1 Miyaka mingi ize yomboke useuta wa seuta Atashasta ywa Peshia, handaga na mnt'hu yumwenga etangwagwa Ezila. Uyo andaga mwana Seluya, Seluya andaga mwana Azalia, Azalia andaga mwana Hilikia, 2 Hilikia andaga mwana Shalumu, Shalumu andaga mwana Sadoki, Sadoki andaga mwana Ahitubu, 3 Ahitubu andaga mwana Amalia, Amalia andaga mwana Azalia, Azalia andaga mwana Melayoti, 4 Melayoti andaga mwana Zelahia, Zelahiya andaga mwana Uzi, Uzi andaga mwana Buki, 5 Buki andaga mwana Abishui, Abishui andaga mwana Finehasi, Finehasi andaga mwana Eleazali, Aleazali andaga mwana Haluni mlavant'hambiko mkulu.

6 Ezila ahalawaga Babeli naho andaga mhinizi mmanyi mwe zisigilizi izo Zumbe, Mnungu ywa Izilaeli amwink'haga Musa. Seuta amwink'haga Ezila kila kint'hu icho aungisaga kwaviya Zumbe Mnungu andaga hamwenga naye. 7 Mwo mhilimo wa mfungate wa useta wakwe Atashasita. wamwenga mwa Waizilaeli wakanda ni hamwenga na walavant'hambiko, Walawi, wakemi, wamizi we zink'hili na wandima wa mwe Nyumba ank'hulu ya Mnungu, nawo wakwelaga kuita Yelusalemu. 8 wengilaga mwo mzi wa Yelusalemu mwe dizuwa dya nk'hongo dyo mwezi wa shano mwo mhilimo wa mfungate wa useuta wa seuta Atashasta. 9 Ezila na want'hu wakwe wakongaga int'hambo mwe dizuwa dya nk'hongo dyo mwezi wa nk'hongo, niyo wabula Yelusalemu mwe dizuwa dya nk'hongo dyo mwezi wa shano kwa wambizi wa Mnungu. 10 Ezila akelavaga kwa moyo wose kuhina miko ya Zumbe, kuizumila mwo kuwahiniza want'hu wa Izilaeli sigilizi ne miko yakwe.

11 Ino niyo ibaluwa iyo seuta Atashasta amwink'haga Ezila, uyo andaga mlavant'hambiko na mhinizi mta umanyi mwe zisigilizi na miko ya Zumbe Mnungu awenk'haga Waizilaeli.

12 "Kulawa kwa Atashasta seuta ywa maseuta, kwa Ezila mlavant'hambiko naho mhinizi ywe zisigilizi za Mnungu ywa kwe mbingu, ndamsa."

13 "Haluse nasigiila kugamba mwo useuta wangu, Mwizilaieli yeyose hegu mlavant'hambiko ywawe hegu Mlawi, akaunga kuuya Yelusalemu kwa kuunga mwenye, mwadaha kuitanya. 14 Miye hamwenga na walangilizi wangu mfungate chakutuma wiite ukapelembe uko Yuda na Yelusalemu ukakaule uneva sigilizi ya Mnungu ywako wink'higwe yatimilwa. 15 Naho uguhe masawa na zahabu izo miye na walangilizi wangu kimlavila Mnungu ywa Izilaeli uyo inyumba yakwe i mwo mzi wa Yelusalemu. 16 Nouguhe naho masawa na zahabu zose nouduganye mwe isi ya Babeli hamwenga na malavo hayeina kutigizwa ya want'hu na walavant'hambiko kwajili ye Nyumba ank'hulu ya Mnungu ywawe ya uko Yelusalemu." 17 "Matundu ayo nouyadamanyile ndima kwa wengele kwa kuguila njeku na ndolome na wanangoto na nt'hambiko ya unga na divai na kuvilava kwe kilingo mwe Nyumba ank'hulu ya Mnungu ywenyu uko Yelusalemu. 18 Masawa na zahabu nezisigale nomyatendele dyodyose idyo nouunge weye na weyawo viligane na ivo Mnungu akuunga. 19 Vint'hu wink'higwe kwajili ya kuvika mwe Nyumba ya Mnungu ywako nouvink'hize vose kwe Nyumba ya Mnungu uko Yelusalemu. 20 Unaunga kint'hu kituhu chochose kwajili ya Nyumba ank'hulu ya Mnungu ywako wadaha kukipata mwe kindolo che kiseuta."

21 "Miye seuta Atashasta nasigiila wakimalizi we vindolo vose mwe nt'hendelo ya usweelo wa zuwa yo mto Efulate kugamba chochose naaunge Ezila mlavant'hambiko na mhinizi ywe Miko ya Mnungu ywa kwe mbingu, nommwink'he enga ivo akuunga." 22 nommwink'he kilo alufu nt'hatu na magana mane za masawa na ngano kilo alufu mlongo umwenga na divai lita alufu mbili na mavuta ya mizeituni lita alufu mbili na munyu uwo nouunge. 23 Kila kiya asigiile Mnungunywa kwe mbingukwajili ye nyumba yakwe chaungwa kudamanywa kwa kindedi sema ana wiihiye useuta wangu na wanangu. 24 Naho chawagambilani kugamba havikuungwa kuduganya kodi, kulawa kwa walaant'hambiko, Walawi, na wakemi na wamizi we nk'hili, hegu wandima watuhu we nyumba ino ya Mnungu.

25 "Weye nawe Ezila kwa mzungu akwink'hile Mnungu ywako, sagula walamuzi na walangilizi vileke wawalongoze want'hu wose wakwikala nt'hendelo ya usweelo wa zuwa yo mto Efulate awo wamanyize miko ya Mnungu ywako. Yudya naye heemanyize imiko iyo vaungwa umhinize. 26 Mnt'hu yeyose hee kutimila Miko ya Mnungu ywako na ya seuta, naasengelwe kubanika hegu kusamizwa hegu kuhokwa ugoli wakwe hegu kugeilwa kwe divugailo."

27 Ezila niyo agamba, "Naatogolwe Zumbe Mnungu ywa wakale wetu ampatile seuta moyo wedi wa kuitunya Nyumba ya Mnungu ya uko Yelusalemu. 28 Kwa uwedi wakwe Mnungu hipata wambizi kulawa kwa seuta na wakulu wehasi yakwe wata udahi. Nehikeink'ha moyo kwaviya Zumbe Mnungu nakanda hamwenga na miye, nadahaga kuwaduganya vilongozi wa Izilaeli na kuuyanya nawo."