1 Awa nawo welekwa wa Lubeni nt'hulasasu ywa Izilaeli, hamwenga na kugamba Lubeni andaga nt'hulasasu azaga uwagilwa wakwe na kunda nt'hulasasu niyo enk'higwa nduguye Yusufu kwaviya Lubeni agonaga na muwele ywa ise. Ivo haikigwe mwo uwazilo mwo lukolo viligane no uwagilwa wakwe wa kunda nt'hulasasu. 2 Hamwenga na kugamba Yuda andaga na ludole kujink'ha watuhu naho vilongozi walawaga kwakwe, hata uwagilwa wa nt'hulasasu andaga ni Yusufu. 3 Wana wa Lubeni nt'hulasasu ywa Izilaeli wandaga ni Henoki na Palu na Heziloni na Kalimi.

4 Welekwa wa Yoeli wandaga ni Shemaya na Gogi na Shimei, 5 Mika na Leaya na Baali, 6 na Beela kilongozi wa Walubeni uyo Tigilati Pileseli seuta ywa Ashulu amtahaga na kuita naye kwo utumwa.

7 Ulu nulo ludongo lwa wakulu we zink'holo za Lubeni viligane ne zink'holo zawe: Yeieli na Zakalia, 8 Bela mwana Azazi mwezukuluwe dya Shema ywo lukolo lwa Yoeli. Awo wandaga wakekala kukongela kwo mzi wa Aloeli kubula kwo mnima wa Nebo na Baal Ameoni. 9 Kwe nt'hendelo ya ulailo we dizuwa wenelaga kubula mk'handa mwe dijangwa digendeele kubula kwo mto Eufulati, kwaviya wandaga na mifugwa mingi uko Gileadi.

10 Mwo lupisi lwa seuta Sauli, watowanaga nk'hondo na Wahajili, wawakomaga kwe nk'hondo niyo waiguha isi yawe yose yo ulailo wa zuwa wa Gileadi na kwikala umo.

11 Welekwa wa Gadi wekalaga hagihi ne dikabila dya Lubeni mkoma mahanya mwe isi ya Bashani kubula Saleka. 12 Yoeli niye andaga mkulu ywo lukolo lwandaga na udahi, ywa kaidi andaga ni Shafamu. Yanai na Shefati wandaga nawo wakongaga zink'holo zint'huhu uko Bashani. 13 Wandugu zawe viligane ne zink'holo zawe wandaga mfungate: Mikaeli na Meshulamu na Sheba na Yolai na Yaakani na Zia na Ebeli. 14 Wose awa wandaga welekwa wa Abihaili, Bihaili andaga mwana Huli, Huli andaga mwana Yaloa, Yaloa andaga mwana Geleadi, Gileadi andaga mwana Mikaeli, Mikaeli andaga mwana Shishai, Shishai andaga mwana Yado, Yado andaga mwana Buzi. 15 Ahi uyo mwana Abidieli naho mwezukuluwe dya Guni andaga niye mkulu mwe zink'holo izo. 16 Wekalaga Bashani na mwe zikaya ziwazunguluke na mwa madimilo yawe yose ya Shaloni kubula kwe mihaka. 17 Nk'humbukila izi zose zawandikwagwa mwa mazua ya seuta ywa Yuda na seuta Yeloboamu ywa kaidi ywa Izilaeli.

18 Makabila ya Lubeni na Gadi ne nusu ye dikabila dya Manase mwe nt'hendelo ya ulailo wa zuwa, wandaga na watowani wadahi wakubula alufu milongo mine na wane na magana mfungate na mliongo mtandatu awo waikigwe lumwe kwajili ya nk'hondo. Wata ludole wadahaga kutowana kwa nk'hindo na sime, na wakulasa heweina luhonya. 19 Watowanaga nk'hondo na Wayetuli na Wanafishi na Wanodabu want'hu wa kabila dya Wahajili. 20 Waikaga mhuwi wawe kwa Mnungu na kumlombeza awambize, naye Mnungu awambizaga kwa kulombeza kwawe na kuwatenda wawatowe Wahajili hamwenga na wambuya zawe. 21 Waitahaga mifugwa ya Wahagali ngamia alufu milongo mishano na ngoto laki mbili na alufu milongo mishano, na mp'hunda alufu mbili, naho wawatahaga want'hu laki imwenga. 22 Wawakomaga wank'hondo wengi kwaviya Mnungu awenk'haga udahi. Ivo wagendeelaga kwikala mwe isi hant'hu ha awo kubula aho weze wasamizilwe kwe samo.

23 Nusu ya want'hu we dikabila dya Manase wa ulailo wa zuwa wekalaga mwe isi ya Bashani, wagenyelaga vitendese na kusambala nt'hendelo ya mkoma mahanya kubula Baali Helimoni na Senili na mnima Helimoni. 24 Awa nawo wandaga wakulu we nk'holo za kabila idyo: Efeli na Ishi na Elieli na Azilieli na Yelemia na Hodavia na Yadieli. Wose wandaga watowani wadahi, want'hu wakumanyika vilongozi mwe nk'holo izo.

25 Mna want'hu wadya wandaga hiyo wahuwilwa kwa Mnungu ywa wakale wawe, wamlekaga Mnungu na kuivika milungu mituhu, iyo Mnungu aibanangaga hameso hawe. 26 Ivo, Mnungu ywa Izilaeli amtenda Puli seuta ywa Ashulu uyo amanyike enga Tigilati Pileseli, aikump'hukile isi yawe na kuwataha awo Walubeni na Wagadi ne inusu ya Manase ya ulailo wa zuwa, na kuwegala kubula Halu na Haboli na Hala na mnk'handa yo mto Gozani uko wekale kubula dielo.