1 Ivo, Yoshua mwana Nuni kwa kinyele awatumaga want'hu waidi kulawa Shitimu waite wakapelembe isi idya vitendese mwo mzi wa Yeliko. Waitaga niyo wabula mwe nyumba ya pamp'he yumwenga etangwagwa Lahabu niyo wagona umo. 2 Seuta ywa Yeliko agambilwagwa kugamba, wagosi waidi Waizilaeli wengila mwo mzi dyelo nekilo vileke waipelembe isi. 3 Seuta ywa Yeliko awatumaga want'hu kwa Lahabu niyo wagamba, "Walave kuse want'hu wezile mwe nyumba yako kwaviya weza kuipelemba isi yose."

4 Mna yudya mvele andaga kawafisa want'hu awo waidi. Ivo awagambaga want'hu awo, "Ni kindedi kugamba want'hu awo wezaga kwangu, mna himanyize uko walaile." 5 Umo kwize kunde mwalagulo nk'hili nk'hulu yo mzi ikavugalwa, want'hu awo wahalawaga kukanda na ziza. Miye hikumanyize uko waitile, watimileni nguzu, nomuwabwiile. 6 Mna Lahabu andaga kawakweza kulanga kwe digulu wapelembi awo niyo awafisa hasi ya mabua yamwenga yakudamanyila suke zing'ale, ayo andaga kayalundika kulanga kwe digulu. 7 Ivo wadya want'hu watumigwe ni seuta wawatimilaga kombokela kwe sila ikuita mwo mdando wo mto Yolodani. Aho weze wahalawe ho mzi, nk'hili nk'hulu yo mzi niyo yavugalwa.

8 Lahabu niyo aita kwa awo wapelembi kwe digulu awabwiilaga wakei kugona, 9 niyo awagamba, "Miye himanya kugamba Zumbe Mnungu kawenk'ha isi ino, naho want'hu wose we isi ino wamyogohani. 10 Kwaviya kiva ivo Zumbe Mnungu anyazile mazi ye bahali ya Shamu kulongole yenyu umo mwandaga mkalawa mwe isi ya Misili, na ivo muwabanange pele Sihoni na Ogu awo maseuta waidi wa Waamoli awo wandaga nt'hendelo ya kaidi yo mto Yolodani. 11 Aho kize kive mbuli izo, niyo chafa chevu kwaajili yenyu niyo chanda hakina ludole. Kwaviya Zumbe Mnungu, Mnungu ywenyu, niye Mnungu ywa kwe mbingu na mwe isi. 12 Ivo elo, naunga mkelise kwa zina dya Zumbe Mnungu kugamba nomnitendele kwa uwedi miye ne mp'huga yangu enga viya miye niwatendeleni uwedi naho mnink'he kilagiso nekileke niwahuwileni. 13 Mlonge kindedi kugamba nomuwaleke walesi wangu na wamkulu wangu na walumbu zangu na mp'huga zawe zose. Mse kuleka kikakomwa."

14 Wadya want'hu niyo wawahitula, "Ugima wenyu nuwo ugima wetu. Uneva hamna mgambile mnt'hu yeyose kiya kidamanye, chakelisa kwenyu kugamba, Zumbe akeza kukink'ha isi ino nekiwatendeleni uwedi."

15 Ivo, Lahabu niyo awaseleza awo want'hu kwa sigi kombokela mwe dilanga dye nyumba, kwaviya nyumba yakwe neizengwa ihamp'hikwe mwo lukandula lwo mzi wa Yeliko. 16 Lahabu niyo awagamba, "Iteni kwe vigulu mkakefise uko vileke wadya wakuwazungula wasekuwabwiila. Mkefise uko kwa mazuwa matatu kubula aho awo wakuwazungulani wakeza kuuya kwo mzi, niho nomkeitile kwenyu."

17 Wapelembi awo wamgambaga Lahabu, "Suwe hekifingizwe ni kilapi iki. 18 Weye waungwa utende ivi. Aho kikeza kwiza mwe isi ino, nyinya sigi ino ink'hundu mwe dilanga idyo ukiselezele. Uwalete welesi wako na wanduguzo na walumbuzo ne mp'huga yose ya iso, wose kwa hamwenga kwe nyumba yako. 19 Mna mnt'hu yeyose akuunga afose kuse ye nyumba yako niyo aita sila nt'huhu, uyo naande na masa ne file yakwe mwenye. Mna uneva mnt'hu yeyose ananda mwe nyumba yako anatozwa du, ivo masa ya file yakwe nayande kwetu. 20 Mna uneva unamgambila mnt'hu yeyose upelembi wetu, suwe hekifingizwe ni kilapi icho kikelisile." 21 Niyo amgamba, nevinde enga ivo mlongile. Awafosezaga niyo wakeitila. Akajika ainyinyaga idya sigi ink'hundu mwe dilanga.

22 Wapelembi awo wahalawaga niyo waita kwe vigulu. Wekalaga uko kwa lupisi lwa mazuwa matatu kubula wadya wandile wakawatimila weze wauye kwo mzi wa Yeliko, aho weze wawazungule niyo hawaone. 23 Ivo, wapelembi awo waidi waseelaga kulawa kwo mnima niyo wadendeluka mto na kuita kwa Yoshua mwana Nuni. Niyo wamgambila mbuli zose izo wadugane nazo. 24 Niyo wamgamba Yoshua, "Kindedi Zumbe Mnungu kaiika isi yose mwo udahi wetu. Naho want'hu wose wa mwe isi iyo wafa chevu kwaajili yetu."