1 Selemani niyo akonga kuzenga nyumba ya Zumbe Mnungu uko Yelusalemu mwo mnima Molia umwo Zumbe Mnungu amlailaga ise Daudi, hant'hu aho Daudi asagule mwe kiwasa cha kuhutila ngano cha Olinani mnt'hu ywe dikabila dya Myebusi. 2 Seuta Selemani akongaga uzesi wa nyumba ya Mnungu zuwa dya kaidi mwo mwezi wa kaidi mwo mwaka wa kane wo useuta wakwe. 3 Nyumba ya Zumbe Mnungu iyo seuta Selemani azengaga yandaga na utali wa mita milongo miidi na mfungate, na uzangalamu wa mita kenda. 4 Chumba cho kwingiila chandaga na utali wa mita kenda viligane na uzangalamu wakwe naho utali kuita kulanga wa nyumba iyo nounda mita milongo mishano na mine. Nk'handula zakwe zagubikagwa kwa zahabu yedi nt'hendelo yo kundani. 5 Azungusilaga ukumbi ne zimbao za mibeloshi na kuikiziga kwa zahabu yedi naho auhambaga kwa micholo ikale enga miti ye mitende na minyololo. 6 Seuta Selemani aihambaga nyumba ya Mnungu kwa maiwe ya yombe kulu. Zahabu adamanyile yalawaga mwe isi ya Palivaimu. 7 Aigubikaga nyumba ya Mnungu yose kwa zahabu, mp'hapi zakwe na vizingiti vakwe na nk'handula zakwe na nyivi zakwe. Mwo lukandula ahambaga ne micolo ya viumbwa vina mawawa vikwitangwa makelubi. 8 Naho azengaga hant'hu hakukise, utali wakwe wandaga mita kenda viligane no uzangalamu wakwe. Akizigaga chumba icho kwa zahabu ya tani milongo miidi. 9 Misumali idamanyile ndima yandaga ya zahabu, uzani wakwe enga nusu kilo. Naho Akizigaga vyumba vose va kulanga kwa zahabu.

10 Asongolaga mahili maidi ya viumbwa vina mawawa vikale enga makelubi, niyo ayakiziga kwa zahabu na kuyaika hant'hu hakukise. 11 Kila kiumbwa chandaga na mawawa kwa utali enga mita nne na nusu, wawa dimwenga dyandaga na mita mbili na lobo, wawa dimwenga dyatozaga nk'handula nt'hendelo imwenga ye chumba na ya kaidi dyatozanaga na dye kiumbwa cha kaidi. 12 Naho wawa dimwenga dye kiumbwa cha kaidi dyatozaga nk'handula int'huhu mwe chumba, dya kaidi nadyo dyatozaga mwe kiumbwa cha nk'hongo hagati ye chumba. 13 Utali wa mawawa ye viumbwa ivi wandaga enga mita nne na nusu. Yakimalaga kwa kuligana, futa za viumbwa ivi vina mawawa vikwitangwa makelubi zahingaga kwo ukumbi. 14 Adamanyaga pazia kwa kitambala chedi king'aile cha langi ya buluu na zambalau na ink'hundu. Anamatizaga viumbwa vina mawawa vikwitangwa makelubi.

15 Seuta Selemani adamanyaga mikola miidi ya shaba, kila umwenga una utali wa mita mlongo na shano na nusu, aziikaga he nyumba ya Mnungu. Kila umkola wandaga na taji kwa kulanga kwakwe una utali wa enga mita mbili na nusu. 16 Adamanyaga vint'hu enga mahambo ya mikufu mnanga mwe mikola iyo, naho acholaga makomamanga gana mnanga mwe mikufu. 17 Aikimalisaga imikola iyo he balaza ye nyumba ya Mnungu, umwenga nt'hendelo ya kusini, int'huhu nayo nt'hendelo ya kasikazini, idya ya nt'hendelo ya kusini aitangaga Yakini, idya nt'hendelo ya kasikazini nayo aitangaga Boazi.