1 Seuta Dalio asigiilaga udamanywe upelembi we kindolo che kiseuta ivo kidamanye ndima mwo mzi wa Babeli. 2 Mna kitabu chandaga mwo mzi wa Ekibatana mwo mkowa wa Media, nacho nekinda na malagizo aya,

3 Mwo mhilimo wa nk'hongo wo useuta wakwe, seuta Koleshi asigiilaga kugamba Nyumba ya Mnungu izengwe uhya mwo mzi wa Yelusalemu,

Naho hande hant'hu hakulavila nt'hambiko na malavo ya kokwa, utali wakwe nounde mita milongo miidi na mfungate na uzangalamu nounde mita milongo miidi na mfungate. 4 Lukazi lwakwe luzengwe kwa safa nt'hatu za maiwe makulu, akajika itimile safa imwenga ya mabao. Maliho yose yalihigwe kulawa kwe kindolo che kiseuta. 5 Naho vyombo vose va zahabu na masawa ayo seuta Nebukaduleza aviletaga Babeli kulawa kwe Nyumba ank'hulu ya Mnungu uko Yelusalemu, nevivuzwe na kuikwa kila kimwenga hant'hu hakwe mwe Nyumba ank'hulu ya Mnungu.

6 Niho Dalio egala sigilizi enga ino:

"Kwa Tatenai kilongozi ywe isi ya ulailo wa zuwa wa mto Efulate na Shetali Bozenai na wakulu weyawe mwe isi."

"Sema mnaite uko kwe Nyumba ank'hulu ya Mnungu. 7 Naho lekeni uzesi we nyumba ino ya Mnungu ugendeele. Mlekeni kilongozi ywe isi ya Yuda na vilongozi wa Wayahudi wazenge Nyumba ya Mnungu hant'hu hakwe. 8 Kwa kongezela nawalagizani kugamba muwaambize mwe ndima iyo, maliho yawe yalihigwe yose kulawa mwe kindolo cha seuta na mwe kodi zao kulawa mwe isi zi nt'hendelo ya usweelo wa zuwa ya mto Efulate, vileke uzesi we Nyumba ya Mnungu use kukimala. 9 Kila zuwa haheina kuswesa, nomuwenk'he walavant'hambiko kila kint'hu kikuungwa, inde ni jeku hegu ndolome hegu mwanangoto ywa malavo ya kokwa kwa Mnungu ywa kwe mbingu, hegu ngano na munyu na divai hegu mavuta ye mizeituni. 10 Aya yose nayalavigwe vileke wadahe kumlavila Mnungu nt'hambiko zikumwelela, wanilombezele wikazi wedi miye seuta na wanangu. 11 Naho nasigiila kugamba mnt'hu yeyose heezumile sigilizi ino, mulo usomolwe kulawa mwe nyumba yakwe niyo wasongolwa nt'hendelo imwenga niyo ajungigwa nawo, naho nyumba yakwe itendigwe zala. 12 Mnungu niye ausagule mzi wa Yelusalemu unde hant'hu hakwe ha kumvika naho ambanange seuta hegu isi yeyose neihige sigilizi ino hegu wakuunga wabanange nyumba ino imwe Yelusalemu. Ni miye seuta Dalio husigiila ivi, vaungwa sigilizi ino itimilwe."

13 Ivo Tatenai kilongozi ywe isi ya ulailo wa zuwa wo mto Efulate na Shetali Bozenai na wakulu weyawe, wakombekesaga kukint'hiza sigilizi ya seuta. 14 Wadala wa Wayahudi nawo wazengaga kwa uhumi kwa wambizi wa mabilikizi ya mlotezi Hagai na Zakalia mwana Ido. Waizengaga na kubinda indima yawe kwa malagizo ya Mnungu ywa Izilaeli na sigilizi ya Koleshi na Dalio Atashasta seuta ywa Uajemi. 15 Kuzenga uhya nyumba iyo kwasiilaga mwe dizuwa dya katatu dyo mwezi ukwitangwa Adali, mwo mhilimo wa mtandatu wo useuta wa seuta Dalio.

16 Ivo want'hu wa Izilaeli na walavant'hambiko na want'hu watuhu wandile wauya kulawa ko utahigwa waikukizaga Nyumba ya Mnungu kwa kinyemi kikulu. 17 Umwo wakaikukiza Nyumba ya Mnungu, walavaga majeku gana na madolome magana maidi na wanangoto magana mane na mbuzi mlongo umwenga na mbili kwajili ya malavo ya kuusa wavu, mbuzi imwenga kwa kila kabila dya Izilaeli. 18 Naho kwaajili ya ndima ya Mnungu mwe Yelusalemu, wawapangaga walavant'hambiko mwe mafyo yawe, naho wawaikaga Walawi mwo ludongo lwawe kwa kutimila sigilizi iwandikwe mwe kitabu cha Musa.

19 Mwe dizuwa dya mlongo na kane dyo mwezi wa nk'hongo, want'hu wauyaga kulawa ko utahigwa, wadyaga Pasaka kwa kinyemi. 20 Walavant'hambiko na Walawi wakekukizaga, wose wakekukizaga vitendese. wachinjaga mwanangoto ywe Pasaka kwajili ya want'hu wose wauyaga kulawa uko wasamizilwagwa, na wandugu zawe walavant'hambiko na kwajili yawo wenye. 21 Ivo Waizilaeli wose wauyaga kulawa uko wasamizilwagwa, wadyaga Pasaka hamwenga na wadya wose wandaga hale ne vihendo va want'hu wa isi ziwazunguluke vileke wamvike Zumbe Mnungu ywa Izilaeli. 22 Kwa mazuwa mfungate want'hu wandaga na kinyemi mwe dizuwa dye kinyemi dye mikate heigeligwe ugwadu, kwaviya Zumbe awenk'haga kinyemi kwa kwaviya nakamtenda seuta ywa Ashulu awunge, niyo awambiza mwo uzesi we Nyumba ank'hulu ya Mnungu ywa Izilaeli.