1 Kwandaga na mnt'hu akwitangwa Boazi uko Betelehemu uyo andaga mnt'hu mgoli na amanyikise. Naho uyo andaga ywe mp'huga ya Elimeleki mgosiwe dya Naomi. 2 Zuwa dimwenga, Luti Mmoabu niyo amgamba Naomi, "Nileke niite kwe nk'honde hasokoze. Kwa vovose nenimpate mnt'hu uyo naanigambe nisokoze." Naomi niyo amgamba, "Ita mwanangu."

3 Ivo Luti niyo aita kwe nk'honde akasokoza akanda kunyuma ya wavuni. Niyo yalaila kugamba mwe nk'honde idya akasokoza ni dya Boazi wa lukolo lwa Elimeleki.

4 Uukouko Boazi niyo abula kulawa Betelehemu, niyo awalamsa wavuni wakwe, niyo awagamba, "Zumbe ande hamwenga na nyuwe." Nawo niyo wamhitula,

"Zumbe Mnungu akuvikile."

5 Boazi niyo amuuza yudya mkimalizi wa wavuni wakwe, "Yudya mndele ni yuhi?"

6 Yudya mkimalizi wa wavuni niyo amhitula, "Ni yudya mndele Mmoabu yudya ezile hamwenga na Naomi kulawa mwe isi ya Moabu. 7 Kanilombeza, nimlekele aite akasokoze kwe nk'honde. Keza akadamanya ndima kukongela mtondo na ivi haluse kagenda kahumula kwe diheha."

8 Boazi niyo amgambila Luti, "Tegeleza mwanangu. Usekugenda kusokoza hant'hu hatuhu mna mwe nk'honde ino du. Timilana na wavuni wangu we kivele. 9 Kaula hadya wakudamanyila ndima uite nawo. Hiwagambila wabwanga wasekukusezigila naho unatozwa ni nk'hilu ita kwa mabiga unywe mazi ayo watekile wabwanga awo. "

10 Aho Luti niyo amfunamila Boazi mpaka hasi kwa wogohi, niyo amgamba, "Nii wanifanyanya hameso yako? Nii wanionela mbazi miye mgeni du?"

11 Boazi niyo amhitula, "Hiva yose ayo umdamanyile nyokwe vyala kukongela mgosiwo eze abanike. Himanya ivo uwalekile welesi wako, niyo waileka isi yako na kwikala na want'hu awo wandile huwamanyize. 12 Zumbe akugeleke kwa yose ayo udamanye akwikh'e nt'hunyo ikint'hile. Zumbe Mnungu ywa Izilaeli uyo umgulukile akudime mwe mikono yakwe."

13 Luti niyo amhitula, "Mkulu, weye kunidamanyila wedi utendese. Mna miye hiyo enga wadya wandima wako, kwaviya kunitondowaza naho kulonga na miye kwa lukunde."

14 Viya wandile mo kudya, Boazi niyo amwitanga Luti nakumgamba, "So aha, soo udye mkate uuchank'hize mwe msuzi." Luti niyo ekala hamwenga na wavuni wa shaili. Boazi amwink'haga mkazingo niyo adya eguta na kusigaza. 15 Luti eze enuke na kuunga kugenda kusokoza shaili, Boazi niyo awagambila wavuni wakwe, "Mlekeni asokoze hata mwe makisa naho msekumlemeza. 16 Naho msomoeleni vichanga mwe makisa mlekeni asokoze msekumsunk'hasunk'ha."

17 Luti niyo agendeela kusokoza ngano mwe nk'honde kubula kisingi, eze ahute makisa niyo apata debe dimwenga dye shaili. 18 Niyo aguha ulozo uwo mpaka ko mzi na kumlagisa nine vyala icho apatile. Niyo alava udya mkazingo usigale na kumwink'ha. 19 Nine vyala niyo amuuza, "Kusokoza shaili yose ino? Nk'honde iyo noukasokoza ya ani? Mnungu amvikile uyo akutendile ivo."

Luti niyo amgambila Naomi kugamba nakanda akasokoza mwe nk'honde ya mnt'hu akwitangwa Boazi.

20 Ivo, Naomi niyo amgamba mke mwanawe, Zumbe naamvikile Boazi! "Zumbe akint'hiza lagano dyakwe kwa want'hu wandile wagima na wabanike." Niyo agendeela kugamba, "Mnt'hu uyu ni ndugu ywetu ywa hagihi naho ni yumwenga mwa wadya wakuungwa kukilela."

21 Naho Luti niyo agamba, "Higambigwa ninde hamwenga na wavuni wakwe mpaka wabinde ulozo wose."

22 Naomi niyo amgamba Luti, "Mwanangu neinda ni vedi kwa weye ukadamanya ndima hamwenga na wavuni we kivele mwe nk'honde ya Boazi, kwaviya nougelwe kunswakunswa uneva unaita kwe nk'honde ya mnt'hu mtuhu." 23 Ivo Luti niyo adamanya ndima hamwenga na wavuni we kivele wa Boazi, niyo asokoza ulozo wa ngano na shaili na kuubinda wose mwe nk'honde. Mwo lupisi wose nakekala na nine vyala.