1 Hezekia andaga na miyaka milongo miidi na shano umwo eze ande seuta ywa Yuda. Alongozaga uko Yelusalemu kwa lupisi lwa miyaka milongo miidi na kenda. Nine etangagwa Abiya mwana Zakalia. 2 Adamanyaga yakumwelela Zumbe hameso ha Zumbe Mnungu enga ivo atendaga umkale ywakwe seuta Daudi.

3 Mwo mwezi wa nk'hongo wa mwaka wa nk'hongo mwo useuta wakwe, seuta Hezekia akomolaga nyivi ze Nyumba ya Mnungu nakuidamanya. 4 Awasigiilaga walavant'hambiko na Walawi niyo awaduganya mwe lwazo nt'hendelo ya ulailo wa zuwa mwe Nyumba ya Mnungu, 5 niyo awagamba,Tegelezeni nyuwe Walawi! Kekukizeni mwe mioyo yenyu naho ikukizeni Nyumba ya Zumbe Mnungu, Mnungu ywa wakale wenyu. Ulaveni usavu wose kulawa hant'hu hakukile. 6 Wakale wenyu wandaga hiyo wahuilwa wadamanyaga mbuli zihiile ha Zumbe Mnungu, Mnungu ywetu. Wadamanyaga heyekumwelela yehe. Wamleka na kuhitukila hale na hant'hu akwikala Zumbe Mnungu mwe Nyumba yakwe. 7 Naho wazivugalaga zinyivi mwo lwazo we Nyumba ya Mnungu, hawafunk'hize ubani hegu kulava nt'hambiko zo kokwa mwa hant'hu hakukile ha Mnungu ywa Izilaeli. 8 Kwaivo Zumbe Mnungu aihiyagwa vitendese na want'hu wa Yuda na Yelusalemu, na yadya awatendile wahelwagwa na kowaogohesa want'hu wose. Aya yose muyaona nyuwe wenye kwa meso yenyu. 9 Ino niyo yalekaga watati zetu wakomagwa kwe nk'hondo naho wana wetu na wana kike na wavele wetu watahagwa. 10 "Haluse naunga nidamanye ndagano na Zumbe Mnungu, Mnungu ywa Izilaeli vileke asekugendeela kunda na maya na suwe. 11 Ivo wanangu mtimile yadya akuunga. Zumbe Mnungu kawasagulani nyuwe vileke mumdamanyile ndima, muwalongoze want'hu wakwe mwo kuvika na kumfunk'hizila ubani." 12 Walawi wakutimila wakongaga ndima: Kulawa lukolo lwa Kohati wandaga ni Mahati mwana Amasai na Yoeli mwana Uzia kulawa mwo lukolo lwa Melali ni Kishi mwana wa Abidi na Uzia mwana Yehaleli; lukolo lwa Gelishoni: Yoa mwana Zima na Edeni mwana Yoa; 13 kulawa lukolo lwa Elisafani: Shimoli na Yeneli, kulawa mwo welekwa lwa Asafu ni Zekalia na Matania, 14 kulawa lukolo lwa Hemani: Zekalia na Matania; kulawa lukolo lwa Hemani ni Yehuheli na Shimei na mwo lukolo lwa Idusuni ni Shemaya na Uzieli. 15 Awa wawaduganyaga Walawi weyawe niyo wakekukiza, wengilaga mndani vileke waikukize Nyumba ya Mnungu enga viya seuta awalagize kwa kutimila miko ya Zumbe Mnungu. 16 Walavant'hambiko wengilaga kwe Nyumba ya Mnungu vileke waikukize. Wavilavilaga ho lwazo vint'hu vose visavu hevikumwelela Zumbe Mnungu. Walawi waviguhaga na kuvigala mwe dikolongo dya Kidiloni. 17 Wakongaga ndima ya kuikukiza Nyumba ya Mnungu zuwa dya nk'hongo dyo mwezi ywa nk'hongo, ize ibule zuwa dya mnane wabindaga ndima zose. Ndima iyo ni hamwenga ne chumba chokwingila mwe nyumba ya Mnungu niho wadamanya ndima kwa mazuwa mnane ize ibule zuwa dya mlongo na mtandatu wakeikaga lumwe kwa kumvika Mnungu.

