1 Yosia andaga na miyaka mnane umwo akakonga kwikaila uko Yelusalemu. Alongozaga kwa miaka milongo mitatu na umwenga. 2 Adamanyaga ayedi na kumwelela Zumbe Mnungu. Atimilaga mliganyizo wa seuta Daudi ise na kutimila sigilizi za Zumbe Mnungu kwa wengele.

3 Mwo mwaka wa mnane wo useuta wakwe, seuta Yosia akanda akei mbwanga, akongaga kumvika Mnungu ywa Daudi ise. Umwo andaga na miyaka mlongo na miidi akongaga kuikukiza Yuda na Yelusalemu kwa kuusa hant'hu ha kuvikila milungu mituhu na mahili ya Ashela na mahili ye kusongola na mahili ya kulugula. 4 Kwa sigilizi za seuta want'hu hakwe wabogozolaga kilingo cha Mabaali, watulaga kilingo cho kufunk'hizila ubani izo zikimaliswe mnanga, watulaga imikola ya Ashela na mahili ya kusongola na kulugula, niyo azitigint'hiza kunda luvumbi, niyo luvumbi ulo alwitila mnanga mwe vikuta va wadya wayalavilaga mahili malavo. 5 Ayokaga mavuha ya walavant'hambiko wa milungu iyo mwe vilingo vawe, ivo waikukizaga Yuda na Yelusalemu. 6 Naho atendaga iivo mwe mizi ya Manase na Efulaimu na Simeoni mpaka Nafutali mwa mahagale ye mnk'handa ye mizi iyo. 7 Atulaga vilingo na kuzihondahonda maashela na mahili ya kusongola niyo zanda enga unga na kuzink'hakant'ha vibesuhande vilingo vose vo kufunk'hizila ubani mwe Izilaeli yose. Niyo akeuiya Yelusalemu.

8 Mwo mwaka wa mlongo na mnane wo kwikaila kwakwe, umwo andaga kaikukiza kale isi ne Nyumba ya Mnungu, atumaga want'hu watatu Shafani mwana Uzia na Maaseya mkulu ywo mzi na Yona mwana Yoahazi muandishi vileke waite wakaizenge Nyumba ya Mnungu ya Zumbe Mnungu ywakwe. 9 Waitaga kwa Hilikia mlavant'hambiko mkulu na kumwink'ha matundu ayo yaletagwa mwe Nyumba ya Mnungu iyo Walawi waziduganyaga he nk'hili kulawa Manase na Efulaimu na kulawa nt'hendelo nt'huhu zose za Izilaeli na isi yose ya Yuda na Benjamini naho kulawa kwa wakaya wa Yelusalemu. 10 Niyo wenk'hiza matundu ayo kwa want'hu wenk'higwe kukimaila ndima yo kuzenga Nyumba ya Zumbe Mnungu. Want'hu awa wawalihaga mafundi wadamanye ndima ya kuizenga Nyumba ya Mnungu. 11 Wawenk'haga mafundi wakusongola zimbao za kulunganyila na mafundi uzesi vileke wagule maiwe yasongolwe na mbao kwajili yo kuzenga yadya mazumba yamolwagwa ni maseuta wa Yuda. 12 Want'hu wadamanyaga ndima iyo kwa uhuwilwa, wakanda mwo useuta wa Yohati na Obadia na Walawi na mwo useuta wa wana wa Melali na Zakalia na Meshulamu na kulawa mwo welekwa wa Kohati. Walawi wose wandaga na umanyi wa kutowa wila wa ukemi. 13 Wawakimailaga wakwinula nt'hanu na kuwalongoza wose wadamanye ndima zi hengi. Mwa awo Walawi watuhu wandaga wandishi na watuhu wandaga wakulu watuhu nawo wandaga wakwamila nk'hili.

