1 Kilo icho seuta hapataga nt'hongo, ivo asigiilaga kitabu che nk'humbukila mwa yadya yalaile mwo useuta wakwe, nacho niyo chasomigwa hakwe. 2 Yaonekaga ivo iwandikwe kugamba, Modekai awabunk'hulaga Betina na Teleshi wakimalizi waidi wa seuta mwa wao wakwamila nk'hili waungaga kumkoma seuta Ahasuelo. 3 Seuta niyo auza, "Togoleni kimwink'ha Modekai nt'hunyo yani hegu geleko dyani mwe mbuli enga ino?"

Wandima wakwe niyo wamhitula, "Hadihali dyodyose adamanyilwe."

4 "Seuta niyo auza kuna mkulu yeyose he balaza?" Mwo lupisi uulo Hamani andaga kengila kale he balaza ye nyumba ya seuta,kulombeza Modekai akomigwe mwo mti wa kukomela uwo audamanyaga. 5 Ivo, wandima wakwe niyo wamhitula seuta, "Hamani niye eyuko kwe balaza." Seuta niyo agamba,

"Mgambeni engile kundani."

6 Hamani eze engile kundani seuta amuuzaga, "Togola adamanyilwe mbwai mnt'hu uyo huunga nimwink'he nt'hunyo?"

"Hamani niyo afanyanya mwo moyo wakwe. Ni ani uyo seuta ukuunga amwink'e nt'hunyo kujink'ha miye?"

7 Ivo Hamani niyo amhitula seuta, mnt'hu uyo seuta ukuunga amwink'he nt'hunyo, 8 "Yaungwa wandima wegale mavalo yedi yadamanywe kwa kitambala kingaile ayavalaga seuta na falasi ya seuta iyo akweile na falasi ivaligwe taji ya kiseuta ivaligwe mwo mtwi wakwe, 9 niyo valo na falasi viikink'higwe kwa yumwenga wa wakulu wa seuta akumanyikisa, na amvale mnt'hu uyo seuta akuuunga kumtunya, na kumlongoza mnt'hu uyo akanda kakwela falasi wako mpaka ho mzi, uku akabwelekeza, ‘Ivi nivo akudamanyilwa mnt'hu uyo seuta akuunga amwink'he nt'hunyo!’"

10 Aaho seuta niyo amgamba Hamani, sunguza, uguhe mavalo ayo na falasi, "Naho udamanye enga ivo ulongile ukamwink'he nt'hunyo ino Modekai, uyo Myahudi akwikala he nk'hili yangu. Unasekuleka kumdamanyila mbuli yeyose mwa izi ulongile."

11 Ivo Hamani aguhaga mavalo ayo na kumvika Modekai, "Na kumgendeza mwo mzi akanda kulanga ye falasi ya seuta, uku akabwelekeza ivi nivo akudamanyilwa mnt'hu uyo seuta akuunga amwink'he nt'hunyo."

12 Niyo Modekai auya kwe nk'hili ya seuta. Mna Hamani agulukaga kwe kaya yakwe, akanda na kinyulu uku futa yakwe igubikwa suke kwa kuona soni. 13 Uko awasimuilaga Zeleshi mkaziwe na wambwiyaze wose mbuli izo apataga. Zeleshi na wambwiyaze niyo wamgamba, "Uneva ni uyu Modekai uyo weye ukongile kwaza ukulu wako hakwo naho ni Myahudi, weye homdahe, naakuhume du."

14 Umwo wandaga wakei kulonga ayo, wandima wa kigosi wa seuta wasunguzaga wabulaga na kumguha Hamani aite kwe fugo ya Esita.