1 Umwo Wank'hondo wa want'hu wa Yuda na Benjamini weze weve kugamba want'hu wauyaga kulawa uko utahigwa, naho wazenga uhya nyumba ya Zumbe, Mnungu ywa Izilaeli, 2 wawaitilaga Zelubabeli na vilongozi we zimp'huga na kuwagamba "Nawalombezani kiwambizeni uzesi mhya we Nyumba ank'hulu ya Mnungu, kwaviya suwe enga nyuwe chamvika Mnungu uuyo yumwenga, naho nekikamlavila nt'hambiko kukongela aho kale mwa Esali Hadoni seuta ywa Ashulu uyo akigale aha."

3 Mna Zelubabeli na Yeshua na vilongozi watuhu we zink'holo za Izilaeli wawagambaga, "Suwe hakikuunga wambizi wowose kulawa kwenyu mwo kuizenga uhya Nyumba ya Mnungu ywetu. Suwe wenye nekimzengele Zumbe Mnungu ywa Izilaeli, enga ivo seuta Koleshi ywa Uajemi akisigiile."

4 Niho want'hu wandaga wakekala mwe isi iyo, wakongaga kuwagela chevu na kuwatisa Wayahudi vileke wase kugendeela enga ivo waungaga vinde. 5 Naho wawenk'hagwa matundu ya soni wakulu wa isi ya Koleshi vileke wawahige Wayahudi. Wagendeelaga kudamanya ivo mwo useuta wa Koleshi wa Uajemi, kubula mwo useuta wa Dalio seuta ywa Ashulu.

6 Umwo seuta Ahasuelo akakonga kulongoza, wank'hondo wa want'hu wekalaga Yuda na Yelusalemu wawandikaga baluwa ya kuwalongeleza kwa seuta Ahasuelo.

7 Naho mwo useuta wa Atashata seuta ywa Pelisia, na Bishalamu na Mitedati na Tabeeli na wambwiyaze, wamwandikilaga baluwa seuta Atashata. Baluwa iyo yawandikagwa kwa mawandiko ya Kialamu na kutapitwa kwa milosi aikombaganyaga seuta.

8 Lehumu naye uyo andaga kilongozi mkulu na Shimshai mwandishi, wamwandikilaga Atashata baluwa mwa want'hu wa Yelusalemu iyo yalongaga ivi:

9 "Baluwa iyo yalawa kwa seuta wa Lehumu na Shimshai mhinizi we miko hamwenga na weetu na walamuzi na wakulu wose awo walawaga Eleki na Babeli na Washushani mwe isi ya Elamu, 10 na want'hu watuhu awo Asuli Banipali mkulu mta ludole, awasamizaga na kuwaika mwo mzi wa Samalia na kunt'hu kutuhu nt'hendelo yo usweelo we dizuwa wo mto Eufulate."

11 Baluwa iyo yawandikwagwa ivi:

"Kwa seuta Atashanta, suwe wandima wako we isi ya ulailo wa zuwa wo mto Efulate, chakulamsa."

12 Seuta, "Chaunga umanye kugamba Wayahudi wezile aha kulawa kwa majimbo matuhu yo useuta wako waita Yelusalemu naho wauzenga uhya mzi una want'hu wakudamanya wavu naho wo uwihi. Wabindiliza kuzenga lukazi lwakwe na kuzenga zink'hongelo zakwe. 13 Chaunga weye seuta umanye kugamba mzi uno unazengwa uhya na nk'handula zakwe zinajika, want'hu hawalihe kodi hegu matundu ye hengi naho kindolo cha seuta nekihunguke. 14 Haluse kwaviya kiwant'hu kimkutegeleza seuta, ivo hekikaunga kuona weye ukabelwa, nivo vilekile kituma want'hu wakugambile weye seuta, 15 vileke upelembi udamanywe mwe kitabu che zink'humbukila za wakale wako. Umwo noubunk'hule kugamba kukongela aho kale, mzi uno nounda wa want'hu wakusaguka naho wawenk'ha makunt'ho maseuta na majimbo. Mazuwa yose want'hu wakwe ni wadala mwo kuwalongoza. Nivo valekaga mzi uwo ukabanangwa. 16 Ivo chakugambila weye seuta kugamba uneva mzi uwo unazengwa uhya na magomela yakwe yadamanywe, housigailwe na kint'hu chochose kwe nt'hendelo ya kaidi yo mto Efulate."

17 Niyo seuta atuma uhituzi uno:

"Kwa kilongozi mkulu Lehumu na mhinizi we Miko Shimshai hamwenga na weenyu wose wakwikala Samalia na hant'hu hatuhu ye nt'hendelo ya usweelo wa zuwa yo mto Efulate, ndamsa."

18 "Baluwa idya mnitumile hisomelwa niyo nenk'higwa. 19 Hisigiila upelembi udamanywe naho inabunk'hulwa kugamba ni kindedi kugamba kukongela aho kale mzi uno wa Yelusalemu una nk'humbukila nt'hali ya kuwahiga maseuta, naho nounda ni hant'hu ha uhigani na usongezi. 20 Maseuta wata ludole walongozaga mzi uwo hamwenga ne isi ya ulailo wa zuwa ya Efulate wakatoza kodi na ushulu na malihoye hengi, 21 kwaivo laveni ulamuzi want'hu awo wanase kuuzenga uhya mzi uwo kubula aho nenilonge naho. 22 Naho msunguze kudamanya ivo, sema niswese upati."

23 Ibaluwa iyo kulawa kwa Artashasta ize isomigwe ha Lehumu, mkulu ywa Shimshai na weyawe wasunguzaga kuita Yelusalemu na kuwafigiza kwa ludole waleke kuzenga mzi.

24 Ivo ndima yo kuzenga uhya Nyumba ya Zumbe uko Yelusalemu yakimaliswagwa kubula kwo mhilimo wa kaidi wa seuta Dalio ywa Uwajemi.