1 Amazia andaga na miyaka milongo miidi na shano umwo akakonga kwikaila. Alongozaga uko Yelusalemu kwa lupisi lwa miyaka milongo miidi na kenda. Nine etangagwa Yehoadani kulawa Yelusalemu. 2 Adamanyaga ayedi ha Zumbe Mnungu mna hadamanye kwa uhuilwa. 3 Umwo akanda katoga mwo useuta wakwe, awakomaga wakulu awo wamkomile ise. 4 Mna hawakomile wana wawe enga ivo iwandikwe mwe miko ye kitabu cha Musa umwo Zumbe Mnungu akagamba: "Walesi hawakomwe kwaajili yo wavu wa wana wawe hegu wana hawakomwe kwaajili yo wavu wa walesi wawe mna kila mnt'hu naakomwe kwaajili yo wavu wakwe mwenye."

5 Seuta Amazia awaduganyaga wagosi we dikabila dya Yuda na Benjamini awapangaga mwe vifyo viligane ne zink'holo zawe. Niyo awaika mwa wakulu wa watowani wa maalufu na wa magana. Awawaza wadya wata miyaka milongo miidi na kugendeela niyo amanya kugamba wandaga wagosi laki nt'hatu wose nawaikwa lumwe kwa nk'hondo wakanda na umanyi wa kutowana kwa mijungo na nk'hindo. 6 Naho andaga na watowani watuhu laki imwenga awenk'haga ndima kulawa Izilaeli niyo awaliha enga kilo alufu nt'hatu za masawa. 7 Mna mnt'hu ywa Mnungu amwizilaga seuta na kumgamba, "Weye seuta usekuita kwe nk'hondo hamwenga na awa watowani wa Izilaeli, kwaviya Zumbe Mnungu hehamwenga naawa want'hu wa Izilaeli. Naho he hamwenga na Waifulaimu awa. 8 Hata uneva unanda mtowani mdahi kwe nk'hondo, Mnungu naakutende uhumwe ni wank'hondo wako, kwaviya yehe ana udahi wa kukutenda unde mhumi hegu uhumwe." 9 Amazia niyo amuuza yudya mnt'hu ywa Mnungu, "Nekitende vivihi nao yose nehiwaliha kale maliho yawe watowani wa Izilaeli?" Naye niyo amhitula, "Zumbe Mnungu adaha kukwink'ha kujink'ha ayo unanayo." 10 Niho Amazia awalekela wadya watowani awenk'haga ndima wakeuiye kwe zikwawe. Ivo wakeuiyaga wakanda na maya kwa want'hu wa Yuda. 11 Amazia akenk'haga moyo na kuwalongoza watowani wakwe mpaka kwe Dikolongo dya Munyu. Aho awatowaga na kuwakoma watowani alufu mlongo wa Edomu. 12 Watowani wa Yuda watahaga want'hu alufu mlongo wakanda wagima niyo wawakweza mpaka kulanga kwo luwe na kuwaduula hasi niyo wabanika mwo luwe. 13 Mwo lupisi uulo wadya watowani wa Waizilaeli awo Amazia awalekaga wauye kwawe akawalemeza wasekuita naye kwe nk'hondo, wagendaga kuitowa mizi ya Yuda kulawa Samalia mpaka Beti Holoni, wawakomaga want'hu alufu nt'hatu nakuguha na vint'hu vingi. 14 Amazia eze awahume Waedomu, aletaga milungu ya Waedomu niyo aitenda kunda milungu yakwe, niyo afika madi nakufunk'hizila ubani. 15 Zumbe Mnungu aihiyagwa niyo amtuma mlotezi kwa Amazia. Mlotezi uyo niyo amuuza Amazia, "Kwaajili yani wavika milungu ya watakwiza iyo haikudaha kuwayokola want'hu wakwe wenye kulawa mwe mikono yako?"

16 Umwo mlotezi akanda agendeela kulonga, Amazia amgambaga, "Togola weye kikutenda ini mlangilizi ywa seuta? Nyamala! Cheivo nohukome?"

Umwo mlotezi andaga hanati anyamale agambaga, "Himanya kugamba Mnungu naakukome kwaviya kudamanya yose aya naho hutegeleze ulangilizi wangu."

17 Niyo Amazia seuta ywa Yuda egalaga ulosi kwa Yehoashi seuta ywa Izilaeli andaga mwana Yehoahazi, na mwezukuluwe Yehu akaunga watowane. 18 Mna Yehoashi seuta ywa Izilaeli amwigailaga ulosi Amazia seuta ywa Izilaeli akagamba, "Zuwa dimwenga muwamba ngoma wa Lebanoni wamgambilaga mwelezi wa uko Lebanoni, ‘Mloze mwana kike ywako kwa mwanangu!’ Mna kala dya kwe mbago niyo dyomboka aaho na kuujatajata muwamba ngoma uwo. 19 Haluse weye Amazia kugamba kuwakoma Waedomu haluse wakeduvya. Mna nakulangiliza, ikala kwe kaya yako. Nii kukezunguila makunt'ho yakuunga yakwigaile makunt'ho weye hamwenga na want'hu wako wa Yuda?"

20 Mna Amazia alemelaga kuzumila uwo nounda mzungu wa Mnungu Amazia ahumwe kwaviya avikaga milungu ya Waedomu. 21 Kwaivo Yehoashi seuta ywa Izilaeli afosaga na kuzumilana na Amazia seuta wa Yuda uko kwe nk'hondo Beti Shemeshi, mwe isi ya Yuda. 22 Want'hu wa Yuda wahumagwa ni want'hu wa Izilaeli naho kila yumwenga auyaga kwe kaya yakwe. 23 Yehoashi seuta ywa Izilaeli amtahaga Amazia seuta ywa Yuda, mwana Yehoashi, mwana Ahazia uko Beti Shemesi, niyo aita naye mpaka Yelusalemu. Uko amogolaga lukandula lwakwe kulawa mwo lwivi lwa Efulaimu mpaka mwo lwivi lwa mp'hembe ina ukulu wa mita magana maidi. 24 Aiguhaga zahabu yose na matundu hata vyombo vose vandile mwe Nyumba ya Zumbe Mnungu na mwe kindolo che nyumba ya seuta, akajika avitahaga na kuuya Samalia. 25 Seuta Amazia ywa Yuda ekalaga miyaka mlongo na shano umwo file ya seuta Yehoashi mwana Yehoahazi seuta ywa Izilaeli. 26 Udamanyi mtuhu wose wa Amazia kulawa nk'hongo mpaka uheelo mwo useuta wakwe wawandikagwa mwe Kitabu che zimbuli za Maseuta wa Yuda na Izilaeli. 27 Mizungu iihile ya kumkoma Amazia yadamanyagwa Yelusalemu kukongela aho amlekaga Zumbe Mnungu, ivo anyilikilaga Lakishi. Mna wank'hondo wakwe wawasigilaga want'hu kuita Lakishi wakamkome uuko. 28 Kimba chakwe nekigalwa mwe falasi mpaka Yelusalemu na kumoselwa msanga mwe vikuta va kiseuta mwe isi ya Yelusalemu mwo mzi wa Daudi.