1 Yehoshafati abanikaga niyo amoselwa msanga hant'hu wamoselwagwa msanga wakale wakwe mwe vikuta va kiseuta mwo mzi wa Daudi, Yeholamu mwanawe naye andaga mkipe hant'hu ha ise.

2 Ndugu zakwe Yeholamu, wana wa Yehoshafati wandaga ni. Uzia na Yehieli na Zekalia na Azaliahu na Mikaeli na Shefatia. Awa wose wandaga wana wa Yehoshafati seuta ywa Yuda. 3 Ise andaga kawenk'ha geleko kulu dya masawa na zahabu na vint'hu va yombe kulu hamwenga ne mizi ya magomela uko Yuda mna Yehoshafati amwink'haga Yeholamu useuta kwaviya andaga niye nt'hulasasu mwa wanduguze. 4 Yeholamu eze ekale mwe difumbi dyakwe dyo useuta na useuta wakwe umwo wize utoge, yehe awakomaga wanduguze na wakulu wa Izilaeli wose kwa pamba.

5 Yeholamu akongaga kwikaila akanda na miyaka milongo mitatu na miidi. Alongozaga uko andile Yelusalemu kwa lupisi lwa miyaka mnane. 6 Azitimilaga sila ziihile za seuta Ahabu na za maseuta watuhu wa Izilaeli kwaviya amlombaga mwanakike ywa Ahabu. Adamanyaga yaihile ha Zumbe Mnungu, 7 mna Zumbe Mnungu haungile kuubananga lukolo lwa Daudi kwaajili ye Ndagano aikile na Daudi naho andaga kalagana na welekwa wakwe kugamba nawagendeele kwikaila ulo na ulo.

8 Mwo lupisi lwa Yeholamu, want'hu wa Edomu wasagukaga mwo useuta wa Yuda niyo wakeikila seuta ywawe wenye. 9 Ivo Yeholamu aitaga uko yehe hamwenga na wakulu wa watowani na magali yakwe yose ye nk'hondo. Uko mafyo ya watowani wa Edomu yawazungulukaga na kuwatowa, mna ize ibule nekilo wadahaga kukehenyeza na kunyilika. 10 Ivo Edomu isaguka mwo useuta wa Yuda mpaka dielo. Mwo lupisi uulo wakaya wa Libina nawo wasagukaga mwo useuta wawe kwaviya Yeholamu andaga kamleka Zumbe Mnungu, Mnungu ywa wakale wawe. 11 Andaga kadamanya hant'hu ha kulanga ho kuvikila milungu mwe vigulu va Yuda niyo awatenda want'hu wa Yelusalemu na want'hu wa Yuda kudamanya wavu kwa Zumbe Mnjungu.

12 Yeholamu ahokelaga baluwa kulawa kwa mlotezi Eliya ikugamba: "Zumbe Mnungu, Mnungu ywo mkale ywako Daudi agamba hutimile mliganyizo wa iso Yehoshafati hegu sila za Asa seuta ywa Yuda, 13 vituhu vakwe kutimila miliganyizo ya maseuta wa Izilaeli, nawe kuwalongoza Yuda na want'hu wa Yelusalemu kunda hiyo mhuwila kwa Mnungu enga viya adamanye Ahabu na maseuta walongoze hant'hu hakwe. Wailongozaga Izilaeli wasekunda wahuilwa, kuwakoma hata wanduguzo awo wandaga want'hu wedi kujink'ha weye. 14 Ivo elo Zumbe Mnungu naawasulumize want'hu wako na wanao na wavele wako na kubananga ugoli wako wose. 15 Weye mwenye naulumiswe kwa unyonge wa kundani kwa lupisi lutali mpaka unyonge uwo utende utumbo wako ufose kuse."

16 Kwandaga na Wafilisiti na Waalabu watuhu awo wandaga wakekala hagihi na Wakushi. Zumbe Mnungu awakwezaga wande na maya vileke watowane na Yeholamu. 17 Ivo waitowaga isi ya Yuda, watahaga vint'hu vose vandile mwe dizumba dya kiseuta hamwenga na wanawe wose na wavele wakwe wose. Hasigazilwe mwana yeyose mna Ahazia uyo andaga mdodo kwa wose.

18 Umwo yeze yajike, Zumbe Mnungu amwigailaga seuta unyonge wa kundani hokuhona. 19 Agendeelaga kulumwa naho unyonge wakwe wongezekelaga kila zuwa, hata ize ibule mwo uheelo wa mwaka wa kaidi abanikaga kwa masulumizo makulu. Want'hu hawagimbile moto kwa kuhongeza file yakwe enga ivo watendile kwa wakale wakwe.

20 Yeholamu akongaga kwikaila akanda na miyaka milongo mitatu na miidi, alongozaga uko Yelusalemu kwa lupisi lwa miyaka mnane. Umwo eze abanike hahana mnt'hu yeyose endile ne kinyulu, Amoselagwa msanga mwo mzi wa Daudi mna hiyo mwe vikuta va maseuta.