1 Mwo lupisi ulwo kwa dizina dya Mnungu ywa Izilaeli, walavant'hambiko waidi Hagai na Zekalia mwana Ido, wawalavilaga ulotezi Wayahudi wandaga wakekala mwo mzi mkulu wa Yuda na Yelusalemu. 2 Niho Zelubabeli mwana Shealitieli na Yoshua mwana Yosadaki nawo weze weve imbuli iyo wakongaga naho kuzenga Nyumba ya Mnungu mwo mzi wa Yelusalemu na kwambizwa ni walotezi wa Mnungu.

3 Mwo lupisi ludya Tatenai kilongozi ywe isi ya ulailo wa zuwa wa mto Efulate na Shetali Bozenai na weyawe, waitaga Yelusalemu na kuuza, "Niani awagambile mzenge inyumba ino kubula muibinda nk'hongelo ye lukazi?" 4 Naho wauzaga, "Ni wahi wakuzenga nyumba ino? Chaunga mazina yawe." 5 Mna Mnungu nakanda awamila vilongozi wa Wayahudi, kwa ivo wakulu awo hawawalemeze kubula aho wamwandikilaga baluwa seuta Dalio na kupata ulangilizi wakwe.

6 Ino ni baluwa iyo Tatenai kilongozi ywe isi ing'ambu yo mto wa Efulate na Shetali Bozenai na weyawe, wamwigailaga seuta Dalio. 7 Baluwa iyo yalongaga ivi, "Kwa seuta Dalio, unde na utondowazi.

8 "Chaunga kikugambile seuta kugamba nekiita mwe isi ya Yuda aho ili Nyumba ya Mnungu mkulu. Nyumba ino yazengwa uhya kwa maiwe makulu na nk'handula zakwe zaikwa migamba. Ndima iyo yadamanywa kwa wengele mkulu naho yagendeela vedi."

9 "Nekiwauza vilongozi awo wakigambile niani awagambileni muizenge uhya nyumba ino kubula isila?" 10 Naho nekiwauza mazina yawe vileke kikugambile ni wahi wakukimaila indima ino.

11 "Woho nawakihitula ivi. ‘Suwe ni wandima wa Mnungu wa kwe mbingu na isi naho chaizenga uhya nyumba iyo yazengwagwa na seuta yumwenga ywa Izilaeli na kusila. 12 Mna kwaviya watati zetu wamwiihizaga Mnungu ywa kwe mbingu, yehe awatendaga wahumwe kwe nk'hondo ni seuta Nebukadineza ywa Babeli na seuta ywa Ukalidayo aibanangaga inyumba ino na kuwasamizila want'hu uko Babeli. 13 Mna mwo mhilimo wa nk'hongo wa useuta wakwe seuta Koleshi ywa Babeli alavaga sigilizi inyumba ino ya Mnungu izengwe uhya. 14 Naho avivuzaga vyombo va zahabu na masawa ayo seuta Nebukaduleza ayaguhaga kulawa mwe Nyumba ank'hulu ya Mnungu uko Yelusalemu na kuviika mwe nyumba ya mviko ya Babeli. Vyombo ivo Koleshi avihausaga mwe nyumba ya mviko ya Babeli na kumwink'ha Sheshi Baza uyo wamsagulaga ande kilongozi ywa Yuda, 15 naye amgambaga, aviguhe vint'hu ivo na kuvivuza mwe Nyumba ank'hulu ya Mnungu uko Yelusalemu, uizenge uhya Nyumba ank'hulu ya Mnungu hant'hu hakwe. 16 Niyo Sheshi Baza ezaga na kuika nk'hongelo ye Nyumba ank'hulu ya Mnungu mwo mzi wa Yelusalemu, na kukongela aho uzesi wandaga wagendeela kubula ivi haluse, mna hainati isile.’

17 Haluse elo seuta, chakulombeza sigiila upelembi udamanywe mwe nk'humbukila ze kindolo che kiseuta mwo mzi wa Babeli uneva ni kindedi seuta Koleshi asigiilaga nyumba ino ya Mnungu izengwe uhya mwo mzi wa Yelusalemu. Naho seuta akakakigambile ivo akuunga yehe mwe mbuli ino."