1 Ayo yose yeze yajike, vilongozi wezaga na kunigamba, "Want'hu wa Izilaeli na walavant'hambiko na Walawi hawa kepagule kulawa kwa wakaya awo wakudamanya ya kuihiza enga yadya ya Wakanaani, Wahiti, Wapelizi, Wayebusi na Waamoni, Wamoabu na Wamisili na Waamoli. 2 Wagosi wa Kiyahudi walomba wavele wa want'hu hi Wayahudi. Ivo want'hu wa Mnungu wakehanganya na want'hu wa si nt'huhu hewe mmanyize Mnungu. Vilongozi hamwenga na wakulu nawo wa bosi kudamanya wavu."

3 Nize nive mbuli izo, nehitatula suke yangu na valo dyangu, na kuzimoga fili zangu ne zindevu niyo nekala hasi kwa kinyulu kikulu na kwikala hasi kwa wogofi. 4 Niho want'hu wose wandaga na lukeng'ent'ha kwa mbuli zilongigwe ni Mnungu ywa Izilaeli kwa masa ya wadya walaile uko wasamizilwagwa weze wakonge kudugana hagihi na miye umwo nandile mwo wogohi kubula kisingi, mwo lupisi lwa kulava nt'hambiko.

5 Kisingi mwo lupisi lwa kulava nt'hambiko, nehinuka hant'hu aho nandaga kwa kinyulu uku suke zangu zikanda zitatuka. Nafikagamadi na kwinula mikono yangu kwa Zumbe Mnungu ywangu niyo nalombeza, 6 hagamba, "Weye Mnungu ywangu naonesa soni kwinula mtwi wangu kwako. Wavu wetu ukeumbika kujink'ha imitwi yetu, kindedi masa yetu yabula hata kwe mbingu. 7 Kukongela mwo lupisi lwa wakale wetu kubula haluse, suwe want'hu wako kitendesa wavu, na kwajili yo wavu wetu, suwe na maseuta wetu, na walavant'hambiko wetu, kiikwa mwo udahi wa maseuta we ziisi izi. Kikomigwa kwa sime, kitahigwa, kihokigwa ugoli wetu, kigelwa soni vitendese mwe vihanga vetu enga ivi dielo. 8 Mna haluse, we Zumbe Mnungu, Mnungu ywetu, kwa mazuwa mageke kukilagisa mbazi zako na kuwambiza wamwenga wetu kuchupuluka kulawa mwo utumwa na kwikala haheina maihi aha ahako. Naivo kukink'ha kinyemi kulawa mwo utumwa. 9 Nekinda watumwa mna hukilekile kikale mwo utumwa, nokumtenda seuta ywa Uajemi ande ywedi kwetu na kukilekela kikale na kuzenga Nyumba ank'hulu ya Mnungu ywetu na kuzenga lukazi lwamokaga, naho kukitenda kikale kwa utondowazi mwa Yuda na Yelusalemu.

10 "Mna haluse Zumbe Mnungu ywetu, nekigeeze elo mwa ayo yalaile? Hamwenga ya yose ukitendele akinati kitimile sigilizi zako, 11 izo ukiink'hile kwa sila ya wandima wako walotezi ukagamba. Isi iyo mkugenda kwikalaita igeligwa usavu na want'hu wakwe kwa kudamanya yaihile, waimemeza usavu wawe kulawa ko uheelo kubula kwo mtuhu. 12 Kwaivo mse kulombelana na want'hu awo, naho mse kuwambiza wande wapati na kugendeela kwikala kwa utondowazi, uneva mwaunga kunda wapati mwe isi na kuwalekela wana wenyu kunda ukipe wawe ulo na ulo.

13 Ivo ayo yose yakipataga kwajili yo uwihi wetu na wavu wetu utendese, kimanya kugamba usengelo ukink'hile ni ndodo hevikuligana na masa yetu, na kuwaleka wamwenga wetu kunda wagima. 14 Togola nekibanange sigilizi yako naho kulombelana na want'hu awa wakudamanya maihi aya? Ino neikutende ukiihiye na kukibananga pele. 15 Zumbe Mnungu ywetu weye una uwagilwa naho kukileka kisigale wagima kubula ivi dyelo. Chakulombeza ukilekele wavu wetu kikamanya kugamba hahali mnt'hu yeyose naakimale hako kwajili ya wavu uno."