1 Ulu nulo ludongo lwa vilongozi we zink'holo za want'hu wauyaga hamwenga na Ezila kulawa Babeli, mwo lupisi lwo useuta wa Atashasta:

2 Vilongozi wo lukolo lwa Fenehasi andaga Gelishom

mwo lukolo lwa Itamali andaga Danieli,

mwo lukolo lwa Daudi andaga Hatushi. 3 Mwo lukolo lwa Shekania andaga mwana Paloshi, Poloshi andaga mwana Zakalia na want'hu gana dimwenga na milongo mishano wawandikwagwa.

4 Mwo lukolo wa Pahati Mmoabu andaga Eliaehoenai mwana Zelahia auyaga na wagosi magana maidi.

5 Mwo lukolo lwa Zatu andaga Shekania mwana Yahazieli auyaga na wagosi magana matatu hamwenga na yehe.

6 Mwo lukolo lwa Adini andaga Ebedi mwana Yonasani auyaga na wagosi milongo mishano hamwenga na yehe.

7 Mwo lukolo lwa Elamu andaga na Yeshaya mwana Atalia auyaga na wagosi milongo mfungate hamwenga.

8 Mwo lukolo lwa Shefatia andaga Zebadia mwana Mikaeli auyaga na wagosi milongo mnane hamwenga na yehe.

9 Mwo lukolo wa Yoabu andaga Obadia mwana Yehieli auyaga na wagosi magana maidi na mlongo na mnane hamwenga na yehe.

10 Mwo lukolo lwa Bini andaga Shelomiti mwana Yosifia auyaga na wagosi gana na milongo mtandatu.

11 Mwo lukolo lwa Bebai andaga Zakalia mwana Bebai auyaga na wagosi milongo miidi na mnane.

12 Mwo lukolo lwa Ezigadi andaga Yohana mwana Hakatani na wagosi gana na mlongo.

13 Mwo lukolo lwa Adonikamu wandaga nawo wo uheelo, awo mazina yawe yandaga ni Elifeleti na Yeuweli na Shemaya na wagosi milongo mtandatu. Elifeleti na Yeueli na Shemaya ni wo lukolo lwa Adonikamu auyaga na wagosi milongo mtandatu.

14 Mwo lukolo lwa Bigivai andaga Utai na Zakulina, auyaga na wagosi milongo mfungate.

15 Nehiwaduganya want'hu wose mnk'handa yo mto ukuhinga mzi wa Ahava. Uko nekiika nk'hambi kwa mazuwa matatu. Nawalaulaga want'hu wose hamwenga na walavant'hambiko, mna hyaonaga Walawi yeyose. 16 Nawetangaga vilongozi kenda weze kwangu, Eliezeli na Alieli na Shemaya na Elinasani na Yalibu na Elnasani na Nasani na Zekalia na Meshulamu hamwenga na wahinizi waidi, Yoyalibu na Elinasani. 17 Nawatumaga kwa Ido kilongozi wa want'hu kudya Kasifia, na kumlombeza yehe na weyawe wandima we Nyumba ya Mnungu, wakegaile want'hu nawadamanye ndima mwe Nyumba ya Mnungu ywetu. 18 Kwa uwedi wakwe Mnungu ywetu, wakiletelaga Shelebia mnt'hu mta mzungu Mlawi ywa welekwa wa Mahili hamwenga na wanawe na wanduguze want'hu mlongo na mnane. 19 Naho wakiletela Hashabia na Yeshaya, wose wa lukolo lwa Melali hamwenga na wandugu zawe milongo miidi. 20 Mwa awo nokunda na wandima magana maidi na milongo miidi awo watati zawe wasagulwagwa na seuta Daudi na wakulu wa want'hu wandile hasi yo useuta wakwe wa kuwambiza Walawi. Mazina ya want'hu awo wose yawandikagwa.