14 Umwo wandaga wakalava kuse yadya matundu yalavigwe mwe Nyumba ya Mnungu mlavant'hambiko Hilikia akipataga kiya kitabu che Miko ya Zumbe Mnungu icho kilavigwe kwa mkono wa Musa. 15 Hilikia amgambaga Shafani muandishi, "Hikipata kitabu che Miko mwe Nyumba ya Mnungu." Niyo Hilikia amwink'haga Shafani ikitabu. 16 Niho Shafani amwigailaga kiya kitabu seuta niyo amgamba, "Wakulu wako wadamanya kila kint'hu enga ivo wagambilwe wadamanye. 17 Walihaga matundu yandaga mwe Nyumba ya Mnungu niyo wazink'hiza kwa wakimalizi na wakudamanya ndima." 18 Niyo Shafani muandishi amgambaga seuta, "Mlavant'hambiko Hilikia kanink'ha kitabu iki." Naye Shafani niyo akisoma kitabu icho ha seuta. 19 Umwo seuta eze eve zimbuli ziwandikwe mwe kitabu che miko alwebulaga divalo dyakwe kwa kumwogoha Mnungu. 20 Niyo amgamba Hilikia na Ahikamu mwana Shafani na Abidoni mwana Mika muwandishi na Asaya mndima ywa seuta akagamba, 21 "Iteni mkaunge ulangilizi kulawa kwa Zumbe Mnungu kwajili yangu na want'hu wose wasigale Izilaeli na wa Yuda, kwe zimbuli ze kitabu iki kipatikane. Kwaviya, maya ya Zumbe Mnungu yakipata suwe, kwaviya wakale wetu hawatimile zimbuli za Zumbe Mnungu hegu kudamanya yawandikwe mwe kitabu iki."

22 Ivo Hilikia hamwenga na wadya wose seuta andaga kawatuma waitaga kwa mlotezi Hulida mkaza Shalumu mwana Tokati na mwezukuluwe dya Hasila, mkaulizi we mavalo yendile mwe Nyumba ya Mnungu, andaga akekala Yelusalemu mwo mzi uzengigwe uhya, nawo wamgambilaga yose yalailaga. 23 Ivo awagambaga, wauye kwa seta wakamwink'he, 24 ulosi wa zumbe Mnungu ukugamba, "Miye nenigale maihi mwe Yelusalemu na mwa wadya wakwikala kwakwe wose, na maligito yose yawandikwe mwe kitabu kisomigwe ha seuta ywa Yuda, 25 kwaviya wanileka miye niyo waifunk'hizila ubani milungu mituhu, vileke wanigele maya kwajili ye ndima ye mikono yawe. Ivoelo nna maya naho hant'hu aha naho hahana akuunga ayaseleze. 26 Mgambileni seuta ywa Yuda uyo awatumileni mwize mmuuze Zumbe Mnungu. ‘Aya nayo akulonga Zumbe Mnungu, Mnungu ywa Izilaeli mwe zimbuli ziya wivile.’ 27 Kwaviya nokukeiila na kukeseleza kwangu niyo watatula zisuke zako na kuila wize wive zimbuli zangu mwa aha hant'hu, na mwa wantu wakwikala aha, na kukeseleza kwangu, name iviaivia hikwiva, nivo akulonga Zumbe Mnungu. 28 Ivo elo, usengelo wa masulumizo huunga niwigale Yelusalemu, heniwigale mpaka weye ubanike. Useuta wako nounde wa utondowazi." Ivo wegala ulosi wamwigailaga seuta Yosia ulosi uwo.

29 Niho seuta Yosia awetangaga vilongozi wose wa Yuda na Yelusalemu. 30 Naye seuta aitaga mwe Nyumba ya Mnungu hamwenga na want'hu wose wa Yuda na want'hu wakwikala Yelusalemu na walavant'hambiko na Walawi na want'hu wose wakulu kwa wadodo. Niho awasomela ulosi mwe kitabu cha ndagano kioneke mwe Nyumba ya Mnungu. 31 Niyo seuta akimala ho mkola wa kiseuta niyo adamanya ndagano hameso ha Zumbe Mnungu kugamba, namtimile Zumbe Mnung na kutoza sigilizi na malagizo ne miko kwa moyo wakwe wose na kwa muye wakwe wose naho kutimila mbuli za Ndagano ziwandikwe mwe kitabu iki. 32 Naho awatendaga wose awo wendile mwe Yelusalemu na mwe Benjamini kutoza Ndagano. Nawo wakwikala Yelusalemu wekalaga kwa kutimila Ndagano ya Mnungu, Mnungu ywa wakale wawe. 33 Yosia ayahausaga yadya mahili yose ya kuihiza kulawa mwe isi yose ya want'hu wa Izilaeli niyo awagamba wose Waizilaeli wamdamanyile ndima Zumbe Mnungu wawe. Mwo wikazi wakwe usigale hawamlekile Zumbe Mnungu, Mnungu ywa wakale wawe.