1 Mwezi wa mfungate wize ubule, want'hu wa Izilaeli wandaga wekala mwe mizi yawe, wose nawakeduganya mwo mzi wa Yelusalemu niyo wanda kint'hu kimwenga. 2 Yoshua mwana Yosadaki hamwenga na walavant'hambiko weyawe na Zelubabeli mwana Shealtieli hamwenga na weyawe, wazengaga naho uhya kilingo cha Mnungu ywa Izilaeli vileke wadahe kulava malavo ya kokwa enga ivo iwandikwe mwe sigilizi ya Musa mnt'hu ywa Mnungu. 3 Hamwenga na kugamba wawogohaga want'hu wawa zungulukaga, wazengaga kilingo ahadya he nk'hongelo yakwe chandile. Ivo wandaga wakamlavila Zumbe Mnungu malavo ya kokwa, mtondo na kisingi. 4 Wadamanyaga wila wa viheha enga ivo iwandikwe mwe Miko, kila zuwa walavaga malavo ya kokwa kwaajili ye dizuwa idyo. 5 Akajika walavaga malavo yazoelwe yo kokwa pele, yo muwandamo wo mnenge na malavo yose alagize Zumbe Mnungu. Naho walavaga nt'hambiko zose zilavigwe kwa kuunga wenye. 6 Hamwenga na kugamba nk'hongelo ye Nyumba ya Mnungu yandaga hainati kuzengwa, want'hu woho wakongaga kulava malavo ya kokwa kwa Zumbe kukongela kwe dizuwa dya nk'hongo dyo mwezi wa mfungate.

7 Want'hu walavaga matundu yawe ya kuwaliha wasongola maiwe, waselemala na wazesi, naho walavaga nk'hande na vo kunywa na mavuta, vileke wawegaile want'hu wa Tilo na Sidoni wadahe kwigala maziti ye mielezi kulawa Lebanoni. Miti iyo yegalwagwa kwa sila ya bahali kubula Yopa,viligane ne sigilizi ya seuta Koleshi ywa Pesia. 8 Ivo want'hu wakongaga ndima mwo mwezi wa kaidi wo mhilimo wa kaidi kukongela aho wandaga wabula mwe Nyumba ya Mnungu, mwo mzi wa Yelusalemu. Zelubabeli mwana Shealitieli na Yoshua mwana Yosadaki na wandugu zawe watuhu na walavant'hambiko Walawi na want'hu watuhu wose wauyaga Yelusalemu kulawa uko ko utahigwa, waukanaga nawo mwe ndima iyo. Walawi wose wandaga na miyaka milongo miidi na kugendeela awo waikwagwa wakimaile kuzenga uhya Nyumba ya Zumbe Mnungu. 9 Yeshua na wanawe na wanduguze hamwenga na Kadimieli na wanawe wo lukolo lwa Hodavia, wandaga hamwenga mwo uzesi we Nyumba ya Mnungu. Wambizagwa ni welekwa wa Henadadi na wandugu zawe Walawi.

10 Umwo wazesi wakongaga kuzenga ink'hongelo ye Nyumba ya Mnungu, walavant'hambiko wakanda wavala mavalo yawe na magunda mwe mikono yawe, Walawi wo lukolo lwa Asafu nawo wakimalaga na lupatu mwe mikono yawe wakongaga kumtogola Zumbe Mnungu viligane ne sigilizi ya seuta Daudi ywa Izilaeli. 11 Wakemaga kwa kumgamba nivedi na kumtogola Zumbe Mnungu wakagamba,

"Kwaviya ni ywedi, lukunde lwakwe kwa Waizilaeli ni wa mazuwa yose."

Want'hu wose walavaga maizwi yawe kwa ludole lwose, wakamtogola Zumbe Mnungu kwaviya wakonga kuzenga ink'hongelo ye Nyumba ya Zumbe. 12 Walavant'hambiko, wadala na Walawi na wakulu we zink'holo awo waionaga Nyumba ya Mnungu ya nk'hongo, watulaga ndilo weze waone ink'hongelo ye Nyumba ya Mnungu ikazengwa uhya, mna watuhu wagutilaga kwa kinyemi. 13 Want'hu hawadahaga kuliganyiza maizwi ya kinyemi na maizwi ye ndilo, kwaviya zindilo zandilisaga nyigi zikevika kulawa hale vitendese.