21 Niyo nasigiila kwa wose kiite hagihi no mto Ahava vileke kifunge na kukeseleza ha Zumbe Mnungu ywetu, na kumlombeza akidime na kukilongoza mwe nt'hambo yetu suwe na wana wetu na ugoli wetu wose. 22 Kwaviya hegu nehiona soni kumlombeza seuta akink'he watowani wakwe na wakugendeza zifalasi za kuchamila kwa wank'hondo mwe sila, nehimgamba Mnungu ywetu amvikile kila mnt'hu akumhuwila, "Mna awaihiye na kuwasulumiza wose wakumleka." 23 Ivo nekifunga na kumlombeza Mnungu vileke akidime, yehe naye evaga kulombeza kwetu.

24 Mwa vilongozi nehisagula vilongozi wa walavant'hambiko mlongo na waidi hamwenga na Shelebia, Hashabia, na wandugu zawe mlongo. 25 Awa nehiwahimila masawa na zahabu na vint'hu vose vilavigwe ni seuta, na walangilizi wakwe na wakulu wa want'hu wandaga hasi ya seuta, hamwenga na want'hu wa Izilaeli walavaga kwajili ya malavo ya Nyumba ya Mnungu ywetu. 26 Ivi nivo vint'hu niwahimile, tani za masawa milongo miidi na mbili, vyombo gana va masawa uzami wakwe kilo milongo mfungate, na zahabu kilo alufu nt'hatu na magana mane, 27 nyiga za zahabu milongo miidi, uzami wakwe kilo mnane na vyombo viidi va shaba yedi ikumweka ina yombe kulu enga zahabu.

28 Niyo nawagamba, "Nyuwe mnda want'hu wa Zumbe Mnungu. Mnungu nywa wakale wenyu, hamwenga ne vyombo vose va masawa na zahabu vukulavigwa kwa Zumbe Mnungu, enga malavo yakulavigwa kwa kuunga wenye. 29 Mwaungwa mvidime kwa wengele mpaka aho mkeza kubula kwe Nyumba ya Mnungu. Nomvihime uko kwe chumba cha walavant'hambiko na kuwenk'ha vilongozi wa walavant'hambiko na Walawi, vilongozi wa want'hu wa Izilaeli mwe Yelusalemu." 30 Ivo walavant'hambiko na Walawi waguhaga na kuvidima vedi masawa, zahabu na vyombo vose vikukizwe, vileke wavigale mwo mzi wa Yelusalemu mwe Nyumba ya Mnungu ywetu.

31 Mwe dizuwa dya mlongo na mbili wo mwezi wa nk'hongo, nekitowa utafi kulawa mto Ahava kuita Yelusalemu. Mnungu ywetu andaga hamwenga na suwe, kukidima kwa wank'hondo na wahoki mwe sila. 32 Kize kibule Yelusalemu, nekihumula kwa mazuwa matatu.

33 Mwe dizuwa dya kane, chaitaga kwe Nyumba ya Mnungu ywetu, chahimaga masawa na zahabu ne vyombo ivo viikigwe kunda va Mnungu, niyo chamwink'ha mlavant'hambiko Melemoti, mwana Ulia. Melemoti andaga hamwenga na Eliazali mwana Fenehasi, na Walawi waidi Yozabadi mwana ywa Yeshua na Noadia mwana ywa Binui. 34 Kila kint'hu kiwazigwa na kuhimwa, naho uzani wa kila kint'hu nekiwandikwa.

35 Niyo want'hu wose wauyaga kulawa uko wasamizilwe wamlavilaga Mnungu ywa Izilaeli malavo yawe yo kokwa. Walavaga majeku mlongo na mbili kwajili ya Waizilaeli wose, ndolome milongo kenda na mtandatu na wana ngoto milongo mfungate na mfungate, naho walavaga mbuzi mlongo na mbili kunda malavo ya kuusa wavu. Vose valavagwa kunda malavo ya kokwa kwa Zumbe Mnungu. 36 Naho waguhaga sigilizi wenk'higwe ni seuta niyo nawenk'ha wakulu we we hasi ya seuta na vilongozi wa majimbo y nt'hendelo ya usweelo wa zuwa ya mto Efulate. Nao niyo wawambiza want'hu na kwajili ye Nyumba ya Mnungu.