18 Niho Walawi wengila mndani kwa seuta Hezekia na kumgamba, Kiikukiza kale Nyumba yose ya Mnungu hamwenga na kilingo cho kulavila nt'hambiko zo kokwa na vyombo vakwe vose na meza ye mikate ilavigwe kwajili ya Mnungu na vyombo vakwe vose. 19 Naho kivivuza vyombo vose na kuvitenda vinde va Mnungu ivo seuta Ahazi aviduulaga mwo useuta wakwe aho andaga kamsaguka Mnungu. Haluse vose viyaho he kilingo cha Zumbe Mnungu. 20 Niho seuta Hezekia enukaga mtondo tondo na kuwaduganya wakulu wo mzi nakuita nawo mwe Nyumba ya Mnungu. 21 Wegalaga majeku mfungate na madolome mfungate na wanangoto mfungate na mavulata mfungate yande malavo ya kuusa wavu kwaajili ye mp'huga ye kiseuta na kwaajili ya hakukile na kwaajili ya want'hu wa Yuda. Seuta awagambaga walavant'hambiko awo welekwa wa Haluni wavilave vint'hu ivo enga malavo yo kokwa mwe kilingo cha Zumbe Mnungu. 22 Walavant'hambiko wandaga kuchinja yadya majeku nk'hongo na kuguha sakame na kumyagila mwe kilingo, akajika wachinja madolome mfungate na kuguha sakame na kumyagila mwe kilingo na kuchinja wana ngoto mfungate niyo waguha sakame na kmyagila mwe kilingo. 23 Yadya mavulata yandile kwaajili ya malavo ya kuusa wavu yegalagwa hameso ha seuta na mdugano wose uwo wendile aho waikaga mikono yawe mnanga mwa ayo mavulata. 24 Ivo wadya walavant'hambiko wachinjaga yadya mavulata na kuimyagila isakame yakwe mwe kilingo kwaajili ya malavo ya kuusa wavu kwajili yo utondowazi mwa Izilaeli yose, kwaviya seuta Hezekia alagizaga yalavigwe malavo yo kokwa na malavo ya kuusa wavu kwaajili ya Izilaeli yose.

25 Seuta Hezekia atimilaga malagizo ayo Zumbe Mnungu andaga kamwink'ha seuta Daudi kombokela kwa mlotezi Gadi uyo andaga mlotezi ywa seuta na mlotezi Natani. Ivo elo aikaga walawi mwe nyumba ya Zumbe Mnungu, wamwenga wandaga na lupatu , watuhu nawo wandaga na vinanda, na watuhu nawo ving'weng'we. 26 Ivo Walawi wakimalaga wakanda na vyombo va kukemela va Daudi naho walavant'hambiko wakimalaga wakanda na magunda yawe. 27 Hezekia alagizaga malavo yo kokwa yalavigwe mwe kilingo. Weze walave malavo wakongaga kumtogola Zumbe Mnungu kwa ukemi hamwenga na magunda na vint'hu va kukemela ivo adamanyaga Daudi seuta ywa Izilaeli. 28 Mdugano wose wavikaga na kufika madi, wakemi wagendeelaga kukema, wata magunda nawo wagendeelaga kutowa magunda yawe.Yose aya yagendeelaga mpaka aho weze wabinde kulava nt'hambiko yo kokwa. 29 Akajika Seuta Hezekia hamwenga na want'hu wose wendile umo wafunamizaga mitwi yawe hasi na kumvika Zumbe Mnungu. 30 Seuta Hezekia na vilongozi wakwe wawagambilaga Walawi wamtogole Zumbe Mnungu kwa mila awandike Daudi na mlotezi Asafu. Ivo want'hu wose wamtunyaga Mnungu kwa kinyemi na kufunamiza mitwi yawe hasi wakavika. 31 Niho Hezekia awagambaga want'hu, "Haluse mkelava wenye kwa Zumbe Mnungu. Soni mwigale nt'hambiko na malavo ya nt'hogola mwe Nyumba ya Zumbe Mnungu." Ivo mdugano uwo waletaga nt'hambiko na malavo ya nt'hogola na malavo yo kokwa na want'hu wose wegalaga malavo kwa kuunga wenye. 32 Malavo yo kokwa wayaletile yose yandaga majeku milongo mfungate na madolome gana na wanangoto magana maidi. Zose izo zandaga ni malavo yo kokwa kwa Zumbe Mnungu 33 Malavo yakukile yandaga majeku magana mtandatu na ngoto alufu nt'hatu. 34 Kwaviya walavant'hambiko wandaga wageke ivo hawadahaga kusangula zinyama izo zose zandile aho. Ivo ndugu zawe Walawi wawambizaga mpaka umwo wabindaga indima iyo. Mwo lupisi ulo walavant'hambiko watuhu wandaga wakekukiza kale. Walawi wakekukizaga kujink'ha walavant'hambiko. 35 Hmwenga no wingi wa malavo yo kokwa pele iviaivia nokunda na mavuta ya malavo yo utondowazi, naho nokunda na malavo yo kunywa kwajili ya kila malavo yo kokwa pele. Ivo ndima yo kuvika kwe Nyumba ya Mnungu niyo yakonga naho. 36 Seuta Hezekia na want'hu wose wandaga na kinyemi kwaviya Mnungu awambizaga kudamanya ayo kwa lupisi luguhi.