yedeya.

21 Kulawa mwa welekwa wa Lehabai kilongozi ywo lukolo andaga ni Ishia.

22 Kulawa mwa welekwa ywa Ishio andaga ni Shelomiti na kulawa mwa welekwa wa Shelomiti andaga ni Tahati.

23 Kulawa mwa welekwa wa Wana Hebuloni wandaga ni Yelia nt'hulasasu, na Amalia ywa kaidi na Yehazieli ywa katatu na Yakameamu ywa kane.

24 Kulawa mwa welekwa wa Uzieli kilongozi andaga ni Mika, Kulawa mwa welekwa wa Mika kilongozi ywo lukolo andaga ni Shamile.

25 Naho kilongozi mtuhu ywo lukolo mwa welekwa wa Ishia andaga nduguye dya Mikawa uyo Zakalia.

26 Kulawa kwa welekwa wa Melali vilongozi ywe mp'huga wandaga ni Mahili na Mushi na Yaazia 27 Wana Melali kwa Yaazia ni Shohamu na Zakuli na Ibili. 28 Mwana Mahili ni Eleazali uyo andaga hana mwana. 29 Kishi andaga na mwana yumwenga uyo Yelameeli. 30 Mushi andaga na wana watatu. Mahili na Edeli na Yelemoti. Awo ni welekwa wa Lawi viligane ne zink'holo zawe. 31 Naho watowaga kula enga viya wandugu zawe welekwa wa Haluni ivo watendaga ho undilo wa seuta Daudi, na Sadoki, na Ahimaleki na ho undiilo we vilongozi we zimp'huga za walavant'hambiko na Walawi. Wakulu kwa wadodo wose watendelwagwa viligane.